မနေ့ညက ကစားခဲ့တဲ့ ချန်ပီယံလိဂ်အုပ်စု (H) ရဲ့ ပွဲစဉ်တစ်ပွဲဖြစ်တဲ့ ယူနိုက်တက် နဲ့ ယန်းဘွိုင်းအသင်းတို့ရဲ့ ပွဲစဉ်မှာ ယူနိုက်တက်အတွက် ဖယ်လိုင်နီက နောက်ကျအနိုင်ဂိုးကို မိနစ် (၉၀) မှာ သွင်းယူပေးခဲ့ပါတယ်။ ဖယ်လိုင်နီ ဂိုးသွင်းယူပြီး ချိန်မှာတော့ ယူနိုက်တက်နည်းပြ မော်ရင်ဟိုဟာ အားပါးတရအောင်ပွဲခံခဲ့မှု ပြုလုပ်သွားခဲ့တယ်လို့ Daily Mail က ဖော်ပြခဲ့ပါတယ်။
Photo : Daily Mail
အိုးထရက်ဖို့ဒ်မှာ ကစားခဲ့တဲ့ ဒီရာသီ ချန်ပီယံလိဂ်ပွဲ (၂)ပွဲမှာ ဗလန်စီယာနဲ့ ဂိုးမရှိသရေ၊ ဂျူဗင်တပ်စ်ကို ၁-၀ တို့နဲ့ အရေးနိမ့်ထားပြီး နိုင်ပွဲမရသေးသလို သွင်းဂိုးလည်း တစ်ဂိုးမှ မရသေးတဲ့ ယူနိုက်တက်ဟာ ယန်းဘွိုင်းနဲ့ပွဲမှာလည်း ဂိုးမရှိသရေပွဲနဲ့ အဆုံးသတ်ဖို့သာ ရှိနေခဲ့ပါတယ်။ ပရီးမီးယားလိဂ်မှာလည်း ရလာဒ်မကောင်းလို့ ဖိအားတွေအောက် ရောက်နေတဲ့ မော်ရင်ဟိုအတွက် နောက်ထပ်ဖိအားတွေ တိုးမယ့်အရေးနဲ့လည်း ကြုံခဲ့ရပါတယ်။
Photo : Daily Mail
ဒါပေမယ့် မိနစ် (၉၀)မှာ ဖယ်လိုင်နီက လူကာကူရဲ့ ဖန်တီးပေးမှုကတဆင့် ညာခြေနဲ့ အပိုင်ကန်သွင်းပြီး ဂိုးယူလိုက်နိုင်ချိန်မှာတော့ မော်ရင်ဟိုဟာ ကွင်းဘေးနားမှာ အားပါးတရကို အောင်ပွဲခံသွားခဲ့ပါတယ်။ ကစားသမားတွေ သောက်သုံးဖို့အတွက် ချပေးထားတဲ့ ရေဗူးထည့်သေတ္တာကို မော်ရင်ဟိုက ပိတ်ကန်ခဲ့ပြီး ကိုင်ပေါက်ပစ်ကာ အောင်ပွဲခံခဲ့တာ ဖြစ်ပါတယ်။
Photo : Daily Mail
ဖယ်လိုင်နီရဲ့ သွင်းဂိုးကြောင့် ယူနိုက်တက်ဟာ ချန်ပီယံလိဂ် (၁၆)သင်းအဆင့် ရှုံးထွက်ပွဲတွေကို တက်လှမ်းခွင့် ရရှိခဲ့ပြီး အိမ်ကွင်းမှာလည်း ပထမဆုံးသွင်းဂိုး၊ ပထမဆုံးနိုင်ပွဲကို ရရှိခဲ့တာ ဖြစ်ပါတယ်။ တပည့်ကျော် ဖယ်လိုင်နီရဲ့ ဂိုးသွင်းမှုကို မြင်တွေ့ပြီးနောက်မှာတော့ ချုပ်တည်း ထားခဲ့ရသမျှကို မော်ရင်ဟိုက အိတ်သွန်ဖာမှောက် ဖွင့်ချခဲ့ပြီး အောင်ပွဲခံသွားခဲ့တာက တစ်ပွဲလုံးရဲ့ ဆွဲဆောင်မှုအရှိဆုံး အချိန်ဖြစ်ခဲ့ပါတယ်။
Photo : Daily Mail
ပွဲအပြီးမှာတော့ မော်ရင်ဟိုက - "ကျွန်တော့်ရဲ့ ချစ်ခင်ရသူတွေကို မက်ဆေ့ချ်ပို့ခဲ့တာပါ၊ ချန်ပီယံလိဂ်ကို (၁၄)ကြိမ် ကျွန်တော် ကစားခဲ့ပြီး (၁၄)ကြိမ်လုံး အုပ်စုအဆင့်က တက်ရောက်နိုင်ခဲ့ပါတယ်၊ ကျွန်တော် ချန်ပီယံလိဂ်ကို (၂)ကြိမ် ကစားခွင့်မရခဲ့ပဲ ယူရိုပါလိဂ်ကို (၂)ကြိမ် ဗိုလ်စွဲခဲ့ပါတယ်" လို့ ရှုံးထွက်အဆင့်ကို တက်ရောက်နိုင်ခဲ့မှုနဲ့ ပတ်သက်ပြီး ရှင်းလင်းပြောကြားသွားခဲ့ပါတယ်။