မန်ချက်စတာယူနိုက်တက်အသင်းဟာ အသင်းရဲ့နောက်ခံကစားသမား မားကို့စ်ရိုဟိုကို ၎င်းရဲ့မွေးနေ့မှာ အသင်းဟောင်း အက်စတူဒီယန်တက်စ်အသင်းနဲ့ လေ့ကျင့်ရေးပြုလုပ်ဖို့ ခွင့်ပြုပေးခဲ့ပါတယ်။

ရိုဟိုဟာ ယာယီနည်းပြ အိုလီဂန်းနားဆိုးလ်ရှား လက်ထက်မှာလည်း ပွဲထွက်ကစားခွင့် မရရှိခဲ့ပေမယ့် နောက်ဆုံး ၅ ပွဲမှာ အရန်လူစာရင်းထဲ ထည့်သွင်းခြင်းခံခဲ့ရပါတယ်။ မားကို့စ်ရိုဟိုဟာ လက်ရှိအချိန်မှာ နိုင်ငံတကာပွဲစဉ် အားလပ်ရက်ရရှိနေတဲ့အတွက် အာဂျင်တီးနားကို ရောက်ရှိနေပါတယ်။

မန်ချက်စတာယူနိုက်တက်အသင်းက ၎င်းရဲ့ပုံစံကို ထိန်းသိမ်းရာမှာအကူအညီဖြစ်စေဖို့ ယမန်နေ့က အက်စတူဒီယန်တက်စ်အသင်းနဲ့ လေ့ကျင့်ရေးပြုလုပ်မှာကို ခွင့်ပြုပေးခဲ့တယ်လို့ ဆိုပါတယ်။ ရိုဟိုဟာ အသက် ၁၀ နှစ်အရွယ်မှာ အက်စတူဒီယန်တက်စ်အသင်းကို ရောက်ရှိခဲ့သူဖြစ်ပြီး လူငယ်အကယ်ဒမီကနေ ပထမအသင်းအတွက် ခေါ်ယူခံခဲ့ရပြီးနောက် ၅၃ ပွဲပါဝင်ကစားပေးခဲ့သူဖြစ်ပါတယ်။