ခုတလော ရာသီဥတုအပြောင်းအလဲကလည်း မြန်ဆန်နေပါတယ်နော်။ နေပူပြီဆိုရင်လည်း အရမ်းပူလွန်းလို့ အပြင်ထွက်ပြီဆိုရင် ထီးဆောင်းတာတို့၊ အင်္ကျ ီလက်ရှည်ဝတ်တာတို့ လုပ်ပေးနေရပါတယ်။ အိုဇုန်းလွှာ အပေါက်အပြဲကြားက ခရမ်းလွန်ရောင်ခြည် ပါဝင်မှုများပြားတဲ့ နေရောင်ခြည်ဟာ ကျွန်တော်တို့ခန္ဓာကိုယ် အရေပြားပေါ်မှာ နေလောင်ဒဏ်ကိုဖြစ်စေနိုင်ပါတယ်။
အရေပြားနေလောင်တာက ရေနွေးပူလောင်သလိုပဲ ခံရခက်တဲ့ ဝေဒနာတစ်မျိုးဖြစ်ပါတယ်။ နေလောင်ဒဏ်ကို ကာကွယ်ကုသနိုင်တဲ့ နည်းလမ်းလေးတွေကတော့...
၁။ အေးအောင် ပြန်လုပ်ပေးပါ
နေလောင်ဒဏ်ကို သက်သာပျောက်ကင်းစေဖို့ အခြေခံအကျဆုံးနဲ့ အလွယ်ကူဆုံးအချက်ကတော့ နေလောင်တဲ့နေရာကို ပြန်အေးသွားအောင်လုပ်တာပါပဲ။ ဒီလိုလုပ်ဖို့အတွက် နေလောင်ထားတဲ့နေရာကို ရေနဲ့ပြန်ဆေးပေးတာတို့၊ ရေခဲပြန်ကပ်ပေးတာတို့ လုပ်ပေးရမှာပါ။
၂။ မုန့်ဖုတ်ဆိုဒါနဲ့ အုတ်ဂျုံမှုန့်
ရေအေးအပြည့်ထည့်ထားတဲ့ ရေချိုးကန်တစ်လုံးထဲမှာ မုန့်ဖုတ်ဆိုဒါအနည်းငယ်ကိုထည့်ပြီး နေလောင်ဒဏ် သက်သာစေဖို့ (၁၅) မိနစ်၊ မိနစ် (၂၀) ခန့် စိမ်ပေးလိုက်ပါ။ နေလောင်ဒဏ်ကြောင့် အရေပြားယားယံခြင်းကို ကုသဖို့နဲ့ အရေပြားအစိုဓာတ်ကို ပြန်လည်ထိန်းသိမ်းဖို့ အုတ်ဂျုံမှုန့်တစ်ခွက်လောက်လည်း ထည့်ပေးလိုက်ပါဦး။ သတိထားရမှာ တစ်ခုက ဒီရေထဲမှာစိမ်ပြီးရင် အရေပြားကို ပြန်မပွတ်ဖို့ပါပဲ။
၃။ ရှားစောင်းလက်ပတ်
ရှားစောင်းလက်ပတ်ပင်မှာ ဒဏ်ရာပျောက်ကင်းစေနိုင်တဲ့ ဂုဏ်သတ္တိပါဝင်တဲ့အတွက် ရှားစောင်းလက်ပတ် အပင်နဲ့ပဲဖြစ်ဖြစ်၊ ရယ်ဒီမိတ် ရှားစောင်းလက်ပတ်အနှစ်နဲ့ပဲဖြစ်ဖြစ် လိမ်းပေးလိုက်ရင် နေလောင်ဒဏ်ကို ပျောက်ကင်းစေနိုင်ပါတယ်။ ဘာနဲ့မှရောစရာမလိုဘဲ ရှားစောင်းလက်ပတ်အနှစ်နဲ့ ပွတ်ပေးလိုက်ရုံပါပဲ။
၄။ ရှာလကာရည်
နေလောင်ဒဏ်ကို ကုသဖို့အတွက် ရှာလကာရည်ကို သုံးနည်းလေးကတော့ ရေချိုးကန်ထဲမှာ ရေအေးထည့်ပြီး အပေါ်က ရှာလကာရည် (၂) ခွက်လောက် ရောပြီး စိမ်ပေးလိုက်တာနဲ့ နေလောင်ဒဏ်ကို သက်သာစေတယ်လို့ ဆိုပါတယ်။ ဒါပေမယ့် တစ်ခုရှိတာက အရမ်းဆိုးဝါးတဲ့ နေလောင်ဒဏ်ကိုတော့ မရပါဘူး။ သေးငယ်တဲ့ နေလောင်ဒဏ် အကွက်လေးတွေကိုတော့ သက်သာပျောက်ကင်းစေနိုင်ပါတယ်။
၅။ ရေများများပြန်သောက်ပေးပါ
နေရောင်ခြည်ကြောင့် ထိခိုက်မိတဲ့ အရေပြားဆဲလ်တွေကို ပြန်လည်ကုသရာမှာ ခန္ဓာကိုယ်မှာ ရေဓာတ်ပြည့်ဝ နေဖို့လည်း လိုပါတယ်။ တစ်နေ့ကို အနည်းဆုံး ရေ (၈) ခွက်လောက် ပုံမှန်သောက်ပေးသင့်တဲ့အတွက် နေလောင်ဒဏ်ကြောင့် ဝေဒနာခံစားနေရချိန်မှာ အဲဒီပမာဏထက် ပိုသောက်ပေးသင့်ပါတယ်။
Source: healthline
Share