တင်းတိပ်တွေပျောက်အောင် သောက်ဆေး၊ လိမ်းဆေးတွေ အမျိုးမျိုးနဲ့ ကုသကြသလို လေဆာနဲ့လည်း ပျောက်အောင် ပြုလုပ်ကြပါတယ်။ တင်းတိပ်တွေပျောက်စေမယ့် အိမ်သုံးနည်းလမ်းတွေတော့ ရှိပါတယ်။ သဘာဝနည်းတွေမို့လို့ ဘေးထွက်ဆိုးကျိုးလည်း မရှိသလောက်ပါပဲ။ စိတ်ရှည်ရှည်နဲ့ ပုံမှန်သာ ပြုလုပ်ပေးမယ်ဆိုရင် ဒီနည်းတွေက တင်းတိပ်တွေကို တဖြည်းဖြည်းနဲ့ အရောင်ဖျော့ကာ ပျောက်ကွယ်သွားစေပါလိမ့်မယ်။

ပန်းသီးဗီနီဂါ (apple cider vinegar) ကို အသုံးပြုတဲ့နည်းလမ်းက အတော်ကို ထိရောက်ပါတယ်။ ပန်းသီးအရက်ရှာလကာရည်ကို သောက်သုံးခြင်းဟာ ယနေ့ခေတ်မှာ အတော်ရေပန်းစားနေပါတယ်။ တင်းတိပ်အတွက် အသုံးပြုလို့လည်း ရပါတယ်။ ရေနဲ့ဆတူရောပြီး ဂွမ်းလေးမှာဆွတ်ကာ တင်းတိပ်နေရာတွေကို ပုံမှန်လေး လိမ်းပေးထားရုံပါပဲ။ နေပူထဲထွက်တဲ့အခါ ထီးဆောင်းဖို့နဲ့ ညမအိပ်မီ မျက်နှာကို သေသေချာချာ သန့်စင်ဖို့လည်း လိုအပ်ပါတယ်။ မျက်နှာသစ်ပြီးတိုင်း ပန်းသီးဗီနီဂါကို သုတ်လိမ်းပေးထားမယ်ဆို တစ်လအတွင်း ထူးခြားလာတာ တွေ့ရမှာဖြစ်ပါတယ်။