ONE CHAMPIONSHIP PURSUIT OF GREATNESS ရဲ့ အဓိကပွဲစဉ်တစ်ပွဲထဲမှာ ပါဝင်နေခဲ့တဲ့ ဖိုးသော် (မြန်မာ ) နဲ့ ကီရာနူဆူးဘား (မလေးရှား) တို့ရဲ့ ဖယ်သာဝိတ်တန်းပြိုင်ပွဲကို ဒီနေ့ ယှဉ်ပြိုင်ထိုးသတ်သွားခဲ့ပါတယ်။ ရိုးရာလက်ဝှေ့၊ အာကီဒို နဲ့ ကရာတေး ကိုယ်ခံပညာတွေကို ကျွမ်းကျင်တဲ့ ဖိုးသော် နဲ့ ကိုယ်ခံပညာပေါင်းစုံတတ်ကျွမ်းတဲ့ ဆူးဘားတို့ပွဲက ပရိသတ်တွေ စိတ်အဝင်စားဆုံး ပွဲတစ်ပွဲထဲမှာလည်း ပါဝင်နေခဲ့တာပါ။
ဒီအတွက် ဖိုးသော်ကို မြန်မာပရိသတ်တွေက အားပါးတရ အားပေးခဲ့ကြပြီး စိတ်ဓာတ်ခွန်အားပေးနိုင်ခဲ့ပါတယ်။ အသက်အရွယ်အရ ဖိုးသော် နဲ့ ဆူးဘားတို့ဟာ တော်တော်လေးကွာခြားနေတာလည်း ဖြစ်ပါတယ်။ ဖိုးသော်က (၃၃)နှစ် ရှိပြီဖြစ်ပြီး ဆူးဘားကတော့ အသက် (၂၄)နှစ်အရွယ် တိုက်ခိုက်ရေးသမား ဖြစ်ပါတယ်။
ပထမအချီစစချင်းမှာပဲ ဆူးဘားက တိုက်စစ်ဆင်ထိုးသတ်ခဲ့ပြီး ဖိုးသော်ကို ဖိအားပေးခဲ့ပါတယ်။ ဖိုးသော်ကို ဆူးဘားက အပိုင်ချုပ်ပြီး ပွဲသိမ်းဖို့ ကြိုးစားခဲ့ပါတယ်။ ဖိုးသော်အနေနဲ့ ဆူးဘားရဲ့ ချုပ်ကွက်အောက်က ရုန်းထွက်ဖို့ အစွမ်းကုန်ကြိုးစားအားထုတ်ခဲ့ပေမယ့်လည်း ဆူးဘားက အကောင်းဆုံးပုံစံနဲ့ ပွဲကို ထိန်းချုပ်နိုင်ခဲ့ပါတယ်။
ဒါကြောင့်လည်း ပထမအချီရဲ့ ပွဲချိန် (၂)မိနစ်အကျော်မှာပဲ ဆူးဘားကို ဖိုးသော် အရှုံးပေးခဲ့ရပါတယ်။ ဒါဟာ ဖိုးသော်အတွက် MMA ကစားသမားဘဝမှာ ပထမဆုံးအကြိမ် ရှုံးနိမ့်ခဲ့မှုဖြစ်ပြီး (၇)ပွဲ ထိုးသတ်ခဲ့အပြီးမှာ (၆)ပွဲနိုင် (၁)ပွဲရှုံး ရလာဒ်ကို ပိုင်ဆိုင်သွားခဲ့ပါတယ်။
မြန်မာပရိသတ်တွေကတော့ ဖိုးသော်ရဲ့ မြန်ဆန်လှတဲ့ အရှုံးကြောင့် အံအားသင့်ခဲ့ရပေမယ့် ပွဲအပြီးမှာတေ့ာ ဖိုးသော်ရဲ့ နာမည်ကို အော်ဟစ်ကာ အားပေးသွားခဲ့ကြပါတယ်။