နော်ဝေအတွက် အကြီးမားဆုံးဂိုးပြတ်နိုင်ပွဲဖြစ်ခဲ့ပါတယ်။

တိုက်စစ်ပိုင်းမှာ ဟာလန်း ဦးဆောင်လာတဲ့​ နော်ဝေအသင်းဟာ အာမေးနီးယားနဲ့ ခြေစမ်းပွဲမှာတော့ ပြိုင်ဘက်ကအသင်းကို ၉ ဂိုးအထိ သွင်းယူပြီး ဂိုးပြတ်အနိုင်ရရှိသွားခဲ့ပါတယ်။ ပွဲကစားချိန် ၁၇ မိနစ်မှာ အာမေးနီးယားကစားသမားတဦး ထုတ်ပယ်ခံရပြီးနောက် နော်ဝေတို့ စိတ်ကြိုက်ကစားနိုင်ခဲ့ပြီး အိမ်ကွင်းမှာ ဂိုးသွင်းလေ့ကျင့်သလိုကို ဖြစ်သွားခဲ့ပါတယ်။ 

ပထမပိုင်း ၂၄ မိနစ်ကနေ ၄၅ မိနစ်အတွင်း စုစုပေါင်း ၂၁ မိနစ်အတွင်းမှာ နော်ဝေတို့ ၅ ဂိုးအထိ သွင်းယူခဲ့တာပါ။ ဂျိူရှူဟွာကင်းက ၃ ဂိုး၊ ဟာလန်းက ၂ ဂိုး၊ ဆောလို့တ်က ၂ ဂိုး သောဗက်တ်နဲ့ ဒဲဟီးလ်က ၁ ဂိုးစီ သွင်းယူပေးခဲ့ကြတာပါ။ အာမေးနီးယားရဲ့ နာမည်ကျော်ကစားသမားမစ်ခီတာရန် အနားယူပြီးနောက်မှာ အာမးနီးယားတို့ ကြီးမားတဲ့ဂိုးပြတ်ရှုံးပွဲကို ရင်ဆိုင်ခဲ့ရတာဖြစ်ပါတယ်။ 

မစ်ခီတာရန်ကတော့ ပြီးခဲ့တဲ့လအတွင်းကပဲ နိုင်ငံတကာကစားသမားဘ၀ကနေ အနားယူပြီဖြစ်တယ်လို့ ကြေညာခဲ့တာဖြစ်ပါတယ်။ အာမေးနီးယားဟာ တယောက်လျော့သွားချိန်မှာ နော်ဝေကို ဘယ်လိုမှယှဉ်မကစားနိုင်ခဲ့တော့ဘဲ ဂိုးတွေဆက်တိုက်ပေးခဲ့ရကာ သိက္ခာဆယ်ချေပဂိုးလေး ၁ ဂိုးတောင် ပြန်မရခဲ့ဘဲ ရှိခဲ့ပါတယ်။

နော်ဝေကတော့ အသင်းသမိုင်းမှာ အကြီးမားဆုံးနိုင်ပွဲတပွဲကို ရယူနိုင်ခဲ့တာဖြစ်ပါတယ်။ ကမ္ဘာ့ဖလားနဲ့ လွဲချော်ခဲ့ရမှုတွေကို ပေါက်ကွဲခဲ့သလားလို့ ထင်မှတ်ရလောက်အောင် အိမ်ကွင်းမှာ ဂိုးတွေ ဒလဟောသွင်းပြခဲ့တာလည်းဖြစ်ပါတယ်။ ဟာလန်းကတော့ လက်ရွေးစင်အသင်းအတွက် ၁၇ ပွဲကစားပေးအပြီးမှာ ၁၅ ဂိုးအထိ ရရှိခဲ့ပြီဖြစ်ပါတယ်။ 


ဒါတောင်မှ ဟာလန်းက ဒဏ်ရာကြောင့် လူစားလဲလှယ်ခံခဲ့ရတာဖြစ်ပြီး သူသာ ဆက်ကစားနိုင်ခဲ့မယ်ဆိုရင် နော်ဝေက ဒီထက်တောင်မှ သွင်းယူနိုင်ခဲ့ဖွယ်ရာရှိပါတယ်။


Share

က္က