ပန်းချီအမြဲဆွဲလေ့ရှိပါတယ်။

"လောကမှာ ကျွန်မ မသိတာ ဆယ်ခုရှိနေတယ်ဆိုရင် ဘာပဲ ဖြစ်ဖြစ် တတ်နိုင်သလောက် သင်သွားချင်တယ်" လို့ပြောလာသူကတော့ ဒီနေ့အသက် ၉၇ နှစ် အရွယ်ရောက်နေပြီ ဖြစ်တဲ့ ဗီယက်နမ်နိုင်ငံသူ အဘွားလီထင်းဟာ ၂၀၀၇ ခုနှစ်မှာ ကွန်ပျူတာပညာရပ်ကို စတင်လေ့လာခဲ့ပါတယ်။

ဒီစာအုပ်ကို ရေးစဉ်က သူမရဲ့ အသက်ဟာ ၈၇ နှစ် ရှိနေပြီ ဖြစ်သလို မော်စကိုရောက်နေတဲ့ သူမရဲ့ မြေးနဲ့လည်း Skype နဲ့ရိုက်ပြီး အဆက်အသွယ်လုပ်နေခဲ့ပါတယ်။ ဒါတင်မက Google နဲ့Yahoo တို့မှ နေ့စဉ်သတင်းများကိုလည်း ပုံမှန်ကြည့်ပါတယ်။ ဒါ့အပြင် သူမကိုယ်တိုင် ထောင်ထားတဲ့ Facebook ပေ့ချ်ကိုလည်း အကြောင်းအရာသစ်တွေ ပုံမှန်တင်နေသူ ဖြစ်ပါတယ်။

လီထင်းရဲ့ ကိုယ်ရေးအတ္ထုပ္ပတ္တိ

ဗီယက်နမ်ရဲ့ အင်တာနက်အကျွမ်းဆုံး သက်ကြီးအဘွားအိုတစ်ဦးအဖြစ် သတ်မှတ်ခံရတဲ့ လီထင်းရဲ့ ဘဝနဲ့ပညာလိုလားတဲ့ စိတ်ဓါတ်ကတော့ အတုယူအားကျဖွယ် ကောင်းပါတယ်။ အသက်ကြီးရင့်မှုကြောင့် ပါးစပ်ထဲက သွားအကုန်လုံးနီးပါး ဆုံးရှုံးထားပြီး ဆိုးဆိုးဝါးဝါး ခါးကိုင်းတဲ့ ပြဿနာရှိထားတာကြောင့် အိပ်ရာထဲ လဲနေရတာ များပေမယ့် သူမရဲ့ သိချင်တတ်ချင်စိတ်ကတော့ ကမ္ဘာတစ်ခွင်ကို ဖြန့်ကျက်ထားပါတယ်။

"ကျွန်မအသက်က ၁၀၀ နီးပါး ရှိနေပြီ ဆိုပေမယ့် စိတ်ဓါတ်ကတော့ အသက် ၂၀ မှာပဲ ရှိသေးတယ်ရှင့်" လို့ပြောတတ်တဲ့ လီထင်းကို အင်တာနက်သုံးသူ လူငယ်အသိုင်းအဝိုင်းမှ Lady Teen နဲ့Forever Young စတဲ့ နာမည်ပြောင်များ ပေးထားပါတယ်။

အဘွားအို လီထိုင်းဟာ ၁၉၂၀ ပြည့်နှစ်မှာ မွေးဖွားခဲ့ပြီး အနှိမ်ခံမိန်းမသားဘဝကို ပယ်ပယ်နယ်နယ်ကြီး ဖြတ်သန်းခဲ့သူ ဖြစ်ပါတယ်။ ဗီယက်နမ်နိုင်ငံရဲ့ ယဉ်ကျေးမှုုအရ အမျိုးသမီးများ စာသင်ကြားခွင့်မရှိတဲ့ အချိန်မှာ သူမဟာ စာတတ်ဖို့အတွက် အဖေ့ရဲ့စာအုပ်တွေကို ခိုးပြီး စောင်နဲ့အုပ်ကာ ညဘက်တွေမှာ လေ့လာခဲ့ပါတယ်။

ဒီနည်းနဲ့စာရေးစာဖတ်နည်းများကို သင်ယူခဲ့သလို ပန်းချီရေးဆွဲမှုကိုလည်း လေ့လာခဲ့ပါတယ်။ လီထင်းရဲ့ တော်လှန်တဲ့စိတ်ဓါတ်ကို နိုင်ငံရေးမှာပါ တွေ့မြင်ရမှာပါ။ အကြောင်းကတော့ သူမဟာ ဒုတိယကမ္ဘာစစ်အတွင်း ဂျပန်တော်လှန်ရေးနဲ့စစ်အလွန် ဗီယက်နမ်-အမေရိကန်စစ်ပွဲများအတွင်း အမျိုးသား လွတ်မြောက်ရေးအသင်းဖြစ်တဲ့ Viet Minh မှာ ပါဝင်ဆင်နွဲှခဲ့သူ ရဲရဲတောက် တော်လှန်ရေးသမားကြီးလည်း ဖြစ်ပါတယ်။

နိုင်ငံ့အရေးကို အလေးအနက် လုပ်နေပြီး နိုင်ငံကို ချစ်တယ်ဆိုတဲ့ သူမဟာ စစ်ကိုတော့ မုန်းတီးသလို ဗီယက်နမ်ကို ကိုယ့်မင်းကိုယ့်ချင်းနဲ့ဖြစ်စေချင်တဲ့ စိတ်တစ်ခုကြောင့်သာ နိုင်ငံရေးမှာပတ်သတ်ခဲ့တာပါ လို့ဖွင့်ဟခဲ့ပါတယ်။

ပန်းချီအနုသုခုမတို့မှာ စိတ်အားထက်သန်လှတဲ့ လီထင်းဟာ လက်ရှိမှာ ပန်းချီကားပေါင်း ၂၀၀၀ ကျော်ရေးဆွဲခဲ့ပြီး  နေ့စဉ်မှတ်တမ်းနဲ့စာအုပ်ပေါင်း ၅၀ ခန့်ရေးသားပြီ ဖြစ်ပါတယ်။ သို့သော်လည်း လီထင်းအနေနဲ့တော်ပါပြီလို့ဘယ်အခါမှ မဆိုပါဘူး။ နောက်ထပ် လှမ်းနေတဲ့ သူမရဲ့ ခြေလှမ်းကျယ်တစ်ရပ်ကတော့ ဘဝတစ်ကွေ့မှာ ဆိုတဲ့ စာအုပ်ကြီးရေးဖို့ပြင်နေတာပါ။

ယဉ်ကျေးမှုအရ အကိုဖြစ်သူအနားတောင် မတ်တပ်ရပ်ခွင့် မရှိခဲ့သလို ပညာသင်ကြားခွင့် ပိတ်ပင်တားမြစ်ခံရတဲ့ အနှိမ်ခံ မိန်းမသားဘဝမှသည် ခေတ်မီနည်းပညာများကို ကျွမ်းကျွမ်းကျင်ကျင် အသုံးပြုပြီး ကမ္ဘာလောကကြီးကို နားဆင်နေတဲ့ လီထင်းဟာ ကမ္ဘာမြေအတွက် လှပတဲ့ ဆေးရောင်စုံရှုခင်းများကို ရေးဆွဲရင်း ၊ အကျိုးရှိစာအုပ်စာပေများ ရေးသားရင်း ဘဝရဲ့ ဆည်းဆာချိန်ကို အတင့်တယ်ဆုံး ဖြတ်သန်းနေပါတယ်။