မြန်မာနိုင်ငံဘောလုံးအဖွဲ့ချုပ်က ၎င်းတို့ရဲ့တရားဝင်ဖေ့စ်ဘွတ်ခ်စာမျက်နှာကနေတစ်ဆင့် ယနေ့ညနေမှာ ယှဉ်ပြိုင်ကစားမယ့် မြန်မာအသင်းနဲ့ ဗီယက်နမ်အသင်းတို့ရဲ့ပွဲစဉ်အတွက် အဝေးကွင်းပရိသတ်ကို ပေးထားတဲ့ လက်မှတ်ခွဲတမ်း အစောင် ၂၄၀၀ အကုန်လုံး ရောင်းချထားပြီးဖြစ်တယ်လို့ အတည်ပြုခဲ့ပါတယ်။
ဗီယက်နမ်အသင်းကို လာရောက်အားပေးမယ့် အဝေးကွင်းပရိသတ်တွေအနေနဲ့ အိမ်ကွင်းပရိသတ်တွေအတွက် ရောင်းချပေးနေတဲ့ အိမ်ကွင်းလက်မှတ်များကို မဝယ်ယူဖို့နဲ့၊ ဝယ်ယူပြီး ကွင်းအတွင်းဝင်ရောက်ဖို့ ကြိုးပမ်းခဲ့မယ်ဆိုရင် ဝင်ခွင့်ရရှိမှာမဟုတ်ကြောင်း မြန်မာနိုင်ငံဘောလုံးအဖွဲ့ချုပ်က အသိပေးနှိုးဆော်ထားပါတယ်။
ယနေ့ညနေ ၆ နာရီမှာ ယှဉ်ပြိုင်ကစားမယ့် မြန်မာအသင်းနဲ့ ဗီယက်နမ်အသင်းတို့ရဲ့ပွဲစဉ်ဟာ AFF ဆူဇူကီးဖလား ၂၀၁၈ ပြိုင်ပွဲ အုပ်စု A ရဲ့ အကြီးမားဆုံးပွဲစဉ်ဖြစ်လာမှာဖြစ်ပြီး အုပ်စုဗိုလ်နေရာအတွက် အဆုံးအဖြတ်ပေးမယ့်ပွဲစဉ်လည်းဖြစ်ပါတယ်။
မြန်မာအသင်းဟာ ကမ္ဘောဒီးယား၊ လာအိုအသင်းတို့ကို အနိုင်ရရှိထားပြီး ဗီယက်နမ်အသင်းနဲ့ ရမှတ် ၆ မှတ်ချင်းတူပေမယ့် သွင်းဂိုးအသာနဲ့ အုပ်စုဗိုလ်အဖြစ် ရပ်တည်နေတာဖြစ်ပါတယ်။
မြန်မာအသင်းနဲ့ ဗီယက်နမ်အသင်းတို့ရဲ့ အုပ်စုတတိယပွဲစဉ်ကို မြန်မာ့ရုပ်မြင်သံကြား(MRTV)နဲ့ MRTV Sports Channel တို့ကနေ ပွဲမစတင်မီ ၅ နာရီ ၁၅ မိနစ်ကနေစတင်ပြီး တိုက်ရိုက်ထုတ်လွှင့်ပြသသွားမယ်လို့ သိရပါတယ်။