၂၀၁၈ ခုနှစ်အတွက် တစ်နှစ်တာ MMA အကောင်းဆုံး ကစားသမားဆုပေးအပ်ပွဲအခမ်းအနားကို ဒီကနေ့ ညနေပိုင်းက စင်ကာပူနိုင်ငံမှာရှိတဲ့ JW Marriott ဟိုတယ်မှာ ပြုလုပ်ခဲ့ပါတယ်။
ပေးအပ်တဲ့ ဆုတွေကတော့ စုစုပေါင်း ၁၆ ဆုဖြစ်ပြီး တစ်နှစ်တာMMA သူရဲကောင်းဆု၊တစ်နှစ်တာ အကောင်းဆုံး အမျိုးသားဖိုက်တာဆု၊အမျိုး သမီး ဖိုက်တာဆု၊အကောင်းဆုံး မွေထိုင်းဆု၊အကောင်းဆုံး ကစ်ဘောင်ဆင်ဆု၊စံချိန်တင်နိုင်တဲ့ဆု၊အကောင်းဆုံးပွဲဆု၊အကောင်းဆုံး အလဲထိုးပွဲ ဆု၊တစ်နှစ်တာအကောင်းဆုံး ချုပ်ကွက်နဲ့ အနိုင်ယူတဲ့ပွဲ၊ပွဲသိမ်းအမြန်ဆုံးပွဲ၊တစ်နှစ်တာအကောင်းဆုံးပွဲအခမ်းအနား၊တစ်နှစ်တာအကောင်းဆုံး လေ့ကျင့်ရေးခန်းမ၊တစ်နှစ်တာအကောင်းဆုံး ဒိုင်လူကြီး၊နည်းပြဆု၊ကြိုးဝိုင်း ဗန်းကိုင်ဆုနဲ့ အကောင်းဆုံး ဂျာနယ်လစ်ဆုတို့ကို ပေးအပ်သွားတာ ပါ။
Photo - Yahoo! Sports
မြန်မာစပါးအုံး အောင်လအန်ဆန်ကတော့ စုစုပေါင်း ဆု ၁၆ ဆုစာရင်းကနေ ၅ ဆုမှာ ဆန်ကာတင် စာရင်းပါဝင်ခဲ့ပြီး ပထမဆုံး ရရှိတဲ့ ဆုကတော့ တစ်နှစ်တာအကောင်းဆုံးပွဲဆု ဖြစ်ပါတယ်။
ဒီပွဲကိုတော့ ကမ်ဟာဆီဂါဝါကို အနိုင်ယူခဲ့တဲ့ ပွဲဖြစ်ပြီး ဒီပွဲကလည်း ပရိသတ်တွေအားလုံး သိထားတဲ့အတိုင်း သူဖူးကိုယ်ရောင် ၅ ချီပြည့် ထိုးသတ်ပြီး ပရိသတ်အကြိုက် ပွဲကောင်းတစ်ပွဲ ဖြစ်ခဲ့တာပါ။
အဲ့နောက် အောင်လအန်ဆန်အနေနဲ့ တစ်နှစ်တာ အကောင်းဆုံး အမျိုးသား တိုက်ခိုက်ရေး သမားဆုကို ထပ်မံ ဆွတ်ခူးခဲ့ပြန်ပါသေးတယ်။ ဒီဆုကို ဆွတ်ခူးရခြင်းကလည်း အောင်လအန်ဆန်အနေနဲ့ ၂၀၁၈ ခုနှစ်ထဲမှာ လိုက်ဟဲဗီးဝိတ်ရွှေခါးပတ်ကို ရရှိခဲ့သလို မစ်ဒယ်ဝိတ်ခါးပတ်ကိုလည်း ၂ ကြိမ်ကာကွယ်နိုင်ခဲ့တာကြောင့် ဖြစ်ပါတယ်။
အောင်လအန်ဆန်ကတော့ လာမယ့် နိုဝင်ဘာလကုန်မှာ မြန်မာနိုင်ငံကို ပြန်လည်ရောက်ရှိလာဦးမှာ ဖြစ်ပြီး လူမှုရေး လုပ်ငန်းအချို့နဲ့ သင်တန်း အချို့ဖွင့်လှစ်မယ်လို့ သိရပါတယ်။
အဲ့နောက် လိုက်ဟဲဗီးဝိတ်ခါးပတ်ကို ဂျပန်နိုင်ငံမှာ လာမယ့် မတ်လအတွင်း ကာကွယ်ဖို့ ရှိနေတယ်လို့လည်း သတင်းတွေ ထွက်ပေါ်နေပါတယ်။