ဖူလ်ဟမ်ကို ၂-ဝဂိုးနဲ့အနိုင်ရခဲ့တဲ့ပွဲမှာ ဒဏ်ရာရခဲ့တဲ့ တိုက်စစ်မှူး အဂူရိုရဲ့ဒဏ်ရာအခြေအနေမပြင်းထန်ဖို့ မျှော်လင့်တယ်လို့ မန်စီးတီးနည်းပြ ဂွာဒီယိုလာက ပွဲအပြီးသတင်းစာရှင်းလင်းပွဲမှာပြောခဲ့ပါတယ်။

မန်စီးတီးအသင်းနည်းပြ ဂွာဒီယိုလာကတော့ အဂူရိုရဲ့ဒဏ်ရာအခြေအနေကို စိုးရိမ်နေပြီး မပြင်းထန်ဖို့ မျှော်လင့်ထားတယ်လို့ပြောပါတယ်။ “သူကလူစားလဲပြီးတော့ ကျွန်တော့်ကိုပြောတယ်။ ဒဏ်ရာရတာမျိုးတော့မဟုတ်ဘူး။ သူတစ်ခုခုခံစားနေရတယ်လို့ပြောပါတယ်။ ဒဏ်ရာမပြင်းထန်ဖို့တော့ မျှော်လင့်ထားတာပဲ။ ဆေးအဖွဲ့ကတော့ တနင်္လနေ့မှာ တိတိကျကျသိရမယ်လို့ ပြောထားပါတယ်။”လို့ ဂွာဒီယိုလာက ပွဲအပြီးသတင်းစာရှင်းလင်းပွဲမှာပြောခဲ့ပါတယ်။ ဂွာဒီယိုလာက ပွဲကို နေ့လည် ၁၂:၃၀နာရီမှာကစားခဲ့ရတဲ့အတွက် ကစားသမားတွေပင်ပန်းခဲ့တယ်လို့လည်း ပြောခဲ့ပါသေးတယ်။

မန်စီးတီးအသင်းဟာ ဖူလ်ဟမ်ကို ၂-ဝဂိုးနဲ့အနိုင်ရခဲ့တဲ့အတွက် အမှတ်ပေးဇယားကို ဆက်လက်ဦးဆောင်နိုင်ခဲ့ပြီး ချန်ပီယံဆုအတွက်ရေပန်းစားနေပါတယ်။ နည်းပြ ဂွာဒီယိုလာရဲ့မန်စီးတီးအသင်းဟာ ဒီနှစ်ဘောလုံးရာသီမှာ လိဂ်ဖလားချန်ပီယံဖြစ်ထားပြီး အက်ဖ်အေဖလား၊ ပရီးမီးယားလိဂ်နဲ့ ချန်ပီယံလိဂ်ပြိုင်ပွဲသုံးရပ်စလုံးလမ်းကြောင်းပေါ်မှာလည်း ရှိနေသေးတာကြောင့် ဖလားလေးလုံးအိပ်မက်ဆက်လက်ရှင်သန်နေပါတယ်။ တိုက်စစ်မှူး အဂူရိုကလည်း ဒီရာသီမှာ ပရီးမီးယားလိဂ်သွင်းဂိုး ၁၉ဂိုးနဲ့ သွင်းဂိုးအများဆုံးကစားသမားအဖြစ် ရပ်တည်နေပါတယ်။