ဒါဝင် နူးညက်ဇ်ဟာ လီယွန်နယ် မက်ဆီနဲ့ ခရစ္စတီယာနို ရော်နယ်လ်ဒိုတို့ကြား ရွေးချယ်ပေးဖို့ မေးမြန်းခြင်းခံခဲ့ရတဲ့အချိန်မှာ ရယ်မောစရာကောင်းတဲ့ တုံ့ပြန်မှုကို ပြုလုပ်ခဲ့ပါတယ်။
လီဗာပူးလ်ကြယ်ပွင့်ဟာ ဆယ်စုနှစ်တစ်ခုလောက်ရှိနေပြီဖြစ်တဲ့ လီယွန်နယ် မက်ဆီနဲ့ ရော်နယ်လ်ဒိုတို့ကြား အငြင်းအခုံမှာ အဖြေပေးခဲ့ပေမယ့်လည်း ကြယ်ပွင့်ကစားသမား ၂ ဦးစလုံးရဲ့ နာမည်ကို ဖြေကြားခဲ့ခြင်းမရှိတာဖြစ်ပါတယ်။ ပရိသတ်တစ်ဦးက ဥရုဂွေးတိုက်စစ်မှူး အမှတ်တရလက်မှတ်ထိုးပေးဖို့ ထွက်လာတဲ့အချိန်မှာ မေးခွန်းထုတ်ခဲ့တာဖြစ်ပြီး မိုဟာမက် ဆာလားနဲ့ အတူ ကစားနေတာကြောင့်လားမသိဘဲ လီဗာပူးလ်အသင်းဖော်ကို ရွေးချယ်သွားခဲ့တာဖြစ်ပါတယ်။
လီယွန်နယ် မက်ဆီနဲ့ ခရစ္စတီယာနို ရော်နယ်လ်ဒိုတို့ကြား ရွေးချယ်ပေးဖို့ မေးမြန်းခဲ့တဲ့အချိန်မှာ နူးညက်ဇ်က "ဆာလား"လို့ တုံ့ပြန်သွားခဲ့တာဖြစ်ပါတယ်။ နူးညက်ဇ် အဖြေကို ဖြေဆိုချိန်မှာ အီဂျစ်လက်ရွေးစင်တိုက်စစ်မှူးကလည်း လက်မှတ်ထိုးပေးနေခဲ့တာဖြစ်ပြီး ၎င်းရဲ့နာမည်ကို ပြောကြားခဲ့တဲ့အချိန်မှာ ဘာမေးခွန်း မေးလိုက်မှန်းတောင် သိလိုက်ပုံမပေါ်ခဲ့တာ ဖြစ်ပါတယ်။
မိုဟာမက် ဆာလားဟာ ၂၀၁၇ ခုနှစ်မှာ လီဗာပူးလ်အသင်းကို ပြောင်းရွှေ့လာပြီးကတည်းက မက်ဆီနဲ့ ရော်နယ်လ်ဒိုတို့လို စံချိန်တွေ ရေးထိုးနိုင်ခဲ့သူဖြစ်ပြီး ပြီးခဲ့တဲ့ရာသီမှာ ၃၁ ဂိုးအထိ အထင်ကြီးဖွယ် သွင်းယူနိုင်ခဲ့တာဖြစ်ပါတယ်။