အသားဓာတ်လို့ ပြောရာမှာ အသားအတုံးကြီးစားမှ အသားဓာတ်ရတာမဟုတ်ပါဘူး။

အာဟာရပြည့်ပြည့်၀၀ရအောင် စားသောက်နေထိုင်ဖို့ဆိုတာ ဈေးကြီးတဲ့အစားအစာတွေ ဝယ်စားမှ မဟုတ်ပါဘူး။

Photo: Twitter

အခြေခံလူတန်းစားအများစုရှိတဲ့ မြန်မာနိုင်ငံမှာ လူတိုင်းက ဈေးကြီးတဲ့အားဆေးတွေ၊ အသားငါးတွေ ဝယ်စားဖို့ မလွယ်ကူပါဘူးး။ ဒါကြောင့် ဈေးဖိုးအနည်းငယ်လေးသုံးပြီး အာဟာရပြည့်ပြည့်၀၀ရရှိအောင် ချက်ပြုတ်စားသောက်တတ်ကြဖို့ အရေးကြီးပါတယ်။ Duwun Lifestyle Food ကဏ္ဍမှာ အာဟာရအထူးကုဆရာဝန်ဒေါက်တာညီညီကျော်မှ စရိတ်အနည်းငယ်နဲ့ အာဟာရပြည့်ပြည့်၀၀အောင် ဘယ်လိုအရာတွေစားသောက်ကြမလဲဆိုတာတွေကို ဝေမျှအကြံပြုသွားမှာဖြစ်ပါတယ်။

Photo: Live Science

အသားတုံးကြီးစားမှ အာဟာရပြည့်ဝမှာလား

အစားအသောက်စားတဲ့အခါမှာ အသားဓာတ်ကတော့ ပါအောင်စားဖို့ လိုအပ်ပါတယ်။ အသားဓာတ်လို့ ပြောရာမှာ အသားအတုံးကြီးစားမှ အသားဓာတ်ရတာမဟုတ်ပါဘူး။ 

 ကြက်သား၊ ငါး၊ ပုဇွန်၊ ဝက်သား၊ အမဲသား၊ ဆိတ်သားတွေကတော့ ပရိုတင်းဓာတ်ရရှိစေပါတယ်။ ဒါပေမယ့် ဒါတွေသည် ဈေးနည်းနည်းကြီးပါတယ်။ ဒါကြောင့်အခြေခံလူတန်းစားတွေအနေနဲ့ ဒါကိုစားဖို့ အမြဲတမ်းမတတ်နိုင်ပါဘူး။ နေ့တိုင်းအသားဟင်းချက်ဖို့က သိပ်တော့ မလွယ်ကူလှပါဘူး။ ဒါဆို အသားအစား ဘာတွေ စားကြမလဲဆိုတာ စဉ်းစားကြည့်ရအောင်ပါ။

ကြက်ဥ - ကြက်ဥဟာ အလွန်ကောင်းမွန်တဲ့အသားဓာတ်တစ်မျိုးဖြစ်ပါတယ်။ အထူးသဖြင့် ကြက်ဥအကာသည် ပရိုတင်းဓာတ်တွေထဲမှာ ဈေးသာနည်းပေမယ့် တော်တော်အဆင့်မြင့်တဲ့အသားဓာတ်တစ်ခုပဲ ဖြစ်ပါတယ်။ ဒါကြောင့် ကြက်ဥစားလို့ရနိုင်ပါတယ်။

ပဲမျိုးစုံ- ကြက်ဥစားလို့ ငြီးငွေ့လာတယ်ဆိုရင် တို့ဖူး၊ ပဲပြား၊ ပဲမျိုးစုံစားလု့ိရပါတယ်။ မြန်မာနိုင်ငံ ပဲမျိုးစုံရရှိတဲ့ ဒေသတစ်ခုဖြစ်ပြီး ဈေးလဲသက်သာပါတယ်။ ပဲမျိုးစုံထဲမှာ ပဲနီလေး၊ ပဲဝါလေး၊ ကုလားပဲ၊ ပဲစင်းငုံ၊ စားတော်ပဲ ကြိုက်တာစားလို့ရနိုင်ပါတယ်။ ဒါကြောင့် ပဲပြုတ်လေး၊ ထမင်းလေးနဲ့ ဆီနဲ့နယ်ပြီးစားရင်တောင်မှ တော်တော်အာဟာရဖြစ်နေပြီလို့ ယူဆလို့ရပါတယ်။ ဒါကြောင့်မို့ အသားဟင်းတွေစားနိုင်ရင်စားပါ။ တကယ်လို့ မစားနိုင်ရင်လည်း ပြဿနာမရှိပါဘူး။ ကြက်ဥတို့ ပဲမျိုးစုံ၊ အသီးအရွက်စုံ စားလို့ရပါတယ်။ ပဲ(၃၀၀) ဂရမ်ကို ငွေကျပ် (၇၀၀) (၈၀၀) ခန့်နဲ့ ဝယ်လို့ရနိုင်ပြီး မိသားစုထမင်းဝိုင်းလေးအတွက် (၂)နပ်စာလုံလုံလောက်လောက် ချက်ပြုတ်နိုင်ပါတယ်။

ဒါကြောင့်မို့ အသားဟင်းချက်မှ ပရိုတင်းဓာတ်ရမယ်။ အသားမစားနိုင်လို့ အာဟာရချို့တဲ့တယ်လို့ ထင်စရာမလိုပါဘူး။ မြေပဲရှိရင်တောင် မြေပဲလေးနဲ့ထမင်းကိုဆီဆမ်းစားတာ၊ ဆီလေးနဲ့ ပဲဟင်းလေးချက်စားတာ ဒါမျိုးတွေ အများကြီးလုပ်လို့ရပါတယ်။ ဒါကတော့ အသားဓာတ်ရရှိစေဖို့ နည်းလမ်းပါ။

Photo: Sify

ပဲမှာရနိုင်တဲ့ ပရိုတင်းဓာတ်များ

အသားနဲ့ ကြက်ဥတို့မှာတော့ ပရိုတင်းအသားဓာတ်စုံလင်အောင် ပါရှိပြီး ပဲကတော့ တစ်ချို့သော အသားဓာတ်တွေ အနည်းငယ်ချို့တဲ့နေတတ်ပါတယ်။ ဒါပေမယ့် ပြဿနာမရှိပါဘူး။ ထမင်းမှာလည်း ပရိုတင်းဓာတ်အနည်းငယ်ပါဝင်ပါတယ်။ ဒါကြောင့် ထမင်းနဲ့ပဲကို စားမယ်ဆိုရင် ထမင်းမှာပါဝင်တဲ့ပရိုတင်းဓာတ်၊ အရွက်ကြော်တစ်ခုခုနဲ့ တွဲဖက်စားတယ်ဆိုရင် အရွက်ကြော်ကရတဲ့ ပရိုတင်းအချို့ရယ် ပေါင်းလိုက်တဲ့အခါမှာ အာဟာရပြည့်ပြည့်၀၀ရရှိစေနိုင်မှာဖြစ်ပါတယ်။ ဒီလိုနည်းလမ်းနဲ့ပဲ သတ်သတ်လွတ်စားတဲ့သူတွေဟာလည်း အစားအသောက်ကို အာဟာရပြည့်ဝအောင်စားကြတာပါ။

အသားမှာပါတဲ့ ပရိုတင်းဓာတ်နဲ့ အသီးအရွက်၊ ပဲတွေမှာပါဝင်တဲ့ ပရိုတင်းဓာတ်ကတော့ ကွာဟလွန်းနေတာတော့မဟုတ်ပါဘူးး။ မြင်သာအောင်ပြောရမယ်ဆိုရင် အသားဓာတ်တွေမှာ မိုင်နိုအက်ဆစ်တွေ ရှိပါတယ်။ မိုင်နီအက်ဆစ်ကို ခွဲချလိုက်ရင် အမျိုးပေါင်း (၂၀) ရှိပါတယ်။ အသားမှာကျတော့ အမျိုး (၂၀)လုံးပါဝင်ပြီး ပဲတို့ ဟင်းသီးဟင်းရွက်တို့မှာကျ အမျိုး (၂၀)လုံးမစုံပါဘူး။ တချို့ဟာလေးတွေမှာ ချို့တဲ့နေတတ်ပါတယ်။ ဒီလိုချို့တဲ့တယ်ဆိုပေမယ့်လည်းပြဿနာမရှိပါဘူး။ ပဲဟင်းက ချို့တဲ့တဲ့ အသားဓာတ်ကို ထမင်းကလည်း ရနိုင်သလို ဟင်းသီးဟင်းရွက်၊ ပဲပြား၊ ကြက်ဥတို့ကနေလည်း ရနိုင်ပါတယ်။

အသားမစားရလို့ အာဟာရချို့တဲ့သွားတယ်ဆိုတာမျိုးတော့ မရှိပါဘူး။ သတ်သတ်လွတ်စားနေတဲ့သူတွေလည်း အသားမပါဘဲ အာဟာရပြည့်ဝအောင်စားသောက်နေကြတာဖြစ်ပါတယ်။ ဒါကြောင့် မိမိအနေနဲ့ ဘယ်အစားအစာကနေ ဘယ်လိုအာဟာရဓာတ်တွေ ရတယ်ဆိုတာကို သိဖို့ပဲ လိုအပ်ပါတယ်။

Photo: Delish

စရိတ်နည်းနည်းနဲ့ရနိုင်တဲ့ကစီဓာတ်

ကစီဓာတ်အတွက် ထမင်းစားတဲ့အခါ ပေါ်ဆန်းမွှေးစားမှ ကစီဓာတ်ရတာမဟုတ်ပါဘူး။ ပေါ်ဆန်းမွှေးပဲ ဖြစ်ဖြစ် ဆန်ကြမ်းပဲဖြစ်ဖြစ် ဆန်လုံးညိုပဲဖြစ်ဖြစ် ကြိုက်တာစားလို့ရပါတယ်။ မိမိက ဆန်ကြမ်းစားပြီး ပေါ်ဆန်းမွှေးမစားလို့ အာဟာရမရှိတာလားလို့ ထင်တတ်ကြပါတယ်။ မဟုတ်ပါဘူး။ တကယ်တော့ ဆန်ကြမ်းစားရင် ပိုတောင်မှ ကျန်းမာရေးအတွက် ညီညွှတ်ပါသေးတယ်။ အမျှင်ဓာတ်များပြီး ဝမ်းမချုပ်တော့တာ၊ ခန္ဓာကိုယ်အလေးချိန် ပေါ့ပါးစေတာ စတဲ့ ကောင်းကျိုးလေးတွေတောင် ရရှိစေနိုင်ပါတယ်။ မိမိစားနေတဲ့ဆန်သည် ဘယ်လိုအနေအထားပဲ ဖြစ်နေပါစေ။ ကာဗွန်ဟိုက်ဒြိတ် ရရှိပါတယ်။ အဲဒီအတွက် ဘာမှ စိုးရိမ်စရာမလိုပါဘူး။

တစ်ခုတော့ ရှိပါတယ်။ ဆန်ကြမ်းစားရင် အရသာသိပ်မကောင်းတာမျိုးဖြစ်ကောင်းဖြစ်ပါလိမ့်မယ်။ ဒါပေမယ့် အာဟာရဓာတ်တော့ လျော့မသွားပါဘူး။ ပိုပြီးတော့တောင်မှ အမျှင်ဓာတ်များပြီး ကျန်းမာရေးအတွက် ကောင်းမွန်စေပါတယ်။

Photo: The Finical Express

ဆီနည်းနည်းနဲ့ချက်တတ်တဲ့အလေ့အကျင့်လုပ်ပါ

ဟင်းချက်တဲ့အခါ ဆီလို့ ပြောလိုက်ရင် စားအုန်းဆီ၊ ဝက်ဆီတို့ကိုတော့ လုံးဝမစားသင့်ပါဘူး။ အထူးရှောင်ရမှာဖြစ်ပါတယ်။ ပဲဆီ၊နှမ်းဆီ၊ နေကြာဆီ၊ ပဲပုပ်စေ့ဆီ စသဖြင့် စားလု့ိရပါတယ်။ဒါပေမယ့် စားအုန်းဆီက ဈေးသက်သာတဲ့အတွက် အခြေခံလူတန်းစားအများစုကတော့ စားအုန်းဆီကိုပဲ သုံးချင်ကြပါလိမ့်မယ်။ ဒါပေမယ့် ဆီက အများကြီးစားရမယ့် အစားအစာထဲမှာမပါဝင်ပါဘူး။

ချက်ကတည်းက ဆီကိုတတ်နိုင်သမျှလျှော့ပြီး ဆီနည်းနည်းနဲ့ ချက်တတ်တဲ့အကျင့်လေးတွေ လုပ်ထားမယ်ဆိုရင် ဆီကနေ ကုန်မယ့်ကုန်ကျစရိတ်ကို တစ်ဖက်တစ်လမ်းကနေ လျှော့ချနိုင်မှာပါ။ ဒါကြောင့်မို့ ဆီဆိုရင် တိရစ္ဆာန်တွေဆီကရတဲ့ဆီနဲ့ စားအုန်းဆီတွေကို ရှောင်ပြီးကျန်တဲ့ဆီတွေကို အသုံးပြုပေးပါ။

Photo: TipAdvisor

ငွေ (၂၀၀၀) ကျပ်တည်းနဲ့ မိသားစုထမင်းဝိုင်းဖန်တီးကြမယ်

အခြေခံဈေးဖိုးလေးကို ငွေ (၂၀၀၀) ၊ (၂၅၀၀) လောက်နဲ့ မိသားစု (၃) (၄) ယောက်စာအတွက် ညမနက်စာ အတွက် ကောင်းကောင်းမွန်မွန်ချက်ပြုတ်စားသောက်လို့ရနိုင်ပါတယ်။

ဥပမာ- ကြက်ဥလေးနဲ့ ပဲဟင်းလေးချက်မယ်။ အရွက်ကြော်လေးတစ်ခုပါမယ်။ ငပိရည်၊ တို့စရာလေးနဲ့ဆို ထမင်းလေးမြိန်စေပါတယ်။ အသားဟင်းမပါဘဲနဲ့လည်း ဈေးလေးသက်သက်သာသာနဲ့ အာဟာရပြည့်ဝစေပြီး ကျန်းမာရေးနဲ့ ညီညွတ်တဲ့ မိသားစုထမင်းဝိုင်းလေးတွေ ဖန်တီးလို့ရပါတယ်။

တကယ်လို့ ကြက်ဥဟင်းတွေချက်ရတာပျင်းလာပြီဆိုရင် တို့ဟူးလေးချက်တာ၊ တို့ဟူးလေးသုပ်တာ၊ တို့ဟူးသုပ်နဲ့ လိုက်မယ့်ဟင်းချိုလေးနဲ့ အရွက်ကြော်လေးနဲ့ စားတာ ဒီလိုနည်းလမ်းလေးနဲ့လည်း ပရိုတင်းဓာတ်တွေ ရရှိစေပြီး အာဟာရပြည့်ဝနိုင်ပါတယ်။ အခုလို ကျပ်တည်းနေတဲ့ကာလ တတ်နိုင်သမျှစုဆောင်းနေရတဲ့အချိန်မှာ ဈေးဖိုးကို စရိတ်အနည်းငယ်လေးသုံးပြီး အာဟာရပြည့်ပြည့်၀၀လေးရအောင် ချက်ပြုတ်စားသောက်ကြဖို့ အာဟာရအထူးကုဆရာဝန် ဒေါက်တာညီညီကျော်က အကြံပြုပါတယ်။

“ ဈေးကြီးတဲ့အစားအစာတွေ၊ နိုင်ငံခြားက လာတဲ့အစားအစာတွေစားမှ အာဟာရရှိတာမဟုတ်ပါဘူး။ ပတ်ဝန်းကျင်မှာ ရနိုင်တဲ့အစားအသောက်တွေ၊ ကိုယ့်နေရာဒေသ ပေါ်မှာမူတည်ပြီးတော့မှ ရနိုင်တဲ့အစားအစာပေါ်မူတည်ပြီး အရှေ့မှာပြောခဲ့တဲ့အတိုင်းလေး စားကြပါလို့ ကျွန်တော် အကြံပေးချင်ပါတယ်။ လူနာတွေဆိုရင်လည်း နိုင်ငံခြားက လာတဲ့ဆေးတွေမှီဝဲမှအားရှိတာမဟုတ်ပါဘူး။ မဖြစ်မနေလိုအပ်မှ ဆရာဝန်ရဲ့ ညွှန်ကြားချက်အတိုင်းဆေးတွေကို မှီဝဲပါ။ကိုယ်ကအစား စားနိုင်တယ်ဆိုရင် ကိုယ်ချက်နိုင်တဲ့အနေအထားလေးနဲ့ အာဟာရပြည့်ဝအောင် ချက်ပြုတ်စားသောက်ဖို့ပဲလိုပါတယ်။ ဘာကြောင့် ဒီလိုပြောရလဲဆိုတော့ အခြေခံလူဦးရေ များပြားတဲ့ မြန်မာနိုင်ငံမှာ မိသားစုဝင်ငွေလေးနဲ့ ကိုက်ညီအောင် စားတတ်ဖို့က အလွန်အရေးကြီးပါတယ်။” လို့ အာဟာရအထူးကုဆရာဝန်ဒေါက်တာညီညီကျော်က အကြံပြုတိုက်တွန်းပြောဆိုပါတယ်။

သတင်းဆောင်းပါးပါ အချက်အလက်များသည် Dr.Nutrition Page မှအာဟာရအထူးကုဆရာဝန် ဒေါက်တာညီညီကျော်မှ ဝေမျှအကြံပြုပေးထားခြင်းဖြစ်ပါသည်။


Share

က္က