ချယ်ဆီးအသင်းရဲ့ကြယ်ပွင့်တိုက်စစ်မှူး အယ်ဗာရိုမိုရာတာဟာ ပြီးခဲ့တဲ့နွေရာသီကမှ ရီးရဲမက်ဒရစ်အသင်းကနေ ချယ်ဆီးအသင်းကို ပြောင်းရွှေ့ခဲ့သူဖြစ်ပြီး ယခုအချိန်မှာတော့ အီတလီကို ပြောင်းရွှေ့ဖို့ သတင်းတွေထွက်ပေါ်နေတာဖြစ်ပါတယ်။ အေစီမီလန်အသင်းဟာ ထိပ်တန်းတိုက်စစ်မှူးတစ်ဦးကို ခေါ်ယူဖို့ ဆန္ဒရှိနေပြီး မိုရာတာကလည်း အေစီမီလန်အသင်းကို ပြောင်းရွှေ့ဖို့ဆန္ဒရှိနေတယ်လို့ သိရပါတယ်။
ချယ်ဆီးအသင်းရဲ့တိုက်စစ်မှူး မိုရာတာဟာ အသင်းရဲ့စံချိန်တင်ပြောင်းရွှေ့ကြေးနဲ့ ခေါ်ယူခဲ့တဲ့ကစားသမားဖြစ်ပြီး ရာသီအစမှာ ၆ ပွဲကစားပြီး ၆ ဂိုးသွင်းယူနိုင်ခဲ့သူဖြစ်ပါတယ်။ ဒါပေမယ့် ယင်းခြေစွမ်းအတိုင်း ထိန်းသိမ်းနိုင်ဖို့ ရုန်းကန်ခဲ့ရပြီး ချယ်ဆီးအသင်းအတွက် အရေးပါတဲ့ပွဲစဉ်တွေမှာ ဂိုးသွင်းယူနိုင်ဖို့ ရုန်းကန်ခဲ့ရပါတယ်။
ချယ်ဆီးအသင်းက ဇန်နဝါရီအပြောင်းအရွှေ့ကာလမှာ မိုရာတာကို အကူအညီဖြစ်စေဖို့ အာဆင်နယ်တိုက်စစ်မှူး ဂီရော့ဒ်ကို ခေါ်ယူပေးခဲ့ပေမယ့်လည်း အကူအညီမဖြစ်ခဲ့တာဖြစ်ပါတယ်။ လီယိုနာဒိုကို အေစီမီလန်အသင်းက အားကစားဒါရိုက်တာသစ်အဖြစ် ခန့်အပ်ပြီးနောက်မှာ အေစီမီလန်အသင်းဟာ အသင်းရဲ့လူစာရင်းကို တောင့်တင်းအောင် ပြုလုပ်ဖို့ ကြိုးပမ်းလာတာဖြစ်ပါတယ်။
ကနဦးရရှိထားတဲ့သတင်းတွေအရ အေစီမီလန်အသင်းနဲ့ မိုရာတာတို့ဟာ ပြောဆိုဆွေးနွေးမှုတွေ စတင်ခဲ့ပြီလို့ သိရပြီး ချယ်ဆီးအသင်းက ခေါင်းညိတ်လိုက်တာနဲ့ အပြောင်းအရွှေ့ဖြစ်လာမှာဖြစ်ပါတယ်။ ယနေ့အပြောင်းအရွှေ့ဈေးကွက်မှာ မိုရာတာရဲ့ပြောင်းရွှေ့ကြေးဟာ တန်ဖိုးနိမ့်ကျခြင်းမရှိဘဲ ချယ်ဆီးအသင်းက မိုရာတာအတွက် ပေါင်သန်း ၇၀ ဝန်းကျင်ရရှိလိမ့်မယ်လို့ မျှော်လင့်နေတာဖြစ်ပါတယ်။
မိုရာတာဟာ ယခင်က အီတလီစီးရီးအေအသင်းမှာ ကစားခဲ့ဖူးပြီး ကွန်တီက ယင်းအချိန်တုန်းက ဂျူဗင်တပ်ကို ကိုင်တွယ်နေပြီး မိုရာတာက ၎င်းရဲ့လက်အောက်မှာ အကောင်းဆုံးပုံစံပြသနိုင်ခဲ့ပါတယ်။ ချယ်ဆီးအသင်းဟာ တိုက်စစ်မှာ ဘတ်ရှူဝါရီနဲ့ ဂီရော့ဒ်တို့ ရှိနေပြီး မိုရာတာကို အသင်းကနေ ထွက်ခွာခွင့်ပေးလိုက်တဲ့အချိန်ကျရင် ၎င်းရဲ့နေရာမှာ အစားထိုးဖို့အတွက် ဂိုးသွင်းပိုင်နိုင်တဲ့ ကစားသမားတစ်ဦးကို ခေါ်ယူဖို့ ဆန္ဒရှိနေတာဖြစ်ပါတယ်။