ပြီးခဲ့တဲ့နွေရာသီက ဟားလ်စီးတီးအသင်းကနေ လက်စတာစီးတီးအသင်းကို ပေါင် ၁၇ သန်းနဲ့ ပြောင်းရွှေ့ခဲ့တဲ့ ဟယ်ရီမက်ဂွိုင်းယားဟာ ပွဲဦးထွက်ရာသီမှာ ပုံစံကောင်းပြသနိုင်ခဲ့ပြီး ၂၀၁၈ ကမ္ဘာ့ဖလားပြိုင်ပွဲမှာလည်း အင်္ဂလန်အသင်းရဲ့ခံစစ်ကို ဦးဆောင်နိုင်ခဲ့သူဖြစ်ပါတယ်။ မက်ဂွိုင်းယားကို မန်ချက်စတာယူနိုက်တက်အသင်းကနေ စိတ်ဝင်စားနေကြောင်း သတင်းတွေထွက်ပေါ်နေပြီး မက်ဂွိုင်းယားက ဘယ်သူမဆို ထိပ်တန်းအသင်းတွေမှာ ကစားချင်မှာပဲလို့ သတင်းစကားပါးလိုက်တာဖြစ်ပါတယ်။
Photos: Metro
အသက် ၂၅ နှစ်အရွယ်ရှိပြီဖြစ်တဲ့ ဟယ်ရီမက်ဂွိုင်းယားကို မန်ချက်စတာယူနိုက်တက်အသင်းရဲ့နည်းပြ မော်ရင်ဟိုက ခံစစ်ကို အားဖြည့်ဖို့အတွက် ပစ်မှတ်စာရင်းထဲမှာ ထည့်သွင်းထားတာဖြစ်ပါတယ်။ မက်ဂွိုင်းယားဟာ ၂၀၁၈ ကမ္ဘာ့ဖလားပြိုင်ပွဲမှာ ကောင်းမွန်တဲ့စွမ်းဆောင်ရည်တွေ ပြသနိုင်ခဲ့သူဖြစ်ပြီး ဥရောပထိပ်တန်းအသင်းကြီးတွေရဲ့စောင့်ကြည့်ခြင်းခံနေရသူဖြစ်ပါတယ်။
ဟယ်ရီမက်ဂွိုင်းယားဟာ လက်စတာစီးတီးအသင်းနဲ့ စာချုပ်သက်တမ်း ၄ နှစ်ကျန်ရှိနေသေးသူဖြစ်ပြီး မန်ချက်စတာယူနိုက်တက်အသင်းအနေနဲ့ မက်ဂွိုင်းယားကို ခေါ်ယူချင်တယ်ဆိုရင် ပေါင် ၆၅ သန်းပေးချေဖို့ လိုအပ်မှာဖြစ်ပါတယ်။ လက်စတာစီးတီးရဲ့အားပေးထောက်ခံမှုတွေကို ချီးကျူးဂုဏ်ပြုစကားပြောခဲ့တဲ့မက်ဂွိုင်းယားဟာ ယခုလာမယ့်ရာသီမှာ ပရီးမီးယားလိဂ်ချန်ပီယံဖြစ်ဖို့ တိုက်ပွဲဝင်မယ့် မန်ယူအသင်းနဲ့အတူ ပူးပေါင်းခွင့်ရရှိမယ့် အခွင့်အရေးကို ကြိုဆိုကြောင်း ပြောကြားခဲ့တာဖြစ်ပါတယ်။
Photos: Metro
"ကစားသမားတိုင်းကတော့ မြင့်မားတဲ့အဆင့်တစ်ခုမှာ ကစားချင်ကြတာချည်းပါပဲ"
"ကျွန်တော် ကမ္ဘာ့ဖလားပြိုင်ပွဲမှာ ကစားပြီး ပြန်လာတာပါ။ ပြိုင်ပွဲရဲ့ပြင်းထန်တဲ့ဖိအားတွေကို ကျွန်တော် တကယ်ပျော်ရွှင်မိခဲ့ပါတယ်"
"အဲဒါက ကျွန်တော် ရှေ့ဆက်ပြီးဖြစ်ချင်တဲ့တစ်စုံတစ်ခုပါပဲ"
"လက်စတာစီးတီးအသင်းက ကျွန်တော့်ကို မယုံကြည်နိုင်လောက်အောင် ကောင်းမွန်ခဲ့ကြပါတယ်။ အဲဒီမှာ ရှိနေရတာ ကျွန်တော် တကယ်ပျော်ရွှင်မိပါတယ်။ ဒါပေမယ့် ကျွန်တော်က ရည်မှန်းချက်ရှိတဲ့ကစားသမားတစ်ယောက်ပါ။ ကစားသမားတိုင်းက မြင့်မားတဲ့အဆင့်တစ်ခုမှာ ကစားချင်ကြတဲ့သူတွေချည်းပါပဲ"လို့ ပြောကြားခဲ့ပါတယ်။