ချစ်သူတွေတိုင်းအတွက် ရင်ခုန်စရာကောင်းတဲ့ Valentine's Day ရောက်လာတော့မယ်နော်။ ချစ်သူနဲ့တွေ့ဖို့အတွက် စီစဉ်ထားတဲ့ မဒီလေးတွေ ရှိတယ်မဟုတ်လား။ အဲ့ဒီနေ့မှာ အလှဆုံးဖြစ်နေချင်ရင်တော့ ဒါလေးတွေ လုပ်လိုက်နော်။
၁။ ဆံပင်စတိုင်လ်
ဆံပင်အဖြောင့်ထက်စာရင် ဆံပင်ကောက်ကောက်လေးတွေက ပိုပြီးရင်ခုန်စရာကောင်းတယ် သိလား။ တစ်ခေါင်းလုံးကောက်ဖို့ ပြောတာမဟုတ်ဘူးနော်။ အပူချောင်းလေးနဲ့ ယာယီအကောက်လေးပဲဖြစ်အောင် လုပ်ထားလိုက်ဖို့ပါပဲ။ အကောက်ပြေပြေလေးရအောင် အပူချောင်းနဲ့လိပ်ပြီးရင် လက်လေးနဲ့ဖွပေးပါ။ ဘီးနဲ့မဖြီးလိုက်ပါနဲ့။
၂။ ဆွဲဆောင်မှုရှိတဲ့နှုတ်ခမ်း
နှုတ်ခမ်းနီမဆိုးခင် Lip primer လေး ခံပြီးဆိုး၊ ဒါမှမဟုတ် မိတ်ကပ်ဖောင်ဒေးရှင်း လိမ်းပြီးတော့မှ နှုတ်ခမ်းနီဆိုးပါ။ အရောင်ထွက်ပိုလှတယ်။ ကြာကြာလည်းခံတယ်။ နမ်းရင်လည်း မပျက်အောင်လို့ပေါ့။ နှုတ်ခမ်းနီတစ်ထပ်ဆိုးပြီးရင် တစ်ရှုးလေးနဲ့ဖိကပ်လိုက်၊ ပြီးတော့ နောက်တစ်ထပ် ထပ်ဆိုးရင် နှုတ်ခမ်းလေးက ဖူးဖူးလေးဖြစ်ပြီး အရောင်လည်း ပိုပေါ်တယ်။
၃။ လက်သည်းခြေသည်း
မိတ်ကပ်တွေဘယ်လောက်လိမ်းလိမ်း လက်သည်း၊ခြေသည်းတွေက မလှမပဖြစ်နေရင် အကြီးကြီးဂွမ်းမှာနော်။ တစ်ရက်အလိုတည်းက လက်သည်း၊ ခြေသည်းတွေကို သန့်ရှင်းထားပြီး အရောင်ဆိုးထားပေါ့။ အရောင်မဆိုးချင်ဘူး ဆိုရင်တောင် လက်သည်း၊ ခြေသည်းမှာ ကြေး (ဂျီး)တွေ မရှိအောင် သန့်ရှင်းထား။ မညီတာတွေလည်း ညီအောင် ညှိထားဖို့လိုတယ်။
၄။ အရေးကြီးဆုံးတစ်ခု
အဲ့တာကတော့ ရနံ့ပဲ။ ခန္ဓာကိုယ်က မွှေးရနံ့လေးကြောင့် ကိုယ့်အနားက မခွာနိုင် ဖြစ်နေတော့မှာ။ တစ်ခု သတိပေးချင်တာက အနံ့တွေ အများကြီး ရောမနေစေဖို့ပါပဲ။ ခေါင်းက အနံ့တစ်မျိုး၊ body lotion က အနံ့တစ်မျိုး၊ ရေမွှေးပါ ထပ်ဆွတ်လိုက်တော့ အနံ့တွေ ရောပြီး မူးသွားဦးမယ်။ ကိုယ့်ခန္ဓာကိုယ်က အနံ့ဆိုးတွေ မထွက်ဖို့က ပထမ၊ ဒုတိယကမှ အနံ့လေးသင်းပျံ့နေအောင် လုပ်ရမှာနော်။