ဂျပန်နိုင်ငံက ဘိုးဘွားမောင်နှံနှစ်ဦးဟာ လွန်ခဲ့တဲ့ ၃၇ နှစ်ကတည်းကနေ ယနေ့ထိတိုင်အောင် နေ့စဉ်နေ့တိုင်း ဆင်တူပဲ ဝတ်ဆင်ခဲ့ကြပါသတဲ့။ သူတို့အကြောင်းကို Bonpon511 အမည်နဲ့ အင်စတာဂရမ်အကောင့်မှာ ပုံတွေတက်လာတော့ လူတွေက သဘောကျနေကြပါတယ်။ ယင်းအင်စတာဂရမ်အကောင့်ဟာလည်း follower ၁၀၀၀၀၀ကျော်သွားပါပြီ။
ဘိုးဘွားစုံတွဲရဲ့အသက်တွေကတော့ ၆၀ လောက် ရှိမယ်လို့ ခန့်မှန်းရပါတယ်။ ဒါပေမဲ့ အမည်ရင်းတွေကိုတော့ ဖော်ပြထားခြင်းမရှိပါဘူး။ ဘယ်အချိန်မှာ လက်ထပ်ခဲ့တယ်ဆိုတာကိုလည်း မသိရပါဘူး။ ဒါပေမဲ့ လူတွေကတော့ အဘိုးနဲ့အဘွားကိုကြည့်ကာ ကြည်နူးနေကြလေရဲ့။
သူတို့နှစ်ဦးဟာ ဘာကိုပဲဝတ်ဝတ် တစ်ယောက်နဲ့တစ်ယောက် ဆင်တူဖြစ်အောင် ရွေးချယ်ခဲ့ကြပုံရပါတယ်။ ပြီးတော့ အဝတ်အစားရွေးချယ်ရာမှာလည်း ဖက်ရှင်ကျကျ ဝတ်ကြတာကို တွေ့ရပါတယ်။
Source : Mail Online