မန်စီးတီးကစားသမားတွေ ပွဲချိန်အတွင်း ဂိုးသွင်းပြီး အောင်ပွဲခံနေတုန်း အယ်လ်ဗာရက်ဇ်ရဲ့ သွားကျိုးနေခဲ့တာကို ရုပ်သံမှတ်တမ်းတွေကလည်း မြင်တွေ့ခဲ့ရပါတယ်။ အယ်လ်ဗာရက်ဇ်ကိုယ်တိုင်ကလည်း သူ့သွားကျိုးနေတာကို သိရှိခဲ့ပုံမရပါဘူး။

အသင်းဖော် ဘာနာဒိုဆေးလ်ဗားက ဒါကို ပထမဆုံး မြင်တွေ့ခဲ့ပြီး အယ်လ်ဗာရက်ဇ်ကို သတိပေးခဲ့မှသာ ကာယကံရှင်ကိုယ်တိုင်က ဒီဖြစ်ရပ်ကို သတိထားမိခဲ့ဖွယ်ရှိပါတယ်။ ဒါပေမယ့်လည်း အယ်လ်ဗာရက်ဇ်အတွက်တော့ ဒီကိစ္စက ကြီးမားတဲ့ အနှောင့်အယှက်တစ်ခုတော့ မဖြစ်ခဲ့ပါဘူး။

အဆိုပါ အာဂျင်တီးနားလက်ရွေးစင် တိုက်စစ်မှူးဟာ ဂွါဒီယိုလာ အားကိုးရတဲ့ ကစားသမားအဖြစ် ဟာလန်းနဲ့ တွဲဖက်ခြေစွမ်းပြနေတဲ့ ကစားသမားပါ။ အခုလိုမျိုး ကျိုးသွားခဲ့တဲ့ သွားအတွက်တော့ အယ်လ်ဗာရက်ဇ်တစ်ယောက် ဒီနေ့မှာ သွားဆရာဝန်နဲ့ ပြသပြီး ကုသမှုခံယူသွားမယ်လို့ သိရှိရပါတယ်။

မနေ့က ဘုန်းမောက်ကို အနိုင်ရရှိခဲ့တာကြောင့် လက်ရှိချန်ပီယံ မန်စီးတီးတို့ စပါးပွဲမကန်ခင်မှာ အမှတ်ပေးဇယား ထိပ်ဆုံးကို တက်ရောက်နိုင်ခဲ့ပါတယ်။ ဒီရာသီ ပရီးမီးယားလိဂ်မှာတော့ ရှုံးပွဲမရှိသေးတဲ့ အသင်းက စပါးတစ်သင်းတည်းသာ ကျန်ရှိတော့တာလည်း ဖြစ်ပါတယ်။