အိမ်အကူမိန်းကလေးမနန်းမေဇင်ဦး အက်စစ်နဲ့ပက်လောင်းခံခဲ့ရတယ်ဆိုတဲ့အမှုမှ အိမ်ရှင်မနီနီနုနွယ်ဟာ အပြင်းအထန်နာကျင်စေမှုနဲ့ ပြီးခဲ့တဲ့ဖေဖော်ဝါရီလ ၂၇ ရက်နေ့က အလုပ်ကြမ်းနဲ့ထောင်ဒဏ် ၇ နှစ်ချမှတ်ခံခဲ့ရပြီး ဒီကနေ့ (စက်တင်ဘာလ ၁၆ ရက်) မှာလည်း ထပ်မံစွဲချက်တင်ထားတဲ့လူကုန်ကူးမှုနဲ့ အလုပ်နဲ့ထောင်ဒဏ် ၁၅ နှစ် ထပ်မံချမှတ်ခံခဲ့ရပါတယ်။

ြဖစ်စဉ်မှာ မနီနီနုနွယ်ရဲ့ယောက္ခမဖြစ်သူဒေါ်မိုးမိုးဟာ ၎င်းရဲ့ကုန်စုံဆိုင်မှာအကူအဖြစ်လုပ်ကိုင်ဖို့ မနန်းမေဇင်ဦးအားခေါ်ယူခဲ့ကြောင်း၊ မနန်းမေဇင်ဦးဟာ ဒေါ်မိုးမိုးကုန်စုံဆိုင်ပိတ်လိုက်ချိန်မှာ မနီနီနုနွယ်ရဲ့ဆိုင်မှာဆက်လုပ်ခဲ့ကြောင်း၊ အဲဒီနောက် ပြဿနာတစ်ခုနဲ့ပတ်သက်ပြီး မနီနီနုနွယ်က မနန်းမေဇင်ဦးအား အက်စစ်နဲ့ပက်ခဲ့ကြောင်း၊ အက်စစ်နဲ့ပက်ခံရမှုကြောင့် မနန်းမေဇင်ဦးမှာ ဝဲဘက်မျက်နှာတစ်ခြမ်းပျက်စီးခဲ့ပြီး ဝဲဘက်မျက်လုံးဆုံးရှုံးခဲ့ရကြောင်း၊ မနန်းမေဇင်ဦးဟာ ဒဏ်ရာတွေကြောင့်အပြင်ထွက်ခွင့်မရတော့ဘဲ အိမ်အခန်းအတွင်းလေးနှစ်ခန့်ပိတ်လှောင်ခံခဲ့ရကြောင်း၊ ဒဏ်ရာသက်သာလာချိန်မှာ အခန်းအတွင်းမှထွက်ရပြီး အိမ်အလုပ်ပြန်လုပ်ရကြောင်း၊ ဖြစ်စဉ်တွေအပေါ် မနန်းမေဇင်ဦးရဲ့ဖခင်ဖြစ်သူသိရလို့ရောက်လာချိန်မှာ ရပ်ကွက်ရုံးဆီခေါ်သွားပြီး ဆေးကုသပေးမယ် အမှုမဖွင့်ဖို့လက်မှတ်ထိုးခိုင်းခဲ့ကြောင်း၊ ငွေကြေးနဲ့နှစ်သိမ့်ပြီးဆက်လက်နေထိုင်စဉ် ၂၀၁၇ ခုနှစ် မတ်လက မနန်းမေဇင်ဦးအား အမှိုက်ပုံးသွန်းခိုင်ရာမှ မနိုင်လို့မှောက်ကျတာကနေ မနီနီနုနွယ်က နရံနဲ့တွန်းကန်ဆောင့်ခြင်း၊ ဝက်စာပုံးထဲမျက်နှာအပ်ပြီး ဖိချခြင်း၊ ဆဲဆိုကြိမ်းမောင်းခြင်းတွေပြုလုပ်လာလို့ မနန်းမေဇင်ဦးက ၎င်းတို့အလစ်မှာပဲ နေအိမ်မှ ထွက်ပြေးခဲ့ကြောင်း၊ အမျိုးသမီရေးရာအဖွဲ့နဲ့တွေ့ဆုံကာအမှုဖွင့်တရားစွဲဆိုခဲ့ကြောင်း ဖြစ်စဉ်မှတ်တမ်းတွအရသိရပါတယ်။