တကယ်တော့ မြစ်တွေ၊ ချောင်းတွေ၊ ရေစီးတွေထဲမှာ ဖြစ်ပေါ်လေ့ရှိတဲ့ ဝဲအများစုဟာ စီးဆင်းနှုန်းနဲ့ ဦးတည်ချက်ကို ပြောင်းသွားစေနိုင်တဲ့ ဟန့်တားမှုတို့ကြောင့် ဖြစ်ပေါ်လာကြတာ များတယ်ဗျ။ ဘယ်လိုနေရာမျိုးတွေမှာ အဖြစ်များလေ့ ရှိလဲဆိုရင်-

(၁) တံတားတိုင်စိုက်ထားရာနေရာ

ဒီနေရာတွေမှာ ဘာလို့ဝဲဖြစ်နိုင်တာလဲဆိုရင် တံတားတိုင်က ကာဆီးထားသလိုဖြစ်နေတော့ အလျင်နဲ့ စီးဆင်းနေတဲ့ရေဟာ တိုင်ကို တိုးဝှေ့တိုက်မိပြီး ရှေ့ကို တန်းတန်းမတ်မတ် ဆက်စီးသွားလို့ မရတော့ဘူး။ အဲဒီတော့ နောက်ကိုပြန်ဆုတ်၊ ဘေးကို ယိမ်းထိုး ဖြစ်ကုန်တာပေါ့ဗျာ။ ဒါပေမဲ့ နောက်က စီးဆင်းလာတဲ့ ရေဟာ ရှေ့ကိုပဲ အရှိုန်အဟုန်နဲ့ စီးမြဲစီးဆဲပဲဆိုတော့ အဟန့်အတားကြောင့် အခက်တွေ့နေတဲ့ရေကို တွန်းထိုးခေါ်ဆောင်နေသလို ဖြစ်တော့တာပေါ့။ အဲဒီမှာ သူလည်း နောက်လည်းဆုတ်မရ၊ ရှေ့လည်း အပြည့်အဝတိုးလို့မရနဲ့ တံတားတိုင်ရဲ့ အနီးအနားတစ်ဝိုက်မှာပဲ တစ်ဝဲလည်လည်နဲ့ လှည့်နေပြီး ဝဲရယ်လို့ ဖြစ်ပေါ်လာတာပေါ့။

(၂) တိုင်တွေ၊ ကျောက်တုံးကြီးတွေရှိတဲ့နေရာ

(၃) မြစ်တွေ၊ ချောင်းတွေရဲ့ အချိုးအကွေ့နေရာတွေ

ဒီနေရာတွေမှာရော ဘယ်လိုဖြစ်ပေါ်စေသလဲဆိုရင် ရေဟာ သူ့ရဲ့သဘာဝအတိုင်း ရှေ့လားရာကိုပဲ ဦးတည်ပြီး အဖြောင့်တိုင်း အရှိုန်နဲ့စီးဆင်းလာမယ်။ အချိုးအကွေ့နေရာတွေလည်းရောက်ရော အလယ် ဝမ်းပိုင်းကရေက အဖြောင့်အတိုင်းပဲ အရှိုန်နဲ့ ဆက်စီးနေမယ်။ ဒါပေမဲ့ ဘေးဘက် ကမ်းစပ်ကရေကျတော့ ကမ်းတို့ ဘောင်တို့ရဲ အနေအထားတွေက ကွေ့ချိုးပေးလိုက်တာကို ခံရတယ်။ အဲဒီအခါမှာ ရေစီးဟာလည်း အပြင်ဘက်က ဖိအားတွေကြောင့် တွန်းပစ်လိုက်တာကို ခံရပြီး တစ်ချို့ရေတွေက သူတို့ရဲ့ မူလနေရာကို အစားပြန်ယူလာတဲ့အတွက် ဝဲဖြစ်ပေါ်လာရခြင်း ဖြစ်ပါတယ်။

Reference: အဘယ်ကြောင့်တစ်သိန်း(ကြည်ကြည်မာ)