ချန်ပီယံခါးပတ်ကို ကာကွယ်ရမယ့် အောင်လအန်ဆန်ဟာ နောက်ပိုင်းပွဲစဉ်တွေမှာ သူ့ရဲ့ နာမည်ကျော် ချုပ်ကွက်နဲ့ ပြိုင်ဘက်တွေကို အနိုင်မယူတော့ပဲ အလဲအကွဲထိုးကာ နိုင်ပွဲတွေ ရယူလာတာ ဖြစ်ပါတယ်။ ဒီလိုမျိုး ထိုးသတ်တဲ့ နည်းစနစ် ပြောင်းလဲလာတာက ဘာကြောင်လဲဆိုတာကို အောင်လအန်ဆန်က Duwun Sports နဲ့ သီးသန့်တွေ့ဆုံမှုမှာ အခုလို ပြောခဲ့ပါတယ်။

"မြန်မာပရိသတ်တွေကလည်း Standing Fight (လက်သီး၊ခြေထောက်နဲ့ ထိုးသတ်တာ) ကို ပိုကြိုက်တယ်ဆိုတော့ မြန်မာပရိသတ်အကြိုက်ကို နည်းနည်းအလိုလိုက်ရတာပေါ့" လို့ ပြောကြားခဲ့ပါတယ်။ အောင်လအန်ဆန်ဟာ သူပိုင်နိုင်တဲ့ ဂျူဂျစ်ဆုနပန်းနဲ့ ပြိုင်ဘက်ကို မလှုပ်နိုင်အေင် အပိုင်ချုပ်ပြီး အနိုင်ယူလေ့ရှိပေမယ့် မြန်မာပရိသတ်တွေကတော့ အောင်လအန်ဆန်ကို အလဲအကွဲနဲ့ ထိုးသတ်ပုံကို ပိုမိုပြီး သဘောကျနေတာ ဖြစ်ပါတယ်။

အောင်လအန်ဆန်က သူနဲ့တွေ့ဆုံရမယ့် ပြိုင်ဘက် ခရာကီကို (၃)ချီအတွင်း အလဲထိုးသွားမယ်လို့ ကြိုတင်ပြောကြားထားသူ ဖြစ်ပါတယ်။ ရှေ့ကထိုးသတ်ခဲ့တဲ့ ပွဲစဉ်တွေမှာ အောင်လအန်ဆန်ဟာ သူ ပြောခဲ့တဲ့ အချိန်တွေအတွင်းမှာ ပြိုင်ဘက်ကို အနိုင်ယူခဲ့ပြီး ချန်ပီယံဘွဲ့၊ ခါးပတ်ကာကွယ်ပွဲတွေကို အောင်မြင်ခဲ့သူ ဖြစ်ပါတယ်။ ဒီအတွက် ခရာကီနဲ့ပွဲမှာလည်း အောင်လအန်ဆန် ပြောထားသလို (၃)ချီအတွင်း အလဲထိုးနိုင်မှာလားဆိုတာ စောင့်ကြည့်ရမှာ ဖြစ်ပါတယ်။

၂၀၁၂ ခုနှစ်၊ ဒီဇင်ဘာလမှာ MMA ပရော်ဖက်ရှင်နယ် ကစားသမားဘဝကို စတင်ခဲ့တဲ့ ခရာကီကတော့ Desert Force Middleweight ၊ လိုက်ဟဲဗီးဝိတ် နဲ့ ဖီးနစ်မစ်ဒယ်ဝိတ်တန်းတို့ရဲ့ ချန်ပီယံဘွဲ့ကို ပိုင်ဆိုင်ထားသူ ဖြစ်ပါတယ်။ အရှေ့အလယ်ပိုင်းဒေသမှာတော့ ခရာကီက MMA ရဲ့ စူပါဖိုက်တာတစ်ဦးအဖြစ် ထင်ရှားနေပြီး နာမည်ကျော်ကြားနေခဲ့ပါတယ်။