မိတ်ကပ်အကြောင်း ရေးထားတဲ့ ဝက်ဘ်ဆိုက်တွေမှာဆို မျက်လုံးလေး ပိုကြီးသွားအောင် ဘယ်လိုလိမ်းမလဲဆိုတာတွေပဲ ဖတ်နေရတယ်။ မျက်လုံးပြူးပြုးလေး ဖြစ်နေလို့ ကျဉ်းသွားအောင် ဘယ်လိုလိမ်းရမလဲလို့ လာလာမေးကြတဲ့ မဒီလေးတွေအတွက် ဒါလေးကို ရေးပေးလိုက်တာပါနော်။
၁။ မျက်ခုံးမွေး
မျက်ခုံးမွေးကို ဂရုစိုက်ပါ။ ပုံသွင်းပေးဖို့လိုပါတယ်။ နှုတ်တာ၊ ရိတ်တာ၊ ညှပ်တာ ကြိုက်တဲ့နည်းကိုသုံးပြီး ပုံသွင်းထားပါ။ မျက်ခုံးမွေးလေးလည်း ထင်ပေါ်နေအောင်ဆွဲပေးရမယ်။ ဒီလိုဆို မျက်လုံးပြူးတာထက် မျက်ခုံးလှတာကိုပဲ ကြည့်တဲ့သူက စိတ်စွဲမြင်ယောင်လာမှာလေ။
၂။ မျက်လုံးကျဉ်းအောင်
တကယ့်အသက်... အရေးအကြီးဆုံးအပိုင်းကတော့ လိုင်နာ၊ ကာဂျယ်ပဲ။ မျက်လုံးအိမ်လေး ကျယ်ချင်ရင် အရောင်လင်းတဲ့ အဖြူ/အပြာရောင်ကို ခြယ်ရတယ်ဟုတ်။ ပြောင်းပြန်အနေနဲ့တော့ မျက်လုံးကျဉ်းအောင်ဆိုရင် အတွင်းပိုင်းကို အနက်ရောင်ခြယ်ပေးလိုက်ပါ။
၃။ အိုင်းရှဲဒိုး
အိုင်းရှဲဒိုးကိုလည်း အရောင်ရင့်တာ၊ မှိုင်းတာ သုံးပေးရပါတယ်။ အညိုရင့်ရင့်အိုင်းရှဲဒိုးကိုတော့ မျက်ခွံအပြင်ထောင့်စွန်းကို ခြယ်ပေးပါ။ အတွင်းဘက်အရောင်နဲ့ blend လုပ်ပေးရပါမယ်။ အလင်းပြန်တာနည်းတဲ့ အိုင်းရှဲဒိုးမျိုးကို ဆိုးခြင်းက မျက်ခွံပိုကြီးသွားသလို ထင်ရစေပါတယ်။
၄။ Cat Eye
မျက်လုံးထောင့်စွန်းမှာ အိုင်းလိုင်နာလေးနဲ့ အစွယ်လေးထုတ်လိုက်ပါ။ ကိုယ့်ရဲ့မျက်လုံးက အယ်လ်မွန်စေ့လို ရှည်ရှည်လေးဖြစ်သွားမယ့် အစွယ်လေးတော့ ဖြစ်ပါစေ။ ညဘက်လိမ်းမယ်ဆိုရင်တော့ အိုင်းလိုင်နာကို ထူထူဆွဲပစ်လိုက်ပါနော်။
၅။ အောက်မျက်တောင်
မျက်တောင်ကော့ဆေးသုံးရင် အပေါ်မျက်တောင်ကိုသာမက အောက်ကမျက်တောင်တွေကိုလည်း ဆိုးပေးပါ။ မျက်လုံးပြူးတာကို သေးသလိုဖြစ်အောင် ညှိပေးလိုက်ရာရောက်သွားပါတယ်။
Source : Beautiful