အာဆင်နယ်ဂန္တဝင် ရောဘတ် ပီးရက်စ်က တစ်ခါတုန်းက လီယွန်နယ် မက်ဆီနဲ့ ခရစ္စတီယာနို ရော်နယ်လ်ဒိုတို့ ပါဝင်တဲ့ ဘယ်တော့မှ မဆုံးနိုင်တဲ့ GOAT အငြင်းအခုံအပေး မယုံနိုင်လောက်စရာ မှတ်ချက်ပေးခဲ့ပါတယ်။
အာဆင်နယ်ကွင်းလယ်ကစားသမားဟောင်းဟာ အာဂျင်တီးနားမှော်ဆရာဟာ အဓိကပြိုင်ဘက် ခရစ္စတီယာနို ရော်နယ်လ်ဒိုနဲ့ အခြား ဂန္တဝင်ဘောလုံးသမားတွေနဲ့ သီးခြားစီဖြစ်နေစေတဲ့ အရာတစ်ခုရှိတယ်လို့ ရှင်းလင်းခဲ့ပါတယ်။ ရောဘတ် ပီးရက်စ်က အဲဒီအချိန်တုန်းက ဘာစီလိုနာကြယ်ပွင့်ဖြစ်တဲ့ လီယွန်နယ် မက်ဆီနဲ့ပတ်သက်ပြီး သိပ်မကောင်းတဲ့စကားလုံးတွေနဲ့ ပြောခဲ့တဲ့ ဘရာဇီးလ်ဂန္တဝင် ပီလီနဲ့ သဘောထားကွဲလွဲတဲ့ ကြေညာချက်ကို ထုတ်ပြန်ခဲ့တာဖြစ်ပါတယ်။
ဘရာဇီးလ်ဂန္တဝင်က မက်ဆီဟာ စွမ်းရည်တစ်ခုသာရှိတဲ့ ကစားသမားလို့ ဖော်ပြခဲ့ပြီး GOAT ဘွဲ့ကို ခရစ္စတီယာနို ရော်နယ်လ်ဒိုကို ပေးခဲ့တာဖြစ်ပါတယ်။ “ခင်ဗျား ဘယ်လိုလုပ်ပြီး ဘောလုံးကို ကောင်းကောင်း ခေါင်းတိုက်နိုင်၊ ဘယ်ခြေနဲ့ ကန်နိုင်၊ ညာခြေနဲ့ ကန်နိုင်တဲ့သူနဲ့ ခြေထောက်တစ်ဖက်တည်းနဲ့ကန်နိုင်၊ စွမ်းရည်တစ်ခုသာရှိပြီး ဘောလုံးကို ခေါင်းနဲ့ ကောင်းကောင်းမတိုက်နိုင်တဲ့ကစားသမားကို နှိုင်းယှဉ်နိုင်တာလဲ။”လို့ ပြောကြားခဲ့တာဖြစ်ပါတယ်။
ဘရာဇီးလ်ဂန္တဝင်ရဲ့ ပြင်းထန်တဲ့မှတ်ချက်အပြီး သိပ်မကြာခင်မှာပဲ လီယွန်နယ် မက်ဆီဟာ အက်စ်ပန်ညိုနဲ့ ကစားခဲ့တဲ့ လာလီဂါပွဲစဉ်မှာ အလွတ်တည်ကန်ဘောသွင်းဂိုး ၂ ဂိုးနဲ့ ရင်သပ်ရှုမောဖွယ်စွမ်းဆောင်ရည်ကို ပြသခဲ့တာဖြစ်ပါတယ်။
ရောဘတ် ပီးရက်စ်က အာဂျင်တီးနားဂန္တဝင်ကို ချီးကျူးဖို့အတွက် အခွင့်အရေးကို အမိအရ ဆုပ်ကိုင်ခဲ့ပြီး မက်ဆီမှာ ခရစ္စတီယာနို ရော်နယ်လ်ဒို၊ ဇီဒန်း၊ ရော်နယ်ဒင်ညို၊ သီယာရီ အွန်နရီတို့လို ကစားသမားတွေမှာ မရှိတဲ့ အရာရှိတယ်လို့ ပြောကြားခဲ့တာဖြစ်ပါတယ်။
“သူသာ အက်စ်ပန်ညိုနဲ့ ကစားခဲ့တဲ့ပွဲစဉ်ကအတိုင်းသာ ကစားရင် သူ့ကို ရပ်တန့်ဖို့က မဖြစ်နိုင်ပါဘူး။ အဲဒါက မယုံနိုင်စရာကောင်းခဲ့ပါတယ်။ ကျွန်တော် ဇီဒန်း၊ အွန်နရီ၊ ရီကွယ်မီးတို့နဲ့အတူ ကစားခဲ့ပြီး ရော်နယ်လ်ဒင်ညို၊ ခရစ္စတီယာနို ရော်နယ်လ်ဒိုတို့နဲ့ ရင်ဆိုင်ကစားခဲ့ရတယ်။ ဒါပေမယ့် မက်ဆီက ဘယ်သူ့မှာမှ မရှိတဲ့ တစ်စုံတရာကို ပိုင်ဆိုင်ထားတယ်။ သူက သမိုင်းမှာ အကောင်းဆုံးကစားသမားလားဆိုတာ ကျွန်တော် မသိပါဘူး။ ဒါပေမယ့် သူ့အဆင့်အတန်းမှာ ရှိတဲ့ကစားသမားက အနည်းငယ်ပဲရှိပါတယ်။”လို့ ပြောကြားခဲ့တာဖြစ်ပါတယ်။