အခြေခံပညာကျောင်းတွေပြန်ဖွင့်ပါက ဆရာ၊ဆရာမတွေနဲ့ ကျောင်းသားတွေအတွက် ကျောင်းတိုင်းမှာ ကျန်းမာရေးနားနေဆောင်အခန်း (၁)ခန်းဆီထားရှိသွားမယ်လို့ အခြေခံပညာဦးစီးဌာနမှသိရပါတယ်။

“အဓိကကတော့ အရေးပေါ်ကျန်းမာရေးတစ်ခုခုဖြစ်လာရင် အေးအေးဆေးဆေးနားနေလို့ရအောင်ပါ။ ကျန်းမာရေးစောင့်ရှောက်မှုပစ္စည်းတွေထည့်သွင်းထားမှာမဟုတ်တော့ ကျန်းမာရေးစောင့်ရှောက်မှုခန်းတော့မဟုတ်ပါဘူး။ ဆေးရုံကကျန်းမာရေးဝန်ထမ်းတွေရောက်မလာခင်အထိခဏနားနေလို့ရအောင်ပါ။ ပြီးတော့ ကျန်းမာရေးနဲ့ပတ်သက်ပြီးလည်း ဆိုးဆိုးရွားရွားမဖြစ်နိုင်ပါဘူး။ အစကတည်းက နေမကောင်းဖြစ်နေတဲ့ ဆရာတွေ ကျောင်းသားတွေကိုကျောင်းမလာဖို့မှာထားတော့ ကျောင်းမှာတစ်ခုခုဖြစ်တဲ့သူတွေကလည်း ရုတ်တရက်မူးလဲတဲ့သူတွေလောက်ပါပဲရှိမယ်ထင်ပါတယ်”လို့ ဒေါက်တာတင်မောင်ဝင်းကပြောပါတယ်။

မြန်မာနိုင်ငံမှာ အခြေခံပညာကျောင်းပေါင်း (၄)သောင်းကျော်ရှိပြီး ကျောင်းအားလုံးမှာ ခုလိုလုပ်ဆောင်သွားမယ်လို့သိရပါတယ်။ ကျောင်းသားကျောင်းသူပေါင်းကတော့ တစ်နိုင်ငံလုံးမှာ မူလတန်းကနေ အထက်တန်း အဆင့်ထိ (၉.၇)သန်းခန့်ရှိပါတယ်။ မြို့ပေါ်ကျောင်းတွေမှာ အခန်းတစ်ခန်းသီးသန့်ထားဖို့ အခက်အခဲမရှိပေမယ့် နယ်ကျောင်းတွေမှာတော့ အခန်းမဟုတ်ရင်တောင် ကျန်းမာရေးအတွက် သီးသန့်နားလို့ရမယ့်နေရာလေး ထားရှိတာမျိုးတွေရှိလာပါလိမ့်မယ်လို့ ဒေါက်တာတင်မောင်ဝင်းကပြောပါတယ်။