ခန္ဓာကိုယ်တွင်းမှာ လိုအပ်တဲ့ ပိုတက်ဆီယံဓာတ်အကြောင်းကို များများစားစား ကြားရလေ့မရှိပါဘူး။ ဒါပေမဲ့ သိထားဖို့ လိုတယ်နော်။ ပိုတက်ဆီယံ (potassium)ဓာတ်ဟာ ကြွက်သားတွေကို ကြံ့ခိုင်စေပါတယ်။
အာရုံကြောတွေရဲ့လုပ်ဆောင်မှုကိုလည်း ကောင်းမွန်စေသလို နှလုံးကြွက်သားစနစ်ကိုလည်း ကျန်းမာစေတယ်တို့ ဖီလာဒဲဖီးယားအခြေစိုက် အာဟာရပညာရှင် ပရော်ဖက်ဆာ ဒေါက်တာ Janet Brill က ပြောပါတယ်။ အရွယ်ရောက်ပြီးလူတစ်ယောက်ဟာ ပျမ်းမျှအားဖြင့်တော့ ပိုတက်ဆီယံပမာဏ ၄၇၀၀ မီလီဂရမ် (4700 mg) လိုအပ်ပါတယ်။
အငံဓာတ် (potassium) များများစားလေလေ ခန္ဓာကိုယ်မှာ ပိုတက်ဆီယံတွေ များများစွန့်ထုတ်လေလေပါပဲ။ အခုပြောပြမယ့်အရာတွေ ကြုံနေရတယ်ဆိုရင်တော့ သင့်မှာ ပိုတက်ဆီယံဓာတ် ချို့တဲ့နေပါပြီ။ ဆရာဝန်နဲ့တိုင်ပင်ပြီး ပိုတက်ဆီယံပမာဏစစ်ဆေးမှု ပြုလုပ်ဖို့ အကြံပေးလိုက်ပါတယ်။
၁။ အမြဲတမ်းမောပန်းနုံးချိနေတယ်
ကိုယ်တွင်းကဆဲလ်တစ်ခုချင်းစီဟာ မှန်ကန်တဲ့ပိုတက်ဆီယံပမာဏကို လိုအပ်ကြပါတယ်။ ဒါမှသာ အလုပ်ကောင်းကောင်းလုပ်နိုင်မှာပါ။ ပိုတက်ဆီယံလုံလောက်လောက်မရရင် ဆဲလ်တွေ အလုပ်ကောင်းကောင်းမလုပ်လို့ လူက အမြဲတမးမောပန်းနွမ်းနယ်နေပါတယ်။ လူကမူးဝေမောပန်းနေတာ နေ့တိုင်းလိုလိုဖြစ်နေပြီ။ အိပ်ရေးဝ၀ အိပ်သည့်တိုင် မောပန်းနွမ်းနယ်နေတုန်းပဲဆိုရင်တော့ ပိုတက်ဆီယံမလုံလာက်တာ ဖြစ်နိုင်ပါတယ်။
၂။ သွေးတိုး
ပိုတက်ဆီယံဓာတ်က သွေးကြောတွေကို သက်တောင့်သက်သာဖြစ်အောင် လုပ်ပေးပါတယ်။ ပိုတက်ဆီယံမလုံလောက်တော့ သွေးကြောတွေ တင်းကျပ်မှုဖြစ်စေပြီး သွေးတိုးလာပါတယ်။
၃။ ကြွက်သားတွေအားနည်းတယ်
အစပိုင်းမှာ ပြောခဲ့သလိုပဲ ပိုတက်ဆီယံက ကြွက်သားတွေကို ကြံ့ခိုင်စေတဲ့အရာပါ။ ပိုတက်ဆီယံ မလုံလောက်တဲ့အခါ ကြွက်သားတွေ တင်းရင်းမှုမရှိဘဲ အားပျော့နေတယ်။ လုပ်နေကျလေ့ကျင့်ခန်းတွေ လုပ်ရင်တောင် ကိုက်ခဲနာကျင်မှုကို ခံစားရပါတယ်။
၄။ နှလုံးခုန်မမှန်ဘူး
ကြောက်စရာကောင်းတဲ့ အချက်တစ်ခုကတော့ နှလုံးခုန်မမှန်တော့တာပါ။ ရုတ်တရက်ဆိုသလို နှလုံးခုန်နှုန်းက အရမ်းမြန်လာပါတယ်။ နှလုံးခုန်နှုန်းမြန်လာရခြင်းရဲ့ အကြောင်းကတော့ အများကြီးရှိတတ်ပါတယ်။ ယင်းအကြောင်းရင်းတွေထဲကမှ ပိုတက်ဆီယံဓာတ် ချို့တဲ့ခြင်းကလည်း တစ်ခုအပါအဝင်ပါပဲ။
၅။ ဝမ်းချုပ်တယ်
ပိုတက်ဆီယံ မလုံလောက်ခြင်းရဲ့ နောက်ထပ်လက္ခဏာတစ်ခုကတော့ ဝမ်းချုပ်တာပါ။ အစာခြေစနစ်ကလည်း လုံလောက်တဲ့ပိုတက်ဆီယံကိုမရတော့ ဗိုက်အောင့်တာနဲ့ ကြုံရနိုင်ပါတယ်။ ဝမ်းလည်းချုပ်ပါတယ်။
၆။ ထုံကျင်တယ်
အာရုံကြောတွေ ပုံမှန်အလုပ်လုပ်ဖို့ ထောက်ပံ့ပေးတဲ့ ပိုတက်ဆီယံက ခန္ဓာကိုယ်တွင်းမှာ လုံလောက်စွာ မရှိဘူးဆိုရင် လူက ထုံကျင်မှုကို ခံစားရပါတယ်။ ခန္ဓာကိုယ်မှာ တဖျဉ်းဖျဉ်းနဲ့ ကျဉ်နေတတ်ပါတယ်။ အပ်လိုမျိုး ချွန်တဲ့အရာတွေနဲ့ လက်ထိပ်၊ ခြေထိပ်တွေကို ထိုးဆွကြည့်ချင်စိတ်တွေ ဖြစ်လာတဲ့အထိပါပဲ။
Source : Prevention