Daily Express ရဲ့ ဖော်ပြချက်အရ အသက် (၃၀)အရွယ် တိုက်ခိုက်ရေးသမားကို ဆေးစစ်ဆေးမှုတွေ အပြီးမှာ ထိုးခွင့်မပြုဖို့ ဆုံးဖြတ်ခဲ့တာ ဖြစ်ပါတယ်။ ထိချက်နာခဲ့တဲ့ မက်ဂရီဂေါ်အနေနဲ့ နောက်ထပ်ပွဲစဉ်တွေ ထိုးသတ်ဖို့အတွက် လုံလောက်တဲ့အချိန်ထိ ကုသမှု ခံယူရမှာ ဖြစ်ပါတယ်။ ခါဘစ်ကတော့ ဆေးစစ်ဆေးမှုအပြီးမှာ နောက်ထပ်ပွဲစဉ်တွေ ထိုးသတ်ဖို့အတွက် ပြသနာမရှိခဲ့လို့ ထိုးသတ်နိုင်မှာ ဖြစ်ပါတယ်။

ခါးပတ်လုပွဲမှာတော့ လက်ရှိချန်ပီယံ ခါဘစ်က စိန်ခေါ်သူ မက်ဂရီဂေါ်ကို အသာစီးက ထိုးသတ်ပြီး ဒိုင်ပွဲရပ်နဲ့ အနိုင်ရခဲ့ပါတယ်။ ကွန်နာမက်ဂရီဂေါ်က အရှုံးကို လက်သင့်ခံဖို့ လက်နဲ့ပုတ်ပြီး အချက်ပြခဲ့ပေမယ့် ခါဘစ်က မက်ဂရီဂေါ်ကို ချုပ်ထားမှုကို လွှတ်မပေးခဲ့ပဲ ထိန်းချုပ်ထားခဲ့လို့ ဒိုင်က ဖျန်ဖြေပေးခဲ့ရပါတယ်။ ပွဲအပြီးမှာတော့ ခါဘစ်ဟာ ထိုးသတ်ကွင်းကို ကျော်တက်ပြီး စင်အောက်ဆင်းသွားကာ မက်ဂရီဂေါ်ရဲ့ အသင်းသားတွေကို လိုက်လံထိုးကြိတ်ခဲ့ပါတယ်။

ဒီအဖြစ်အပျက်နဲ့ ပတ်သက်ပြီး "သူတို့နှစ်ယောက်လုံးကို ကျွန်တော်တို့ စစ်ဆေးသွားဦးမှာပါ၊ သူတို့ရဲ့ ကိစ္စကို အလျှင်မြန်ဆုံး စစ်ဆေးဆုံးဖြတ် ကြားနာသွားမှာပါ၊ လက်ရှိမှာတော့ သူတို့ရဲ့ ဆုကြေးငွေတွေအားလုံးကို ထိန်းသိမ်းထားပါတယ်၊ ယာယီပိတ်ပင်ထားတဲ့ကာလက တိုတိုလေးပါ၊ နိုဝင်ဘာလအတွင်းမှာ နောက်ဆုံးအကြိမ် ကြားနာစစ်ဆေးမှုတွေ ပြုလုပ်သွားပါမယ်" လို့ နီဗာဒါးအားကစားကော်မရှင် ဥက္ကဌ ဘာရက်အိုကာမိုတိုက ESPN သတင်းဌာနကို ပြောကြားသွားခဲ့ပါတယ်။