ရီးရဲလ်မက်ဒရစ်ကွင်းလယ်ကစားသမားဟောင်း ဂူတီက ဗင်နီးရှပ်စ် ဂျူနီယာဟာ လက်ရှိမှာ ခီလီယန် အမ်ဘာပေထက် ပိမိုကောင်းမွန်တဲ့ခြေစွမ်းပိုင်ဆိုင်နေတယ်လို့ ပြောကြားခဲ့ပါတယ်။
ဂူတီက ဗင်နီးရှပ်စ်အနေနဲ့ ပိုပြီး ခြေစွမ်းတည်ငြိမ်လာမယ်ဆိုရင် ဘောလုံးနတ်ဘုရားတောင် ဖြစ်လာနိုင်တဲ့ အရည်အချင်းရှိတယ်လို့ ထပ်လောင်း ပြောကြားခဲ့တာဖြစ်ပါတယ်။ ဗင်နီးရှပ်စ်ဟာ ရီးရဲလ်မက်ဒရစ်အတွက် ကြီးကြီးမားမား အရေးပါတဲ့ကစားသမားအဖြစ် သက်သေပြသထားနိုင်ခဲ့သူဖြစ်ပြီး ဒီရာသီ ပြိုင်ပွဲစုံ ၄၅ ပွဲမှာ သွင်းဂိုး ၂၁ ဂိုးနဲ့ ဂိုးဖန်တီးမှု ၁၆ ကြိမ် ပြုလုပ်ထားနိုင်ခဲ့တာ ဖြစ်ပါတယ်။
ဘရာဇီးလ်ကြယ်ပွင့်ဟာ ပြီးခဲ့တဲ့ရာသီ သွင်းဂိုးအရေအတွက်ကို လိုက်မီဖို့ ၁ ဂိုးသာ လိုအပ်တော့တာ ဖြစ်ပြီး လိဂ်ပွဲ ၁၀ ပွဲ၊ ကိုပါဒယ်ရေးဗိုလ်လုပွဲ၊ ချန်ပီယံလိဂ် ၅ ပွဲလောက် ကစားဖို့ ရှိနေသေးတာကြောင့် သွင်းဂိုး ၃၀ ကျော်သွင်းယူနိုင်မယ်ဆိုတာ သံသယဖြစ်စရာမရှိပါဘူး။
“အဲဒါက မယုံနိုင်စရာကောင်းတယ်။ နောက်ခံလူတွေကို သူ ကြောက်ရွံ့အောင် လုပ်နိုင်တယ်။ သူ တစ်နည်းမဟုတ် တစ်နည်းနည်းနဲ့ လွယ်လွယ်ကူကူ လိမ်ခေါက်နိုင်တယ်။ သူ့အနေနဲ့ ခြေစွမ်းပိုင်း တည်ငြိမ်မှု ပိုရှိလာတဲ့အခါကျရင် သူက ဘောလုံးနတ်ဘုရားဖြစ်လာပါလိမ့်မယ်။ ဗင်နီးရှပ်စ်က လက်ရှိမှာ အမ်ဘာပေထက် ပိုကောင်းတယ်ဆိုတာ အမှန်ပါပဲ။ အခုအချိန်မှာ နံပါတ်တစ်ပဲ”လို့ ပြောကြားခဲ့ပါတယ်။