ဒီဂီယာဟာ လာမယ့် ၂၀၁၉ ခုနှစ်မှာ မန်ချက်စတာယူနိုက်တက်အသင်းနဲ့ စာချုပ်သက်တမ်းကုန်ဆုံးတော့မှာဖြစ်ပြီး မန်ချက်စတာယူနိုက်တက်အသင်းဟာ ဒီဂီယာကို တစ်နှစ်သက်တမ်းတိုးခွင့်ကျန်ရှိနေသေးတာကြောင့် ၂၀၂၀ ခုနှစ်အထိ အသင်းမှာ ဆက်ရှိနေဦးမှာဖြစ်ပါတယ်။

အသက် ၂၇ နှစ်အရွယ်ရှိပြီဖြစ်တဲ့ ဒီဂီယာဟာ မန်ချက်စတာယူနိုက်တက်အသင်းကို ၂၀၁၁ ခုနှစ်မှာ ရောက်ရှိခဲ့သူဖြစ်ပြီး မန်ယူအသင်းနဲ့အတူ ပရီးမီးယားလိဂ်၊ ယူရိုပါလိဂ်၊ အက်ဖ်အေဖလားနဲ့ အခြားဆုဖလားတွေကို ကိုင်မြှောက်နိုင်ခဲ့သူဖြစ်ပါတယ်။

မန်ချက်စတာယူနိုက်တက်အသင်းဟာ ၂၀၁၂-၂၀၁၃ ရာသီနောက်ပိုင်းကတည်းက ပရီးမီးယားလိဂ်ဖလားကို မရရှိတော့တာဖြစ်ပြီး ဒီဂီယာက နိုင်ပွဲတွေကိုသာ အာရုံစိုက်ထားပြီး စာချုပ်သစ်နဲ့ အခြားကိစ္စတွေကို ခေါင်းထဲမထည့်ထားဘူးလို့ ပြောကြားခဲ့ပါတယ်။

"အဲဗာတန်နဲ့ အရေးပါတဲ့ပွဲစဉ်ရှိနေပြီး လာမယ့်လမှာ ကြီးမားတဲ့ပွဲစဉ်တွေ ယှဉ်ပြိုင်ရဖိုု့ရှိနေပါတယ်။ အဲဒါက တခြားကိစ္စတွေကို စဉ်းစားနေတာထက် ပိုစဉ်းစားရမယ့်ကိစ္စလို့ ကျွန်တော်ထင်ပါတယ်"

"ကျွန်တော် ဒီမှာရှိနေခဲ့တာ ရာသီတွေအများကြီးရှိပါပြီ။ ကျွန်တော်အခု အသင်းမှာ ၈ ရာသီမြောက်အတူတူရှိနေတာပါ။ ကျွန်တော် ဒီမှာအရမ်းပျော်ရွှင်နေပါတယ်။ အမြဲတမ်း ပရိသတ်တွေဆီကနဲ့ အသင်းမှာအလုပ်လုပ်နေကြတဲ့ လူတိုင်းဆီက နွေးထွေးမှုကို ကျွန်တော် ခံစားရပါတယ်"လို့ ပြောကြားခဲ့ပါတယ်။