ဒေါ်လာ ၄၄ ဘီလျံတန် အရောင်းအဝယ် မဖြစ်ခဲ့ရင် မတ်စ်နဲ့ Twitter ကုမ္ပဏီအကြားမှာ လျော်ကြေးပေးစရာတွေ ရှိလာပါတယ်။

ကမ္ဘာကျော်ဘီလျံနာ အီလွန်မတ်စ်ဟာ Twitter ကိုဝယ်ပြီး ရှယ်ယာတစ်စု ၅၄.၂၀ ဒေါ်လာနှုန်းနဲ့ ဒေါ်လာ ၄၃.၃ ဘီလျံခန့် ပေးပြီး ပုဂ္ဂလိကပိုင် လက်လွှဲယူဖို့ သဘောတူထားပါတယ်။ မတ်စ်ဟာ သက်တမ်း ၁၆ နှစ် ရှိပြီ ဖြစ်တဲ့ Twitter ကုမ္ပဏီကို ဝယ်ဖို့ သူ့ပိုင် Tesla အစုရှယ်ယာတွေကို အပေါင်ထားတဲ့ ချေးငွေတွေအပါအဝင် Morgan Stanley နဲ့ တခြားဘဏ္ဍာရေးလုပ်ငန်းစုတွေဆီက ဒေါ်လာ ၂၅.၅ ဘီလျံ နဲ့ မတ်စ်ကိုယ်တိုင် ထုတ်ပေးသွားမယ့် အစုရှယ်ယာထဲက ဒေါ်လာ ၂၁ ဘီလျံဖိုးကို လျာထားတယ်လို့ ဆိုပါတယ်။ 

Twitter နဲ့ အရောင်းအဝယ်ပြီးပြတ်တဲ့အထိ ဝန်ထမ်းတွေအတွက် စတော့ခ်ရှယ်ယာခံစားခွင့်ပေးသွားမှာ ဖြစ်ပြီး သတ်မှတ်ချိန်ကျော်မှ ရောင်းချနိုင်မယ့် စတော့ခ်တွေကို ပယ်ဖျက်သွားမှာပါ။ ဒီလို ရှယ်ယာတွေ ကိုင်ထားတဲ့ ဝန်ထမ်းတွေအဖို့ ဒီရှယ်ယာထုတ်ရောင်းချိန်မှာ ငွေသားနဲ့ ထုတ်ယူနိုင်အောင်လည်း စီစဉ်ထားပါတယ်။မတ်စ်ဟာ Twitter ကို ဝယ်ရာမှာ ဧပြီ ၁ ရက်နေ့က ပိတ်တဲ့ စတော့ဈေးထက် ၃၈% ပိုပေးပြီး ကမ်းလှမ်းခဲ့တာပါ။ 

ဒါပေမယ့်လည်း ဈေးကွက်ပြိုင်ဆိုင်မှုဥပဒေ ၊ နိုင်ငံခြားရင်းနှီးမြှပ်နှံမှု ဥပဒေနဲ့ တခြားအစိုးရပိုင်းဆိုင်ရာ လုပ်ရမယ့်ကိစ္စတွေနဲ့ ဆက်စပ်ပြီး ပြီးပြတ်စရာလေးတွေ ရှိရင်တော့ နောက်ထပ် ၆ လ ထပ်တိုးပြီး စာချုပ်ပျက်မယ့်အချိန်ကို ဆုတ်နိုင်တယ်လို့လည်း ပြောထားပါတယ်။ ဘာပဲဖြစ်ဖြစ် ဝယ်သူရောင်းသူ နှစ်ဖက်ကတော့ ဒေါ်လာ ၁ ဘီလျံ ပိုဆောင်ထားရမယ့်ကိန်းလို့ ဆိုရမှာပါ။