ကျွန်တော်တို့ မြန်မာလူမျိုးအများစုရဲ့ နေ့စဉ်အစားအသောက်မှာ မပါမဖြစ်ကတော့ ထမင်းဖြူ (white rice) ပါပဲ။ ထမင်းဖြူစားခြင်းမှာ အာဟာရအကျိုးကျေးဇူးတွေရှိသလို ကျန်းမာရေးအတွက် မသင့်တော်တဲ့ ဆိုးကျိုးတွေလည်း ရှိပါတယ်။ အဓိကကတော့ ထမင်းဖြူအများကြီးစားမိရင် ကျန်းမာရေးအတွက် ဆိုးကျိုးတွေ ဖြစ်စေနိုင်တာပါ။
အဓိကကတော့ ဝိတ်တက်လာမှာပါ။ နောက်ပြီး ထမင်းဖြူအများကြီး စားမိရင် အစာအိမ်မှာ ဝန်ပိစေနိုင်တဲ့အတွက် ကျွမ်းကျင်သူတွေက ညဘက်မှာထမင်းဖြူစားခြင်းကို ရှောင်ရှားဖို့ တိုက်တွန်းကြတာဖြစ်ပါတယ်။ ထမင်းဖြူကို တတ်နိုင်သမျှ ရှောင်ကြဉ်မယ်ဆိုရင် ရရှိနိုင်တဲ့ ကောင်းကျိုးတွေကတော့...
၁။ သွေးတွင်းသကြားပမာဏကို ထိန်းညှိပေးတယ်
ထမင်းဖြူမစားခြင်းက သွေးတွင်းသကြားပမာဏကို ပုံမှန်အတိုင်းဖြစ်အောင် ထိန်းညှိပေးနိုင်ပါတယ်။ ဘာကြောင့်လဲဆိုတော့ ထမင်းဖြူအများကြီးစားခြင်းက သွေးတွင်းသကြားဓာတ်ကို ဆောင့်တက် လာစေနိုင်လို့ပါပဲ။ ဒါကြောင့် ဆီးချိုသမားတွေ ထမင်းဖြူကို တတ်နိုင်သမျှ ရှောင်ကြတာပဲဖြစ်ပါတယ်။
၂။ ဝမ်းချုပ်ခြင်းကို သက်သာစေတယ်
ထမင်းဖြူကို ပုံမှန်စားသူတွေဟာ ကြာလာတာနဲ့တပြိုင်နက် ဝမ်းချုပ်ခြင်းကို ခံစားလာရနိုင်ခြေရှိပါတယ်။ ထမင်းဖြူမှာ အမျှင်ဓာတ်များများစားစားမပါဝင်တဲ့အတွက် အစာအိမ်နဲ့ အူလမ်းကြောင်း တလျှောက် ချောမွေ့နေအောင် မကူညီပေးနိုင်ပါဘူး။ အကျိုးဆက်အနေနဲ့ ဝမ်းချုပ်၊ ဝမ်းကိုက်ခြင်း ဖြစ်လာရပါတယ်။
၃။ ကိုယ်အလေးချိန်ထိန်းညှိပေးတယ်
ကိုယ်အလေးချိန်ကိုထိန်းညှိဖို့အတွက် ထမင်းဖြူကို အနည်းဆုံး တစ်ပတ် တစ်ကြိမ်လောက် လုံးဝမစားဘဲ နေနိုင်ရင်အကောင်းဆုံးပါပဲ။ ထမင်းဖြူထဲမှာ ကာဘိုဟိုက်ဒရိတ်ပမာဏ အများကြီးပါဝင်တဲ့အတွက် များများစားမိရင် ဝိတ်တက်လာဖို့ပဲရှိပါတယ်။
၄။ အာဟာရတန်ဖိုးမကျစေဘူး
တချို့က ထင်ကြပါတယ်။ ထမင်းမစားဘဲနေရင် အာဟာရတန်ဖိုး မပြည့်ဘဲ နေမှာပေါ့ဆိုပြီး။ တကယ်တမ်းကျတော့ ထမင်းမှာပါဝင်တဲ့ အာဟာရတန်ဖိုးကို ထမင်းလောက် ဘေးထွက်ဆိုးကျိုး မများတဲ့ အစိမ်းရောင် ဟင်းသီးဟင်းရွက်တွေကနေ ရရှိနိုင်ပါတယ်။ ထမင်းမစားရရင် မတင်းတိမ်နိုင်ဘူးဆိုရင်တော့ ထမင်းဖြူအစား ဆန်ညိုထမင်း (brown rice) ကို ရွေးချယ်သင့်ပါတယ်။
၅။ ဗိုက်ဆာမလွယ်တော့ဘူး
ထမင်းဖြူစားတဲ့လူတွေအနေနဲ့ ထမင်းဖြူစားထားပြီးရင် ခဏခဏဗိုက်ပြန်ဆာတတ်တာကို ကြုံဖူးကြပါလိမ့်မယ်။ ဒါဟာ ထမင်းဖြူထဲမှာပါဝင်တဲ့ ကစီဓာတ်နဲ့ ကာဘိုဟိုက်ဒရိတ်ကြောင့်ပါပဲ။ ထမင်းဖြူကို ရှောင်လိုက်မယ်ဆိုရင် ဒီပြဿနာတွေလည်း ကင်းဝေးသွားမှာပါ။
Source: Boldsky
Share