ကိုဗစ်ကြောင့် ရှန်ဟိုင်းကားစက်ရုံ ပိတ်ထားရသလို ကမ္ဘာ့ Supply Chain ပြဿနာတွေ ရှိနေပေမယ့် Tesla ကား တင်ပို့မှု စံချိန်သစ်တင်ခဲ့တယ်လို့ ဆိုပါတယ်။ 

Tesla ရဲ့ သတင်းထုတ်ပြန်ချက်ထဲမှာ ကုမ္ပဏီအနေနဲ့ ၂၀၂၂ ပထမသုံးလပတ်အတွင်း Model 3 နဲ့ Model Y ကားအစီးရေ ၂၉၅၃၂၄ စီး နဲ့ Model S ၊ Model X ၁၄၇၂၄ စီး တင်ပို့နိုင်ခဲ့တယ်လို့ ဆိုပါတယ်။ ဒါဟာ ပြီးခဲ့တဲ့နှစ် စတုတ္ထသုံးလပတ်တင်ပို့မှု အရေအတွက်ဖြစ်တဲ့ ၃၀၈၆၀၀ စီးထက် အနည်းငယ် ပိုများခဲ့တာ ဖြစ်ပြီး ၂၀၂၁ ပထမသုံးလပတ် တင်ပို့မှုအရေအတွက်ဖြစ်တဲ့ ၁၈၄၈၀၀ စီးထက် ၆၈% ပိုများခဲ့တာလည်း ဖြစ်ပါတယ်။ 

၂၀၂၁ ပထမသုံးလပတ်အတွင်းမှာ Tesla ကားထုတ်လုပ်မှုဟာ ၁၈၀၃၃၈ စီး ရှိခဲ့ရာကနေ ၂၀၂၂ ပထမသုံးလပတ်မှာ ကားအစီးရေ စုစုပေါင်း ၃၀၅၄၀၇ စီးအထိ တိုးမြှင့် ထုတ်လုပ်နိုင်ခဲ့တယ်လို့လည်း ဆိုပါတယ်။ ဈေးကွက်လေ့လာသူတွေက ၂၀၂၂ ပထမသုံးလပတ်မှာ ကားအစီးရေ ၃၁၇၀၀၀ ခန့် တင်ပို့နိုင်ဖို့ ခန့်မှန်းခဲ့တာပါ။ ကားတင်ပို့မှုဟာ အနီးစပ်ဆုံးရောင်းအားနဲ့ ချိန်ထိုးနိုင်မယ်လို့ Tesla က ထုတ်ပြန်ပါတယ်။ 

ကုမ္ပဏီရဲ့ ရောင်းအားအကောင်းဆုံး Tesla ကားတွေ ဖြစ်တဲ့ Model 3 နဲ့ Model Y တွေကို အများဆုံး ထုတ်လုပ်ပေးနေတဲ့ ရှန်ဟိုင်းကားစက်ရုံ ပိတ်ထားတာကလည်း Tesla အတွက် နောက်ထပ် ထုတ်လုပ်မှုထိုးနှက်ချက် ဖြစ်နေပါတယ်။