လစဉ် ဓမ္မတာစီးဆင်းမှုဟာ အမျိုးသမီးတစ်ဦးရဲ့ သဘာဝကဏ္ဍတစ်ရပ်ပါ။ ဒါပေမဲ့လည်း အဲ့ဒီ သဘာဝကိစ္စကိုပဲ အမျိုးသမီးထုရဲ့ တစ်ဝက်ကျော်က ရှက်ရွံ့နေဆဲဖြစ်တယ်လို့ စစ်တမ်းကောက်ယူမှုတစ်ခုက ထုတ်ပြန်ပါတယ်။
အမျိုးသမီးတစ်ကိုယ်ရည်သုံးပစ္စည်းထုတ်လုပ်တဲ့ Thinx ကုမ္မဏီက ဒီသဘောထားကောက်ယူမှု စစ်တမ်းကို မေးမြန်းခဲ့တာ ဖြစ်ပါတယ်။ ရလဒ်အရ အမျိုးသမီး ၅၈ % ဟာ ရာသီလာနေချိန်မှာ ရှက်ရွံ့မှုကို ခံစားရတယ်လို့ သိရတယ်။ သုတေသီတွေဟာ အမေရိကမှာရှိတဲ့ အမျိုးသမီး ၁၅၀၀ နဲ့ အမျိုးသား ၅၀၀ ကို ရာသီလာချိန်နဲ့ပတ်သက်တဲ့ ထင်မြင်ချက်အပေါ် လေ့လာစူးစမ်းခဲ့ကြတာပါ။
ဖြေကြားခဲ့တဲ့ အမျိုးသမီးတွေထဲက ၄၂%ဟာ ရာသီလာချိန်မှာ အမျိုးသားမိတ်ဆွေတွေရဲ့ မှတ်ချက်ပေးမှုတွေကြောင့် ရှက်ရွံ့မှုကို ခံစားခဲ့ရတာကို တွေ့ရတယ်။ နောက်ထပ် အမျိုးသမီး ၁၂% ကတော့ မိသားစုဝင်တွေနဲ့ အတန်းဖော်တွေကြောင့် ရှက်ရွံ့မှုကို ခံစားခဲ့ရကြောင်း ဆိုကြတယ်။ စစ်တမ်းကောက်ယူမှုမှာ ပါဝင်ဖြေကြားခဲ့တဲ့ အမျိုးသား ၄၄% ကလည်း သူတို့ရဲ့ချစ်သူ ရာသီလာနေချိန် ဖြစ်ပေါ်နေတဲ့ စိတ်ခံစားချက်အပေါ် ဟာသလုပ် ပြောဆိုခဲ့မိကြောင်း ဝန်ခံကြတယ်။ ဒီအခြေအနေဟာ လုပ်ငန်းခွင်ထဲမှာဆိုရင် ပိုလို့တောင် ဆိုးပါသေးတယ်။ အမျိုးသား ၅၁% ဟာ အမျိုးသမီးတွေအနေနဲ့ သူတို့ရဲ့ ဓမ္မတာကိစ္စကို လုပ်ငန်းခွင်ထဲမှာ ပြောကြားခြင်းက မသင့်တော်တဲ့ကိစ္စလို့ ယုံကြည်ကြတယ်။
ရာသီလာချိန် ရှက်ရွံ့မှုဟာ အမျိုးသမီးအများစု ခံစားရလေ့ရှိပါတယ်။ ပထမဆုံးအကြိမ် ရာသီလာတဲ့ မြီးကောင်ပေါက်အရွယ်မှာတင် စတင်ခံစားကြရတာပါ။ ကိုယ့်ကိုယ်ကိုယ်မုန်းတီးတဲ့ ခံစားချက်တွေနဲ့ ပတ်ဝန်းကျင်ကြောင့် အရှက်ရသလို ခံစားနေကြရတယ်။ ခန္ဓာကိုယ်ကို မသန့်ရှင်းဘူးလို့လည်း ခံစားနေကြရပြီး ဒါကို ထုတ်ပြောရမှာတောင် ရှက်နေကြပါတယ်။
ဓမ္မတာစီးဆင်းခြင်းဟာ အမျိုးသမီး သဘာဝအရ ဖြစ်ပေါ်နေတဲ့ ကိစ္စဖြစ်ပြီး မျိုးပွားဖို့နဲ့ သန္ဓေတည်ဖို့အတွက် အရေးပါတဲ့ ကိစ္စရပ်တစ်ခုလည်း ဖြစ်တာကြောင့် ရှက်ရွံ့နေဖို့ မလိုပါဘူး။ ခန္ဓာကိုယ်က အညစ်အကြေးတွေလည်း မဟုတ်တဲ့အတွက် ကိုယ့်ကိုယ်ကိုယ် အရှက်ရနေဖို့ မလိုဘူးလို့ မဒီက တိုက်တွန်းချင်ပါတယ်။
Source : Mail Online