ကံ၊ကံ၏အကျိုးကို ဗုဒ္ဓဘာသာဝင်တိုင်းလက်ခံထားကြပေမယ့် လောဘ၊ဒေါသ၊မောဟတွေကြောင့် မေ့မေ့လျော့လျော့နဲ့ မကောင်းမှုတွေကို ကျူးလွန်မိတတ်သလို ကုသိုလ်ကောင်းမှုတွေပြုကြဖို့လည်းမေ့လျော့နေတတ်ကြပါတယ်။

ဒီလိုမဖြစ်ရအောင် ကံ၊ကံ၏အကျိုးကိုမမေ့လျော့ဖို့ အကောင်းဆုံးနှိုးဆော်လိုက်တာကတော့ ၂၀၁၈ ခုနှစ်နှစ်ကုန်ပိုင်းမှာ ထွက်ရှိလာတဲ့ မြန်မာရုပ်ရှင်ဇာတ်ကားကောင်းတစ်ကားဖြစ်တဲ့ ကြတ်ဂူရုပ်ရှင်ဇာတ်ကားကြီးပါပဲ။

ဇာတ်လမ်း၊ဇာတ်အိမ်ခိုင်မာကောင်းမွန်သလို ရိုက်ကူးပုံတွေလည်းသေသပ်လှပတာကြောင့် ထူးခြားဆန်းကြယ်တဲ့ ကြတ်ဂူကြီးအပြင် ကယားပြည်နယ်ရဲ့ လှပတဲ့ရှုခင်းတွေကိုလည်း ရင်သပ်ရှုမောဖွယ်ခံစားကြည့်ရှုကြရမှာပါ။

သရုပ်ဆောင်ပိုင်းမှာလည်း  လူမင်း၊မြင့်မြတ်၊ ထွန်းအိန္ဒြာဗိုလ်၊ အိန္ဒြာကျော်ဇင်တို့ဟာ ဝါရင့်သရုပ်ဆောင်တွေဖြစ်တာနဲ့ အညီကိုယ့်ရဲ့ဇာတ်ရုပ်ကိုအပီပြင်ဆုံးသရုပ်ဆောင်ထားပြီး ကျော်ထက်အောင်ကလည်း သရုပ်ဆောင်အသစ် တစ်ယောက်လို့ မထင်ရလောက်အောင်ကို ပီပီပြင်ပြင်သရုပ်ဆောင်သွားခဲ့ပါတယ်။

ဇာတ်လမ်းအကျဉ်း

ထော်ကြီး (မြင့်မြတ်) ဟာ အသားဟင်းပါမှထမင်းစားတတ်တဲ့ မုဆိုးတစ်ဦးပါ။ သူ့ရဲ့ဖခင် (လူမင်း)ဟာလည်း မုဆိုးတစ်ဦးပဲ ဖြစ်ပြီး ပွဲတော်ရက်မှာတောလိုက်ထွက်ရင်း ချောက်ထဲပြုတ်ကျသေဆုံးကာ ပြိတ္တာဘုံမှာရောက်ရှိလို့နေပါတယ်။ ထော်ကြီးရဲ့ မိခင် (ထွန်းအိန္ဒြာဗိုလ်) ဟာလည်း ခင်ပွန်းဖြစ်သူဆုံးပါးမှုကြောင့် စိတ်ထိခိုက်ပြီး တစ်ခါတစ်ခါ စိတ်ဖောက်ကာ ကြတ်ဂူထဲက အခေါင်းတစ်ခုထဲမှာ သွားအိပ်ရင်းခင်ပွန်းဖြစ်သူပြန်အလာကိုစောင့်နေတတ်သူပါ။ ရွှေမျှင်( အိန္ဒြာကျော်ဇင်) က ထော်ကြီး တစ်ဖက်သတ်ချစ်ရတဲ့ ရွာကအလှဆုံးကောင်မလေးတစ်ယောက်ဖြစ်ပါတယ်။ မြို့ကကျောင်းဆရာလေး (ကျော်ထက်အောင်) ရွာကိုရောက်လာပြီးရွှေမျှင်နဲ့ရင်းနှီးလာတာကြောင့် ထော်ကြီး နဲ့ ရွှေမျှင်ကြားပြဿနာတွေဖြစ်ကြရင်း ထော်ကြီးတစ်ယောက် ရွှေမျှင်ကိုစိတ်ဆိုးကာ ပွဲတော်ရက်မှာတောလိုက်ထွက်ဖို့ပြင်တဲ့အခါ.... ဖခင်ဖြစ်သူတုန်းကကြုံခဲ့ရတဲ့အဖြစ်ဆိုးနဲ့ ကြုံရမလား ၊ ထော်ကြီးရဲ့မိခင်၊ ကွယ်လွန်သွားပြီးပြိတ္တာဘုံရောက်နေတဲ့ ဖခင်နဲ့ရွှေမျှင်တို့က ထော်ကြီးတောလိုက် ထွက်မှာကို တားဆီးနိုင်မှာလား....ဘာတွေဆက်ဖြစ်မလဲဆိုတာကို စိတ်ဝင်စားဖွယ်ခံစားကြည့်ရှုကြရမှာပဲဖြစ်ပါတယ်။