ငယ်ငယ်ကပြောခဲ့ကြတဲ့ စကားလေးတောင် ပြန်ကြားယောင်မိတယ်။ “နတ်ပြည်တစ်ရက် လူ့ပြည်တစ်သက်” ဆိုတဲ့ ကလေးစကားလေးတွေက မှန်များနေပြီလားပဲဗျ။ ဘာလို့လဲဆိုရင် ကျနော်တို့ မြင်တွေ့နေရတဲ့ လပေါ်ကတစ်ရက်မှာတောင် ကမ္ဘာကရက်ပေါင်း ၂၉ ရက်ခွဲနဲ့ ညီမျှနေတယ်လေ။ ဒါဆို ဒီလိုဘာကြောင့် ကွားခြားနေရတာလဲဆိုတာ စိတ်ဝင်စားစရာပဲဗျ။
အားလုံးသိတဲ့အတိုင်းပဲ ကျနော်တို့ကမ္ဘာပေါ်က တစ်ရက်ဆိုတာဟာ ကမ္ဘာရဲ့မိမိဘာသာ တစ်ပတ်ပြည့်အောင် လည်ပတ်လိုက်တဲ့ ကြာချိန်ပမာဏပဲမဟုတ်လား။ လပေါ်ကတစ်ရက်ဆိုတာဟာလည်း ဒီလိုပါပဲ။ လရဲ့ မိမိဘာသာ တစ်ပတ်ပြည့်အောင် လည်ပတ်လိုက်တဲ့ ကြာချိန်ပမာဏပါပဲ။ ဒါကြောင့် ကျနော်တို့ ကမ္ဘာပေါ်မှာ နေ့၊ ည ပြောလဲမှုရှိသလို လပေါ်မှာလည်း နေ့၊ ညပြောင်းလဲမှု ရှိတယ်ဗျ။ ကမ္ဘာလိုပဲ နေနဲ့ မျက်နှာချင်းဆိုင် ဖြစ်နေတဲ့ဘက်ခြမ်းက နေ့ဖြစ်ပြီး ကျန်တစ်ခြမ်းကတော့ ညပေါ့။ အဲဒီလို တစ်လှည့်စီ တစ်ကြိမ်ကျရင် တစ်ပတ်ပြည့်ပြီဖြစ်တဲ့အတွက် တစ်ရက်ပေါ့ဗျာ။
ကျနော်တို့ကမ္ဘာက တစ်ပတ်ပြည့်ဖို့ရာအတွက်ဆိုရင် ၂၃ နာရီ ၅၆ မိနစ် ၄ စက္ကန့် ကြာပါတယ်။ ဒါပေမဲ့ လရဲ့လည်ပတ်နှုန်းက ကမ္ဘာထက် အတော်လေးနှေးလှဆိုပဲဗျ။ ဘယ်လောက်တောင်နှေးလဲဆိုရင် ၂၇.၃ ရက်တောင်ကြာတယ်ဆိုပဲ။ ဒါဆို ဒီနေရာမှာ စဉ်းစားစရာတစ်ခုဖြစ်လာပြီ။ သတိထားမိလားတော့မသိဘူးဗျ။ အပေါ်မှာပြောခဲ့တာက “လပေါ်က တစ်ရက်က ကမ္ဘာပေါ်က ၂၉ ရက်ခွဲနဲ့ညီမျှတယ်။ ပြီးတော့ လရဲ့မိမိဘာသာ တစ်ပတ်ပြည့်အောင် လည်ပတ်လိုက်တဲ့ကြာချိန်က တစ်ရက်” ဆိုပြီး အခု လတစ်ပတ်ပြည့်တဲ့ ကြာချိန်က ဘာကြောင့် ၂၇.၃ ရက်ဖြစ်နေရတာလဲပေါ့။ ဒါဆို ဘယ်ဟာအမှန်လဲ။ လပေါ်ကတစ်ရက်က ၂၇.၃ နဲ့ညီမျှတာလား ၂၉.၅ ညီမျှတာလားဆိုတာ အငြင်းပွားစရာတစ်ခုပဲဗျ။
ဒါပေမဲ့ လဟာ ကမ္ဘာလို နေတစ်မျိုးတည်းကိုပဲ လှည့်ပတ်နေတာမဟုတ်ဘူးဆိုပဲ။ သူဟာ ကမ္ဘာနဲ့ နေ နှစ်ခုစလုံးကို တစ်ပြိုင်တည်း လှည့်ပတ်နေတာဗျ။ ဒါကြောင့် ကမ္ဘာဟာ နေကို တစ်ပတ်ပြည့်အောင် လှည့်ပတ်ပြီးလို့ မူလအနေအထားအတိုင်း ပြန်ရောက်သွားတဲ့အချိန်မှာ လကတော့ ကမ္ဘာကိုပါ ပတ်နေရတာမို့ သူ့ရဲ့မူလအနေအထားကို အပြည့်အဝ ပြန်မရောက်နိုင်သေးဘူးဆိုပဲဗျ။ ဘယ်လောက်တောင် လိုသေးလဲဆိုရင် ကမ္ဘာပေါ်က ၂.၂ ရက်တောင် လိုနေသေးပါတယ်။ ဒါကြောင့် လပေါ်ကတစ်ရက်ဟာ ကမ္ဘာပေါ်က ၂၉ ရက်ခွဲ (၂၉.၅ ရက်)နဲ့ ညီမျှရခြင်းဖြစ်ပါတယ်။
Reference: universetoday