ကလေးလေးကို ကိုယ်ဝန်ဆောင်နေချိန်မှာ ချဉ်ခြင်းတပ်တယ်ခေါင်းစဉ်တပ်ပြီး ခင်ပွန်းသည်ကို ကိုယ်စားချင်တာလေးတွေ ဂျီကျလို့ရပါတယ်။ နောက်ပြီး ကလေးလေး အာဟာရပြည့်နေစေဖို့အတွက် ကိုယ်ပါ နှစ်ယောက်စာ စားပေးရပါတယ်။ နို့ချိုတိုက်ကျွေးနေဆဲ ကာလတွေမှာ ဒါတွေကိုဆက်လုပ်နေရဦးမှာဖြစ်ပေမယ့် နောက်ပိုင်းကျရင်တော့ ချဉ်ခြင်းတက်တယ်ပြောပြီး ပူဆာရတာလေးတွေ၊ နှစ်ယောက်စာ တဝ စားခဲ့ရတာလေးတွေကို သင်လွမ်းနေဦးမှာပါ။

ကိုယ်ဝန်ဆောင်နေချိန်မှာ ဆံပင်နဲ့လက်သည်းတွေကအရှည်အရမ်းမြန်ပါတယ်။ တချို့ကိုယ်ဝန်ဆောင်မိခင်လေးတွေဆို ပိုးသားလေးလိုပျော့ပျောင်းနူးညံ့တဲ့ဆံကေသာနဲ့ တောက်ပတဲ့အသားအရေလေးကိုတောင် ပိုင်ဆိုင်နိုင်ကြပါတယ်။ ကလေးမွေးပြီးချိန် ဟော်မုန်းအပြောင်းအလဲကြောင့် ဆံပင်တွေကျွတ်၊ ဝက်ခြံတွေထွက်လာချိန်မှာတော့ ကိုယ်ဝန်ဆောင်ချိန်တုံးက ဆံနွယ်ပျော့ပျော့ခွေခွေလေးကို လွမ်းလာမှာပါ။

ဘာပဲပြောပြော ကိုယ်ဝန်သည်ဆိုတာ လူ့အဖွဲ့အစည်းထဲမှာတော့ VIP ပါပဲ။ အရင်ကတစ်ခါမှမတွေ့ဖူးတဲ့ သူစိမ်းတွေတောင် ကိုယ်ဝန်ဆောင်မိခင်ဆိုရင် အလေးပေးပြီး ဂရုစိုက်ကြပါတယ်။ စားသောက်ဆိုင်တစ်ဆိုင်ကို သွားရင် သူစိမ်းတွေက တံခါးကိုဖွင့်ပြီးကိုင်ထားပေးတာတို့၊ ဘတ်စ်ကားပေါ်မှာ သင်တက်လာပြီဆိုရင် ထိုင်ခုံနေရာဖယ်ပေးတာတို့က ကိုယ်ဝန်ဆောင်နေချိန်မှာ လူ့အဖွဲ့အစည်းက ပြန်ပြီးစောင့်ရှောက်ပေးတာပါပဲ။ ကလေးမွေးပြီးရင် အဲဒီလို VIP ခံစားချက်တွေကို သင်ပြန်လွမ်းလာမှာပါ။

သာမန်အချိန်မှာ ကိုယ်အလေးချိန်နည်းနည်းတက်လာရင် သေအောင်စိတ်ဆင်းရဲပြီး အစားတွေဘာတွေရှောင်၊ GYM တွေဘာတွေပြန်ဆော့ပြီး ဝိတ်ပြန်ထိန်းရပေမယ့် ကိုယ်ဝန်ဆောင်မိခင်ဘဝမှာတော့ ဗိုက်ကလေး ပိုပိုပူလာပြီး ပြည့်ပြည့်လေးဖြစ်နေတာကိုက စိတ်ချမ်းသာစရာပါ။ ခင်ပွန်းသည်ကအစ ကိုယ်ဝန်ဆောင်မိခင်ပိန်နေရင် အာဟာရများပြတ်နေလို့လားဆိုပြီး စိုးရိမ်တကြီးဖြစ်ကြပါတယ်။ ကိုယ်ဝန်ဆောင်မိခင် တော်တော်များများကလည်း သူတို့ဘဝမှာ ကိုယ်ဝန်ဆောင်နေတဲ့အချိန်လောက် သူတို့ကိုယ်သူတို့ ယုံကြည်မှုရှိတာမရှိတော့ဘူးလို့ ဆိုပါတယ်။ ကလေးမွေးပြီးရင်တော့ အဲဒီအချိန်တွေကို သင်ပြန်လွမ်းလာပါလိမ့်မယ်။

Source: Lifeasmama