မက်ဆီကတော့ ဒီပွဲအပါအဝင် အတ္တလန္တာ၊ အော်လန်ဒိုတို့နဲ့ပွဲတွေမှာ ပွဲကစားချိန် ၁၀ မိနစ်မပြည့်ခင်ပဲ ဂိုးတွေသွင်းယူနိုင်ခဲ့တာပါ။ ပွဲချိန်အစောပိုင်းမှာ သူ ဂိုးတွေပိုရတယ်ဆိုတဲ့ သဘောပါပဲ။ မက်ဆီရဲ့ ဂိုးနဲ့ ပွဲကို အင်တာမိုင်ယာမီတို့ ဦးဆောင်နေခဲ့ပေမယ့် ဒဲလက်စ်က ပထမပိုင်းမှာပဲ ချေပဂိုးနဲ့ အနိုင်ဂိုးတွေ သွင်းယူခဲ့လို့ ၂-၁ နဲ့ ပြန်ဦးဆောင်နိုင်ခဲ့ပါတယ်။ 

ဒုတိယပိုင်းမှာ​ ချေပဂိုးရဖို့ အင်တာမိုင်ယာမီက အားထည့်လာခဲ့ပေမယ့် ဒဲလက်စ်ရဲ့ ကစားပုံကိုတော့ လိုက်မမီခဲ့တော့ပါဘူး။ ပွဲချိန် ၆၃ မိနစ်မှာတော့ ဒဲလက်စ်က နောက်ထပ်တဂိုးထပ်သွင်းခဲ့လို့ ၃-၁ ဖြစ်သွားခဲ့ပြီး အင်တာမိုင်ယာမီတို့ အရေးနိမ့်ဖို့ကို ကြုံခဲ့ရပါတယ်။ မက်ဆီအတွက်လည်း အင်တာမိုင်ယာမီမှာ ပထမဆုံးအကြိမ် ရှုံးပွဲတွေ့ဖို့ ဦးတည်ခဲ့တာပါ။ 

ပွဲကစားချိန် ၈၁ မိနစ်မှာ အင်တာမိုင်ယာမီတို့ နောက်ထပ်ချေပဂိုးပြန်ရခဲ့ပြန်ပါတယ်။ မက်ဆီရဲ့ အလွတ်တည်ကန်ဘောကန်တင်ပေးမှုကနေ ဒဲလက်စ်ကစားသမားက ကိုယ့်ဂိုးကိုယ်သွင်းမိခဲ့တာပါ။ ပွဲက အဲဒီနောက်ပိုုင်းမှာ တော်တော်လေးကို မြိုင်ဆိုင်လာခဲ့ကာ ကြည့်ကောင်းခဲ့ပါတယ်။ သိပ်မကြာခင်ပဲ အင်တာမိုင်ယာမီတို့ ဖရီးကစ်ထပ်ကန်ခွင့်ရခဲ့ပြီး မက်ဆီက ဒီတခါမှာ တိုက်ရိုက်ကန်သွင်းကာ ၄-၄ ဖြစ်စေခဲ့ပါတယ်။ မက်ဆီကတော့ အသင်းကို ပွဲချိန် ၈၅ မိနစ်မှာ ကယ်တင်ပေးခဲ့တာပါ။ ဒီဂိုးကြောင့်ပဲ ပင်နယ်တီအဆုံးအဖြတ်ခံယူဖို့အတွက် အခွင့်အရေးရခဲ့တာပါ။ 

ပင်နယ်တီအဆုံးအဖြတ်မှာတော့ အင်တာမိုင်ယာမီတို့ ဂိုးတိုင်းဝင်အောင် ကန်နိုင်ခဲ့ပြီး ဒဲလက်စ်ဘက်က တကြိမ်လွဲချော်ခဲ့တာကြောင့် မက်ဆီတို့ အနိုင်ရကာ နောက်တဆင့်ကို တက်သွားခဲ့ပါတယ်။ ဒီနိုင်ပွဲကတော့ မက်ဆီရဲ့ လှပတဲ့ အလွတ်တည်ကန်ချက်ကြောင့် ရခဲ့တာလို့ ပြောရတော့မှာပါပဲ။