FGM ကို ဘာကြောင့်လုပ်ရတာလဲ။ 

FGM ကို ရိုးရာအစဉ်အလာတွေ၊ အယူအဆတွေအမျိုးမျိုးကြောင့် ကျင့်သုံးပါတယ်။

FGM ကိုများသောအားဖြင့် အမျိုးသမီးတွေမှာ ကာမစိတ်မဖြစ်ပေါ်အောင် ထိန်းချုပ်ဖို့အတွက် အများဆုံးကျင့်သုံးပါတယ်။ တချို့နိုင်ငံတွေမှာ အမျိုးသမီးတွေရဲ့ လိင်အင်္ဂါကိုဖြတ်တောက်ခြင်းဖြင့် အမျိုးသမီးတွေမှာ ကာမစိတ်ဖြစ်ပေါ်မှုကိုထိန်းချုပ်နိုင်ပြီး၊ အိမ်ထောင်မပြုခင်အချိန်အထိ အပျိုစင်ဘဝကို ထိန်းသိမ်းနိုင်မှာဖြစ်တယ်လို့ ယူဆကြောင်း ကမ္ဘာ့ကျန်းမာရေးအဖွဲ့အစည်း WHO ရဲ့အဆိုအရသိရပါတယ်။

အစ္စလာမ်ဘာသာ ၊ ခရစ်ယာန်ဘာသာ နဲ့ အခြားဘာသာခြားလူနည်းစုတွေမှာလည်း FGM ကို ကျင့်သုံးကြပါတယ်။ အစ္စလာမ်နဲ့ ခရစ်ယာန်ဘာသာတွေမှာ FGM ကို ဘာသာရေးအရ အားပေးတာမျိုးမရှိပေမယ့် ဘာသာရေးပေါ်မှာ ခံယူတဲ့အယူဝါဒတွေကြောင့် တခါတလေမှာ ကျင့်သုံးကြတာလည်းဖြစ်ပါတယ်။

လူမူရေး

ဘာသာရေးနဲ့ဆက်နွယ်ပြီး FGM ကို လူ့အသိုင်းအဝိုင်းကြားမှာ ဒါကို လူမှုရေးတာဝန်အဖြစ်သတ်မှတ်ကြပါတယ်။ အရွယ်ရောက်မိန်းကလေးတွေ အိမ်ထောင်မကျခင်မှာ လုပ်ကိုလုပ်ရမယ့် အလေ့အထတစ်ခုအနေနဲ့ သတ်မှတ်ကြပါတယ်။ အိမ်ထောင်မပြုခင်မှာ အပျိုစင်ဘဝကို ထိန်းသိမ်းဖို့ နဲ့ အိမ်ထောင်ဖက်အပေါ်မှာ သစ္စာရှိဖို့ ပတ်ဝန်းကျင်ရဲ့ အားပေးလှုံ့ဆော်မှုတွေက အမျိုးသမီးတွေကို လိင်အင်္ဂါဖြတ်တောက်ဖို့ ဖိအားတစ်ခုဖြစ်လာပါတယ်။

စီးပွားရေး

FGM ကိုကျင့်သုံးတဲ့ စီးပွားရေးမဖွံ့ဖြိုးတဲ့ နိုင်ငံတချို့မှာ အမျိုးသမီးတွေအနေနဲ့ အိမ်ထောက်ဖက်အပေါ်မှာ မှီခိုရတဲ့ အနေအထားကြောင့် FGM ကို ကျင့်သုံးဖို့ ဖြစ်လာပါတယ်။

 

အလှအပ

FGM ကို တချို့နေရာတွေမှာတော့ အလှအပခွဲစိတ်ပြုပြင်မှုတစ်ခုအဖြစ် ကျင့်သုံးပါတယ်။

ဘယ်သူတွေက လုပ်ပေးတာလဲ။

ရှေးရိုးစွဲဆန်တဲ့ လူ့အဖွဲ့အစည်းတွေမှာ ဆေးပညာကို စနစ်တကျသင်ယူပြီးမြောက်ထားခြင်းမရှိတဲ့သူတွေက အမျိုးသမီးလိင်အင်္ဂါဖြတ်တောက် ခွဲစိတ်ကြပါတယ်။ တချို့နေရာတွေမှာတော့ တိုင်းရင်ဆေးဆရာတွေ၊ ပရောဂဆရာတွေက ခွဲစိတ်ကြပါတယ်။

ဘယ်အရွယ်မှာ စကျင့်သုံးတာလဲ

နိုင်ငံအလိုက် FGM ကို မွေးကင်းစအရွယ်မိန်းကလေးတွေကနေ၊ အသက် ၁၅နှစ်အရွယ်အတွင်း မိန်းကလေးတွေမှာ အများဆုံးကျင့်သုံးကြပါတယ်။

FGM ကြောင့် အမျိုးသမီးတွေမှာ ဘယ်လိုထိခိုက်စေသလဲ။

FGM ကျင့်သုံးတဲ့အတွက် အမျိုးသမီးတွေမှာကျန်းမာရေးအကျိုးအမြတ် ဘာတစ်ခုမှ မရတဲ့အပြင် ဘဝတလျှောက်လုံးမှာ ရုပ်ပိုင်းဆိုင်ရာရော၊ စိတ်ပိုင်းဆိုင်ရာ အမာရွတ်တစ်ခုကျန်သွားစေပါတယ်။ FGM ကြောင့်ဖြစ်တဲ့ ပြဿနာတွေမှာ

• သွေးထွက်လွန်ခြင်း၊ အလွန်အကျွံနာကျင်ခြင်း၊ ကတုန်ကယင်ဖြစ်ခြင်း ကနေ အသက်သေဆုံးတဲ့အထိဖြစ်ခြင်း
• ရောဂါပိုးဝင်ပြီးတခါတရံ အသက်သေဆုံးတဲ့အထိဖြစ်ခြင်း
• ဆီးသွားတဲ့အချိန်နဲ့ ဓမ္မတာလာချိန်တွေ ခက်ခဲခြင်း
• အိတ်ချ်အိုင်ဗီ နဲ့ တခြားဆီးလမ်းကြောင်းနဲ့ဆိုင်တဲ့ ရောဂါပိုးများ ကူးစက်လွယ်ခြင်း
• စိတ်ရောဂါ ပြဿနာများကြုံရခြင်း
• လိင်ဆက်ဆံတဲ့အခါမှာ နာကျင်ခြင်း
• သားဖွားစဉ်မှာ တခြားရှုပ်ထွေးတဲ့ ပြဿနာများကြုံရခြင်း

အမျိုးသမီးလိင်အင်္ဂါဖြတ်တောက်နည်း အဆင့်ဆင့်

FGM ကို ဘယ်နိုင်ငံတွေမှာ ကျင့်သုံးလဲ

အမျိုးသမီးလိင်အင်္ဂါဖြတ်တောက်ခြင်းကို  FGM အာရှ၊ အာဖရိကနဲ့ အရှေ့အလယ်ပိုင်းနိုင်ငံတော်တော်များများမှာ ကျင့်သုံးပါတယ်။

အာရှ နိုင်ငံတွေမှာ အိန္ဒိယ၊ အင်ဒိုနီးရှား၊ မလေးရှား၊ ပါကစ္စတန်နဲ့ သီရိလင်္ကာ နိုင်ငံတွေမှာ ကျင့်သုံးကြပါတယ်။

အာဖရိက မှာ ဘီနင်၊ ဘူကီနာဖာဆို၊ ကင်မရွန်း၊ ဗဟိုအာဖရိကသမ္မတနိုင်ငံ အပါအဝင်နိုင်ငံပေါင်း  ၂၈နိုင်ငံမှာ ကျင့်သုံးပြီး အရှေ့အလယ်ပိုင်းမှာတော့ ယီမင်၊ အိုမန်၊ အီရတ်၊ အီရန်၊ ပါလစ္စတိုင်း၊ အီဂျစ်နဲ့ အာရပ်စော်ဘွားများပြည်ထောင်စုနိုင်ငံမှာ ကျင့်သုံးပါတယ်။

ဒါ့အပြင် ဥရောပအရှေ့ပိုင်းမှာတော့ ဂျော်ဂျီယာ နဲ့ ရုရှား၊ တောင်အမေရိကမှာ ကိုလံဘီယာ၊ အီကွေဒေါ၊ ပနားမား နဲ့ ပီရူး နိုင်ငံတို့မှာလည်းကျင့်သုံးပါတယ်။

အနောက်နိုင်ငံတွေဖြစ်တဲ့ သြစတြေးလျ၊ ကနေဒါ၊ နယူးဇီလန်၊ အမေရိကန်နိုင်ငံ၊ နဲ့ ယူကေတို့မှာတော့ အခြားနိုင်ငံတွေကို ပြန့်ကျဲထွက်ခွာပြီး အခြေချနိုင်ထိုင်တဲ့ လူမျိုးတွေကြားမှာ ကျင့်သုံးကြတာကိုတွေ့ရပါတယ်။

Source - Aljezeera