အိပ်မပျော်တဲ့မဒီလေးတွေအတွက် အထောက်အကူဖြစ်စေမယ့် နည်းလမ်းလေးတွေပါ။

အမျိုးသမီးတွေအနေနဲ့ ညဘက်မှာ ကောင်းကောင်းအိပ်ပျော်ဖို့ အရမ်းအ‌ရေးကြီးပါတယ်။ တစ်နေ့ကို ၇ နာရီပြည့်အောင် မအိပ်စက်ရတဲ့ အမျိုးသမီးတွေအနေနဲ့ ခန္ဓာကိုယ်ကျန်းမာရေး ၊ စိတ်ကျန်းမာရေး ၊ လူမှုရေး ၊ အလှအပ စတာတွေ အားလုံး ထိခိုက်ကုန်မှာ အသေအချာပါပဲ။ ဒါ့ကြောင့် ညစဉ်အိပ်လို့မပျော်ဖြစ်နေရတယ်ဆိုတဲ့ မဒီတွေအတွက် အိပ်ပျော်စေမယ့် နည်းလမ်းကောင်းလေးတွေ ညွှန်းပေးချင်ပါတယ်။ 

thedoctorweighsin.com

၁။ ဖုန်းပိတ်ထားပါ 

ခုခေတ်နဲ့ အကိုက်ညီဆုံး တားမြစ်ချက်လို့ ပြောရပါလိမ့်မယ်။ ဒီဘက်ခေတ်မှာ များ‌သောအားဖြင့် ညလုံးပေါက် မအိပ်တာ ၊ အိပ်လို့ မပျော်နိုင်တာတွေရဲ့ အဓိက တရားခံဟာ မိုဘိုင်းဖုန်းကြောင့်ဖြစ်နေတတ်ပါတယ်။ ဂိမ်းဆော့နေတာ ၊ ဆိုရှယ်မီဒီယာမှာ အချိန်ကုန်နေတာတွေဟာ ညဉ့်နက်ပြီး မိုးလင်းတဲ့အထိပါ ဖြစ်လာတတ်ကြပါတယ်။ ဒါ့ကြောင့် ညဘက် အိပ်ပျော်ချင်ရင် ဖုန်းပိတ်ပြီး အိပ်ပါ။ 

၂။ နွားနို့ပူပူလေးတစ်ခွက်သောက်ပါ 

နွားနို့ပူပူလေးဟာ အိပ်ချင်စိတ်ကို ဖြစ်ပေါ်စေတဲ့အတွက် ညဘက် မအိပ်ခင်မှာ နွားနို့ပူပူလေးတစ်ခွက် သောက်သုံးသင့်ပါတယ်။ တစ်ဆက်တည်း တားမြစ်လိုတာကတော့ အိပ်ရာမဝင်ခင် ၆ နာရီမှ ၁၀ နာရီအတွင်းမှာ ကဖင်းဓာတ်ပါတဲ့ ကော်ဖီ၊ လက်ဖက်ရည် စတာတွေကို မသောက်သုံးဖို့ပါပဲ။ ဒီအရာတွေကို သောက်သုံးထားမယ်ဆိုရင် အိပ်စက်ခြင်းကို အ‌‌နှောင့်အယှက် အဟန့်အတားဖြစ်စေပါတယ်။  

“အခုခေတ်ကတော့ စမတ်ဖုန်းတွေ အများကြီးပေါ်လာတော့ လူတိုင်းက ဂိမ်းဆော့မယ်၊ ဆိုရှယ်မီဒီယာတွေ သုံးမယ်။ ရုပ်ရှင်ကြည့်မယ်။ စတာတွေပေါ့၊ ဒီပေါ်မှာ စွဲလန်းမှုများလာပြီဆိုရင် ညဘက် အိပ်နိုင်ဖို့ ဆိုတာ တော်တော်လုပ်ယူရမှာပဲ။ အဲဒီတော့ ဒီစွဲလန်းမှုတွေကို လျှော့စေချင်တယ်။ နောက်တစ်ချက်ကတော့ အိပ်ခါနီးမှ အစာကို ကပ်စားလိုက်တာမျိုးဆို ချက်ချင်းကြီး အိပ်ပေျာ်နိုင်ဖို့ဆိုတာ ခဲယဉ်းတယ်။ ပြီးတော့ ကိုလက်စထော များတဲ့ အစားအစာတွေ၊ ကဖင်းဓာတ်များတဲ့ အစားအစာတွေကို စားသုံးခြင်းဖြင့်လည်း အိပ်စက်မှုကို အနှောင့်အယှက်ဖြစ်စေတယ်။ ညအိပ်ခါနီးမှ ကိုကာကိုလာသောက်တယ်၊ ကော်ဖီသောက်တယ်၊ ဒါမျိုးတွေက ဘယ်လိုမှ မသင့်တော်ဘူး။ အစာနဲ့ အရမ်းကြီးနီးကပ်ပြီးမှ အိပ်ရင် နေမထိထိုင်မသာဖြစ်တာတို့ ၊ အိပ်မပျော်တာတို့ ဖြစ်လာနိုင်တယ်။” လို့ Health Care Attendant ဦးမျိုးမင်းဦးက ဆိုပါတယ်။

၃။ နေ့စဉ်လေ့ကျင့်ခန်းလုပ်ပါ 

အထူးသဖြင့် မနက်ခင်းအိပ်ယာနိုးထချိန်မှာ လုပ်တာက ပိုသင့်တော်ပါတယ်။ မနက်ခင်းမှာ ကိုယ်လက်လှုပ်ရှားမှုကို ပြုလုပ်ခြင်းဟာ ညဘက်မှာ ကောင်းကောင်းအိပ်စက်စေတာဖြစ်တဲ့အတွက် နေ့စဉ်လေ့ကျင့်ခန်းလုပ်တဲ့ အကျင့်ကို ပြုလုပ်ပါ။ အချိန်ရမယ်ဆိုရင် မနက်ခင်းနေရောင်အောက် နာရီဝက်လောက် လမ်းလျှောက်တာမျိုး ပြုလုပ်စေချင်ပါတယ်။ ယောဂကျင့်တာမျိုးကလည်း ညဘက်ကို ကောင်းကောင်းအိပ်ပျော်စေနိုင်ပါတယ်။

massagemag.com

၄။ အမွှေးနံ့သာများရဲ့ အကူအညီကို ရယူပါ

Aromatherapy နဲ့ Essential Oils တွေကလည်း အွန်လိုင်းမှာ အလွယ်တကူဝယ်ယူရရှိနေနိုင်ပါပြီ။ ကိုယ်က အမွှေးနံ့သာတွေကို ကြိုက်နှစ်သက်သူဆိုရင်တော့ ဒီအရာလေးတွေကို စမ်းသုံးကြည့်ဖို့ တိုက်တွန်းချင်ပါတယ်။ ပုံစံမျိုးစုံ၊ ရနံ့မျိုးစုံ နဲ့ ဈေးမျိုးစုံရရှိနိုင်တာဖြစ်လို့ ကိုယ်တတ်နိုင်မယ့် ဈေး ၊ ကိုယ်ကြိုက်နှစ်သက်တဲ့ ရနံ့‌လေးတွေကို အိပ်ယာဘေးမှာ ထားရှိ/ ထွန်းညှိ / ဖြန်းပေးထားခြင်းအားဖြင့် စိတ်ဖိစီးမှုတွေလည်း လျော့နည်းစေနိုင်သလို ကောင်းကောင်းလည်း အိပ်ပျော်စေနိုင်ပါတယ်။ 

၅။တရားထိုင်ပါ 

အိပ်ခါနီး စိတ်ကို သက်သောင့်သက်သာ ထားရှိပြီး ဝင်လေထွက်လေကိုပဲ မှတ်ရင်း ကောင်းကောင်းအိပ်ပျော်သွားအောင်လည်း ကြိုးစာယူလို့ရပါတယ်။ စိတ်က အတွေးပေါင်းစုံတွေးမနေဖို့တော့ လိုအပ်ပါတယ်။ အိပ်မပျော်ဘူးဆိုပြီး ဝင်လေထွက်လေမှတ်ရာကနေ ဖုန်းယူပြီး ကြည့်နေတာမျိုးဆိုရင်တော့ အိပ်ပျော်တော့မှာကို မဟုတ်ပါဘူး။ 

၆။ ငြိမ့်ညောင်းတဲ့ တေးသီချင်းတွေကို နားထောင်ပါ 

ငြိမ့်ညောင်းသာယာတဲ့ တေးသံတွေကလည်း အိပ်စက်သွားစေဖို့ အထောက်အကူဖြစ်ပါတယ်။ ကိုယ့်အိပ်ယာနဲ့ ခပ်လှမ်းလှမ်းမှာ တိုးတိုးလေးနဲ့ ညင်သာတဲ့ တေးသွားသက်သက်အသံ‌လေးကို ဖွင့်ထားမယ်ဆိုရင် စိတ်ကလည်း ပေါ့ပါးလာပြီး အိပ်ချင်စိတ်ကို ဖြစ်ပေါ်လာစေပါတယ်။ တေးသွားတွေကို ရှာဖွေချင်တယ်ဆိုရင်တော့ အင်တာနက်မှာ Sleep Sounds လို့ ရိုက်ရှာရုံနဲ့ အလွယ်တကူရရှိနိုင်ပါတယ်။

prima.cdnds.net

၇။သက်သောင့်သက်သာဖြစ်စေမယ့် အိပ်ယာကို ရွေးချယ်ပါ 

အိပ်ပျော်ဖို့ဆိုတဲ့နေရာမှာ ကိုယ်ရွေးချယ်ထားတဲ့ အိပ်ယာကလည်း အရမ်းကို အရေးပါပါတယ်။ အိပ်ယာကို မမြင့်လွန်း ၊ မနိမ့်လွန်းဘဲ အိပ်စက်ရာမှာ သက်သောင့်သက်သာဖြစ်ပြီး စိတ်ကျေနပ်စေမယ့် အိပ်ယာကိုသာ ရေွးချယ်ပြီး အိပ်စက်ပါ။ ဒီလိုမှ မဟုတ်ရင်တော့ အိပ်ယာကလည်း ကိုယ့်ရဲ့ နှစ်ခြိုက်စွာအိပ်ပျော်စေဖို့ကို အနှောင့်အယှက်ကောင်းကောင်းပေးနေပါလိမ့်မယ်။ 

ကောင်းမွန်စွာမအိပ်ဆက်ခြင်းကြောင့် ရရှိနိုင်တဲ့ ဆိုးကျိုးများ

ကောင်းမွန်စွာ နှစ်နှစ်ခြိုက်ခြိုက် အိပ်စက်ရခြင်းမရှိတဲ့သူတွေ ကြုံတတ်တဲ့ ပြဿနာတွေနဲ့ပတ်သက်ပြီး Health Care Attendant ဦးမျိုးမင်းဦးက ခုလိုပြောပြပါတယ်။ 

ညဘက်မအိပ်တာဟာ ဦးနှောက်ကို အများကြီး အကျိုးသက်ရောက်မှုရှိတယ်၊ ညဘက်အိပ်ပြီး အနားယူလိုက်တဲ့အချိန်ကျမှ ဦးနှောက်ရဲ့ လှုပ်ရှားမှုက နှေးပြီးဖြစ်ပျက်ခဲ့သမျှ တစ်နေ့တာ လုပ်ငန်းစဉ်တွေကို ပြန်ပြီး သုံးသပ်ရတယ်။ ဦးနှောက်က သူ့လုပ်ငန်းဆောင်တာတွေကို သေချာ စနစ်တကျပြန်ပြီး စီမံခန့်ခွဲတယ်။ ဦးနှောက်ပဲလားဆိုတော့ ကျွန်တော်တို့ရဲ့ ခန္ဓာကိုယ်က အသည်းတို့ ၊ ကျောက်ကပ်တို့ ၊ နှလုံးတို့ ဒါတွေအကုန်လုံးက သူ့ဟာသူ ပုံမှန်အတိုင်း ပြန်အလုပ်လုပ်တယ်။ အဲဒီအတွက်ကို အားအင်တွေလိုတယ်။ ညဘက်မအိပ်ရင် ရေရှည်မှာ အဆင်မပြေဘူး။ အကြောင်းကိစ္စ ရှိလို့ တစ်ည နှစ်ညလောက် မအိပ်လိုက်ရတာက ကိစ္စမရှိဘူး။ လိုအပ်တဲ့ အားဆေးတွေ သောက်လိုက်လို့ ရတယ်။ ကိုယ့်ကိုယ်ကိုယ် FRESH ဖြစ်အောင် လုပ်လိုက်လို့ ရတယ်။ ဒါပေမယ့် ရေရှည်ကြီး ညမအိပ်ဘဲ နေ့ကျမှအိပ်မယ်ဆိုရင် ဒါက ပုံမှန်မဟုတ်တော့ဘူး။ စိတ်ပိုင်းဆိုင်ရာပြဿနာတွေ ၊ ဝေဒနာခံစားလာရမယ်။ တစ်ယောက်တည်း အထီးကျန်လာမယ်။ ဆိုက်ကိုတွေ အမျိုးမျိုးဝင်လာနိုင်တယ်။” 

အိပ်ဆေးတွေ သောက်သင့်ရဲ့လား

“အိပ်ဆေးမှာ SIDE EFFECT တွေ ရှိတယ်။ ကိုယ်က ဘာရောဂါမျိုးဖြစ်နေတာလဲ ၊ ဘာပြဿနာတွေ ၊ ဘာလိုအပ်ချက်တွေ ရှိနေလဲ ရှိနေတဲ့ လိုအပ်ချက်တွေကို ဖြည့်ဆည်းပြီးတော့ ပြန်ပြီးတော့ ကာအောင်လို့ အိပ်ဆေးတွေ သုံးကြတယ်။ သူ့ရောဂါနဲ့ သူသုံးတဲ့ အိပ်ဆေးက အမျိုးမျိုးရှိတယ်။ အိပ်ဆေးက အများကြီးရှိတာဖြစ်တဲ့ အတွက်ကြောင့် အိပ်ဆေးတွေကို ကိုယ့်သ‌ေဘာနဲ့ကိုယ် သောက်သုံးခြင်းက ကိုယ်နဲ့ အပ်စပ်သော် လည်းကောင်း ၊ မအပ်စပ်သော်လည်းကောင်း ဆရာဝန်ရဲ့ ညွှန်ကြားမှုမပါဘဲ ကိုယ့်သဘောနဲ့ ကိုယ်သောက်တာကတော့ အိပ်ဆေးမှ မဟုတ်ပါဘူး။ ဘယ်ဆေးမှ မသောက်သင့်ဘူး။ အိပ်ဆေးကတော့ အိပ်ပျော်မှာပဲ အိပ်ဆေးသောက်လို့ အိပ်ပျော်သွားတယ်ဆိုတာကတော့ သဘာဝမကျဘူး။ 

"တတ်နိုင်သလောက် ဖြစ်နိုင်ရင် ကိုယ့်မှာ စိတ်ပိုင်းဆိုင်ရာ ပြဿနာတစ်ခုရှိနေလား၊ ဒါဆို ဆရာဝန်တစ်ယောက်နဲ့ တိုင်ပင်ဆွေးနွေးပါ။ ကိုယ့်ကို အားပေးမယ့်သူတွေနဲ့ တိုင်ပင်ပါ။ ကိုယ်က ဘာလုပ်လို့ရမလဲဆိုတာကို သိလာရင် ဒီအချက်လေးတွေကို လိုက်နာပြီးတော့ လိုက်လုပ်မယ်ဆိုရင် ကိုယ့်သဘောနဲ့ ကိုယ် အိပ်ဆေးသောက်နေတဲ့သူတွေအတွက် ပိုပြီးတော့ ကောင်းမယ့်ရလဒ်တွေ ရလာနိုင်တယ်။” လို့ Health Care Attendant ဦးမျိုးမင်းဦးက အကြံပြုပါတယ်။

ညဘက်တွေမှာ ကောင်းမွန်စွာ အိပ်မပျော်ဘူးဆိုတဲ့ မဒီတွေအတွက် နည်းလမ်းကောင်းလေးတွေကို ဝေမျှပေးလိုက်ပါတယ်။ ကောင်းမွန်စွာ အိပ်စက်အနားယူပြီး လှပပျိုမြစ်ကာ ကျန်းမာဝဖြိုးအလှတိုးနိုင်ကြပါစေ။

Share

က္က