လီဗာပူးအသင်းရဲ့ကြယ်ပွင့်တိုက်စစ်မှူး မိုဟာမက်ဆာလာဟာ ဘုန်းမောက်နဲ့ပွဲစဉ်မှာ ဟက်ထရစ်သွင်းယူနိုင်ခဲ့တာကြောင့် ဖာနန်ဒိုတောရက်စ် တင်ရှိထားတဲ့ စံချိန်တစ်ခုကို ရိုက်ချိုးနိုင်ခဲ့ပါတယ်။ ပြီးခဲ့တဲ့စနေနေ့ညက ဘုန်းမောက်အသင်းကို ၄ ဂိုး ဂိုးမရှိနဲ့ အနိုင်ရရှိခဲ့တဲ့ပွဲစဉ်မှာ မိုဟာမက်ဆာလာက ခြေစွမ်းပြပြီး တစ်ဦးတည်း ၃ ဂိုးသွင်းယူခဲ့တာဖြစ်ပါတယ်။
Photos: Soccerladuma
လီဗာပူးအသင်းရဲ့ထိပ်တန်းဂိုးသွင်းရှင်ဟောင်း ဖာနန်ဒိုတောရက်စ်ဟာ လီဗာပူးအသင်းအတွက် ပွဲ ၆၀ ကစားခဲ့ရာမှာ သွင်းဂိုး ၄၀ သွင်းယူပြီး ပွဲအရေအတွက်အနည်းဆုံးနဲ့ ဂိုးအများဆုံးသွင်းယူထားတဲ့ကစားသမားအဖြစ် ရော်ဘီဖောင်လာကို ကျော်ဖြတ်ပြီး စံချိန်သစ်တင်ရှိခဲ့တာဖြစ်ပါတယ်။
မိုဟာမက်ဆာလာဟာ ဘုန်းမောက်အသင်းဘက်ကို အဖွင့်ဂိုး သွင်းယူခဲ့တဲ့ဂိုးဟာ ၎င်းရဲ့သွင်းဂိုး ၄၀ မြောက်သွင်းဂိုးဖြစ်ပြီး ၅၂ ပွဲကစား သွင်းဂိုး ၄၀ အထိ အမြန်ဆုံးရောက်ရှိခဲ့တဲ့ကစားသမားဖြစ်လာခဲ့တာဖြစ်ပါတယ်။
Photos: talkSPORT
ဘုန်းမောက်အသင်းရဲ့နည်းပြ အက်ဒီဟောင်းဟာ လီဗာပူးအသင်းရဲ့ကစားကွက်ကို ထိန်းချုပ်နိုင်ခဲ့ခြင်းမရှိဘဲ ပွဲအပြီးမှာ မိုဟာမက်ဆာလာရဲ့ စွမ်းဆောင်ရည်ကို ချီးကျူးသွားခဲ့ပါတယ်။
"ဆာလာကစားသွားတာ အရမ်းကောင်းပါတယ်။ သူ တကယ်ကောင်းခဲ့တယ်မဟုတ်လား"
"သူ့ပုံစံက ထက်မြက်တဲ့ ဓားသွားတစ်ခုလိုပဲ။ ကျွန်တော်တို့ သူ့ကို ကိုင်တွယ်နိုင်ဖို့ ရုန်းကန်ခဲ့ရပါတယ်။ သူက ကမ္ဘာပေါ်က အကောင်းဆုံးကစားသမားတွေထဲက တစ်ဦးပါ"လို့ FourFourTwo ကို ပြောကြားခဲ့ပါတယ်။