ရီးရဲလ်မက်ဒရစ်ကြယ်ပွင့်ဟောင်း မီဆွတ် အိုဇေးလက် ဘာနေဗျူးမှာ ခရစ္စတီယာနို ရော်နယ်လ်ဒိုနဲ့ တွဲကစားရတာက ဘယ်လိုပုံစံမျိုးဖြစ်ခဲ့လဲလို့ မေးမြန်းခြင်းခံခဲ့ရတဲ့အချိန်မှာ လိမ္မာပါးနပ်စွာနဲ့ တုံ့ပြန်ခဲ့ပါတယ်။
ရော်နယ်လ်ဒိုဟာ ရီးရဲလ်မက်ဒရစ်အသင်းမှာ ကစားခဲ့တဲ့အချိန်အတွင်း အအောင်မြင်ဆုံးကာလကို ပိုင်ဆိုင်ခဲ့တာဖြစ်ပြီး စပိန်လာလီဂါထိပ်သီးအသင်းကြီးနဲ့အတူ ဆုဖလား ၁၆ လုံးအထိ အနိုင်ရရှိခဲ့တာဖြစ်ပါတယ်။ ပေါ်တူဂီဂန္တဝင်ဟာ ရီးရဲလ်မက်ဒရစ်အသင်းမှာ ကစားခဲ့တဲ့ ၉ နှစ်တာကာလအတွင်း ကမ္ဘာ့အဆင့် ကစားသမားအများအပြားနဲ့အတူ ကစားခဲ့တာဖြစ်ပြီး ဂျာမန်ကွင်းလယ်ဖန်တီးရှင် အိုဇေးလ်ကလည်း အဲဒီကစားသမားတွေထဲမှာ အပါအဝင် ဖြစ်ခဲ့တာဖြစ်ပါတယ်။
အသက် ၃၄ နှစ်အရွယ်ရှိပြီဖြစ်တဲ့ အိုဇေးလ်ဟာ ရီးရဲလ်မက်ဒရစ်အတွက် ၂၀၁၀ ကနေ ၂၀၁၃ ခုနှစ်အထိ ကစားပေးခဲ့သူဖြစ်ပြီး အဲဒီ အချိန်ကာလအတွင်း ရော်နယ်လ်ဒိုနဲ့ ၁၄၉ ပွဲ အတူတူ တွဲကစားခဲ့ရာမှာ ၃၉ ဂိုးအထိ နှစ်ဦးပေါင်းသွင်းယူနိုင်ခဲ့တာဖြစ်ပါတယ်။ ရော်နယ်လ်ဒိုနဲ့ တွဲကစားရတာက ဘယ်လိုမျိုးလဲလို့ မကြာသေးမီက မေးမြန်းခြင်းခံခဲ့ရချိန်မှာ အိုဇေးလ်က လိမ္မာပါးနပ်စွာနဲ့ တုံ့ပြန်ခဲ့တာဖြစ်ပြီး "သူ့ကို သွားမေးပါလား။ သူလည်း ကျွန်တော်နဲ့ ကစားခဲ့တာပဲ"လို့ ပြောကြားခဲ့တာဖြစ်ပါတယ်။
ခရစ္စတီယာနို ရော်နယ်လ်ဒိုနဲ့ မီဆွတ် အိုဇေးလ်တို့ဟာ ရီးရဲလ်မက်ဒရစ်အသင်းကို ၂၀၁၀ ခုနှစ်ကနေ ၂၀၁၃ ခုနှစ်အတွင်း လာလီဂါဖလားအပါအဝင် ဆုဖလား ၃ လုံး အနိုင်ရရှိအောင် ကူညီပေးနိုင်ခဲ့တာ ဖြစ်ပါတယ်။