မနေ့ညက ကစားခဲ့တဲ့ စီးရီးအေပွဲစဉ် (၄)မှာ ဂျူဗင်တပ်စ်တိုက်စစ်မှူး ရော်နယ်ဒိုဟာ ပထမဆုံး စီးရီးအေသွင်းဂိုးကို စတင်ရရှိသွားခဲ့ပါတယ်။ ဆက်ဆူအိုလိုအသင်းနဲ့ အိမ်ကွင်းမှာ ကစားခဲ့ရတာဖြစ်ပြီး ရော်နယ်ဒိုက ဒုတိယပိုင်းမှာ အနိုင်ဂိုး (၂)ဂိုး သွင်းယူပေးခဲ့တာ ဖြစ်ပါတယ်။ အခြားပွဲစဉ်တစ်ပွဲဖြစ်တဲ့ ကက်ဂလီယာရီ နဲ့ အေစီမီလန်တို့ပွဲမှာလည်း အေစီတိုက်စစ်မှူး ဟီဂူအင်က ဒီနှစ်အတွက် ပထမဆုံး သွင်းဂိုးကို ရယူသွားနိုင်ခဲ့ပါတယ်။
Photo : ESPN
ဂျူဗင်တပ်စ်အသင်းကနေ အငှားလာရောက်ကစားနေတဲ့ ဟီဂူအင်ဟာ စီးရီးအေအဖွင့်ပွဲ (၂)ပွဲမှာ ဂိုးပေါက်ပျောက်နေတာဖြစ်ပြီးတော့ ရော်နယ်ဒိုလိုပဲ ရုန်းကန်နေခဲ့ရသူ ဖြစ်ပါတယ်။ ပြီးခဲ့တဲ့ ဘောလုံးရာသီတွေမှာ ဂျူဗင်တပ်စ်ရဲ့ အဓိကဂိုးသွင်းစက် ဖြစ်ခဲ့တဲ့ ဟီဂူအင်ဟာ အသင်းသစ်မှာ အထိုင်ကျဖို့ ရုန်းကန်နေခဲ့ရပြီး သွင်းဂိုးတစ်ဂိုးရဖို့ ခက်ခဲနေခဲ့ပါတယ်။
Photo : ESPN
ကက်ဂလီယာရီအသင်းဟာ ဆန်းတို့စ်ဂယ်လ်ဗာအိုရဲ့ ပွဲချိန် (၄)မိနစ်မှာကတည်းက သွင်းယူခဲ့တဲ့ သွင်းဂိုးနဲ့ အေစီမီလန်ကို ဦးဆောင်နိုင်ခဲ့ပြီး ဟီဂူအင်က ဒုတိယပိုင်း (၅၅)မိနစ်မှာ ချေပဂိုးပြန်လည်သွင်းယူခဲ့တာ ဖြစ်ပါတယ်။ ပွဲအပြီးမှာတော့ ကက်ဂလီယာရီ နဲ့ အေစီမီလန်တို့ဟာ တစ်ဖက်တစ်ဂိုးစီနဲ့ သရေပွဲအဖြစ် အဆုံးသတ်ခဲ့ပါတယ်။
Photo : ESPN
သရေရလာဒ်ကြောင့် အေစီမီလန်ဟာ (၃)ပွဲကစားပြီးချိန်မှာ ရမှတ် (၄)မှတ် ပိုင်ဆိုင်ခဲ့ပြီး အဆင့် (၁၄)နေရာကို တက်လှမ်းနိုင်ခဲ့ပါတယ်။ ဟီဂူအင်ကတော့ ပြီးခဲ့တဲ့ ဘောလုံးရာသီ (၂)ရာသီအတွင်း ဂျူဗင်တပ်စ်အတွက် လိဂ်ဂိုး (၄၀)အထိ သွင်းယူပေးခဲ့တာဖြစ်ပြီး ရော်နယ်ဒို ဂျူဗင်တပ်စ်ကို ရောက်ရှိလာပြီးနောက် အေစီမီလန်ကို ပြောင်းရွှေ့ခဲ့ရတာ ဖြစ်ပါတယ်။
Photo : ESPN
အာဂျင်တီးနားတိုက်စစ်မှူးဟာ ပွဲချိန်ပြီးဆုံးခါနီးမှာ နောက်ထပ်သွင်းဂိုးတစ်ဂိုး ရရှိဖို့ အခွင့်အရေးပိုင်ဆိုင်ခဲ့ပေမယ့်လည်း သူ့ရဲ့ ခေါင်းတိုက်သွင်းချက်ဟာ ဂိုးပေါက်နဲ့ လွဲချော်ခဲ့ရပါတယ်။ အခြားပွဲစဉ်တစ်ခုဖြစ်တဲ့ ရိုးမား နဲ့ ချီယေဗိုတို့ရဲ့ ပွဲမှာတော့ တစ်ဖက်ကို (၂)ဂိုးစီ သရေပွဲဖြစ်ခဲ့ပြီး ဦးဆောင်ဂိုးတွေ ရရှိခဲ့တဲ့ ရိုးမားအတွက် (၂)မှတ် နစ်နာသွားခဲ့ရပါတယ်။