လူတစ်ယောက်အကြောင်း သိချင်ရင် ခရီးအတူတူ သွားကြည့်ပါတဲ့။ ခရီးသွားတဲ့အခါ သူနဲ့ကိုယ် ဘယ်လောက် အတွဲညီလဲ၊ သည်းခံနိုင်စွမ်းတွေ ရှိသလဲဆိုတာ သိလာရတယ်။ ပြီးတော့ နှစ်ယောက်ကြားမှာ ပျော်စရာတွေ ထပ်ပြီးများလာရတယ်လေ။ တကယ်ချစ်ရတဲ့လူတစ်ယောက်ကို ပိုင်ဆိုင်ထားရပြီဆိုရင်တော့ သူနဲ့အတူတူ ဒီခရီးလေးတွေ သွားဖြစ်အောင်သွားနော်။
၁။ ခြေလျှင်ခရီး
တောင်တက်ရတဲ့ခရီးမျိုးတွေပေါ့။ ခုဆို ပြည်တွင်းမှာလည်း တောင်တက်ခရီးစဉ်တွေ ရှိနေပြီလေ။ ပင်ပန်းလာတဲ့အခါ ချစ်သူလက်ကို တကယ်ပဲ ဆွဲထားနိုင်ပါ့မလား၊ ဖေးမပါ့မလားဆိုတာ လက်တွေ့သိရမယ့်ခရီးဆိုတော့ သွားကိုသွားသင့်တာပေါ့။
၂။ မိသားစုခရီးစဉ်
ပိတ်ရက်ရှည်မှာ မိသားစုနဲ့အတူသွားတဲ့ ခရီးကိုလည်း သူ့ကို ခေါ်သွားလိုက်ပါဦး။ နောင်တစ်ချိန် အတူတူနေတဲ့အခါ သူနဲ့ ကိုယ့်မိဘအသိုင်းအဝိုင်း အဆင်ပြေ၊ မပြေ သိရမယ်။ သူတို့တွေအချင်းချင်း ပိုရင်းနှီးကျွမ်းဝင်သွားရာလည်းရောက်တယ်။ ဆွေမျိုးတွေဆီ အလည်ခေါ်သွားတာမျိုးလည်း လုပ်ကြည့်ပါ။ နယ်ဝေးကဆွေမျိုးတွေနဲ့လည်း အဆင်ပြေ၊ ကိုယ်တွေလည်း ခရီးထွက်ဖြစ်သွားရအောင်လေ။
၃။ ကမ်းခြေမှာ အေးအေးလူလူ အနားယူမယ်
ကမ်းခြေသွားတယ်ဆိုရင် တကယ့်ကို စိတ်အေးလက်အေး အနားယူဖို့အတွက်ပဲ သွားကြတယ်။ တစ်ညအိပ်ရုံလောက်နဲ့တော့ ပင်လယ်ကြီးကိုကြည့်ပြီးပြန်ရတာ နှမျောစရာကြီးလေ။ သောကာတွေ ပူပန်မှုတွေ လျော့သွားအောင် ၃ ရက်လောက်တော့ အေးအေးလူလူ အနားယူကြတာပေါ့။ ဒီလိုခရီးမျိုးလည်း သူနဲ့အတူသွားသင့်တယ်။ ဒါမှ အချစ်စိတ်တွေ ပိုတိုးလာကြမှာနော်။
၄။ ဘာသာစကားမတူတဲ့နေရာတစ်ခုခု
ပြည်တွင်းမှာလည်း ဒီလိုနေရာတွေ ရှိတယ်လေ။ နိုင်ငံခြားသွားမှရယ် မဟုတ်ဘူး။ တိုင်းရင်းသားနယ်မြေတွေဆီသွားပြီး သူတို့ရဲ့ ယဉ်ကျေးမှုတွေ ဓလေ့တွေ ဒေသအကြောင်းတွေကို လေ့လာရတာလည်း ချစ်သူနဲ့ကိုယ့်ရဲ့ ပူးပေါင်းလုပ်ဆောင်မှုကို စိန်ခေါ်ရာရောက်တယ်။ ဘာသာစကားမတူတဲ့လူတွေကို ဆက်သွယ်ဖို့ ဘယ်လိုနည်းတွေသုံးကြမလဲ?