ယာဂန် ကလော့ပ်ရဲ့အသင်းဟာ ယနေ့ည ၁၀ နာရီမှာ အာဆင်နယ်အသင်းကို အိမ်ကွင်း အန်းဖီးမှာ လက်ခံယှဉ်ပြိုင်သွားရမှာဖြစ်ပြီး လီဗာပူးလ်ကစားသမားတွေဟာ ထုံးစံအတိုင်း ပွဲမတိုင်ခင် ပွဲကြိုလမ်းလျှောက်ထွက်ခဲ့ကြတာဖြစ်ပါတယ်။ ဒါပေမယ့်လည်း နူးညက်ဇ်ဟာ လီဗာပူးလ်ကစားသမားတွေထဲမှာ မပါဝင်ခဲ့တာကို မြင်တွေ့ခဲ့ရတယ်လို့ The Anfield Talk က ဖော်ပြခဲ့ပြီး ပရိသတ်တွေဟာ ဥရုဂွေးကြယ်ပွင့်တိုက်စစ်မှူးအနေနဲ့ ဂန်းနားတွေနဲ့ ပွဲစဉ်ကို လွဲချော်နိုင်တယ်လို့ ယူဆနေကြတာဖြစ်ပါတယ်။

ဒါဝင် နူးညက်ဇ်ဟာ ခြေစွမ်းကောင်း ရရှိနေခဲ့တဲ့ ကစားသမားဖြစ်ပြီး လီဗာပူးလ်အတွက် ပြိုင်ပွဲစုံ ၃၅ ပွဲမှာ သွင်းဂိုး ၁၄ ဂိုးနဲ့ ဂိုးဖန်တီးမှု ၄ ကြိမ် ပြုလုပ်ထားတဲ့ ကစားသမားဖြစ်ပြီး ၎င်းမပါဝင်နိင်မှုက ကလော့ပ်အတွက် ခေါင်းကိုက်စရာ ကိစ္စကြီး ဖြစ်လာမှာဖြစ်ပါတယ်။

လီဗာပူးလ်ဟာ ပရီးမီဒးယားလိင်္ဂအမှတ်ပေးဇယားအဆင့် ၈ နေရာမှာ ရပ်တည်နေပြီး အမှတ်ပေးဇယားထိပ်ဆုံးမှာ မန်ချက်စတာစီးတီးကို ၈ မှတ်ပြန်ဖြတ်နိုင်ဖို့ ကြိုးပမ်းသွားမယ့် အာဆင်နယ်နဲ့ ရင်ဆိုင်သွားရမှာ ဖြစ်ပါတယ်။

ပရိသတ်တစ်ဦးက ဒါဝင် နူးညက်ဇ် လွဲချော်နိုင်ခြေရှိနေမှုကြောင့် လီဗာပူးလ်အသင်းအနေနဲ့ ရှုံးနိမ့်တော့မယ်လို့တောင် ဟောကိန်းထုတ်ခဲ့ပြီးဖြစ်ပါတယ်။ “ငါတို့အတွက် တကယ်ကို ပြီးသွားပြီ။”လို့ မှတ်ချက်ပေးခဲ့တာဖြစ်ပြီး ဒါဝင် နူးညက်ဇ်ကလွဲချော်နိုင်ခြေအတွက် စိုးရိမ်နေတဲ့ နောက်ထပ်ပရိသတ်တစ်ဦးကလည်း “ဒီအသင်းမှာ ကစားသမားတွေ ရုတ်တရက်ကြီး လွဲချော်ရအောင် ဘာတွေ ဖြစ်နေတာလဲ”လို့ မှတ်ချက်ပေးခဲ့ပါတယ်။