အများစုဟာ တစ်ကြိမ်တည်းထိုးရတဲ့ Johnson & Johnson ကာကွယ်ဆေးများဖြစ်ပြီး အာရှ-ပစိဖိတ်နိုင်ငံများသို့ တင်ပို့သွားမှာဖြစ်ပါတယ်

အိန္ဒိယအစိုးရက COVID-19 ကာကွယ်ဆေးများ ပြည်ပနိုင်ငံများသို့ပေးပို့မှု ပိတ်ပင်ထားခြင်းကို အဆုံးသတ်လိုက်ပြီးနောက် လာမယ့် အောက်တိုဘာလကုန်မှာ ကာကွယ်ဆေး ၈ သန်း တင်ပို့သွားမယ်လို့ နိုင်ငံခြားရေးဝန်ကြီးဌာန အကြီးတန်အရာရှိတစ်ဦးက ယနေ့ (စက်တင်ဘာ ၂၅ ရက်) ပြောပါတယ်။

(Quad မဟာမိတ်အုပ်စု အစည်းအဝေး) (Photo: AFP)

ဝန်ကြီးချုပ်မိုဒီက ကာကွယ်ဆေးများ ပြည်ပတင်ပို့မှု ပြန်လည်စတင်မယ်လို့ အိန္ဒိယ၊ ဂျပန်၊ ဩစတြေးလျနဲ့ အမေရိကန်တို့ ပါဝင်ကြတဲ့ Quad မဟာမိတ်အုပ်စုမှ ခေါင်းဆောင်တွေကို ကတိပြုထားခဲ့ပါတယ်။ Quad မဟာမိတ်အုပ်စုဟာ အာရှ-ပစိဖိတ်ဒေသမှာ တရုတ်လွှမ်းမိုးမှု မြင့်တက်လာခြင်းကို တုံ့ပြန်ရန်အတွက် ရည်ရွယ်ထားပါတယ်။



အောက်တိုဘာလကုန်မှာ အဆင်သင့်ဖြစ်ပါမယ်၊ Quad ကနေ အင်ဒို-ပစိဖိတ်ဒေသတွင်း ချက်ချင်း ပို့ဆောင်သွားမှာပါ

အိန္ဒိယက ပြည်ပတင်ပို့ရန် စီစဥ်ထားတဲ့ COVID-19 ကာကွယ်ဆေး ၈ သန်းအနက် အများစုဟာ တစ်ကြိမ်တည်းထိုးရတဲ့ Johnson & Johnson ကာကွယ်ဆေးများဖြစ်ပြီး အာရှ-ပစိဖိတ်နိုင်ငံများသို့ တင်ပို့သွားမယ်လို့ အိန္ဒိယနိုင်ငံခြားရေးဝန်ကြီးဌာန အတွင်းဝန် Harsh Vardhan Shringla က သတင်းထောက်တွေကို ယနေ့ ပြောပါတယ်။

(အိန္ဒိယထုတ် ကိုဗစ်ကာကွယ်ဆေးဘူးများ) (Photo: AFP)

"အောက်တိုဘာလကုန်မှာ အဆင်သင့်ဖြစ်ပါမယ်၊ Quad ကနေ အင်ဒို-ပစိဖိတ်ဒေသတွင်းကို ချက်ချင်း ပို့ဆောင်သွားမှာပါ" လို့ ၎င်းက ဆိုပါတယ်။ အိန္ဒိယဟာ ကမ္ဘာ့အကြီးဆုံး ကာကွယ်ဆေးထုတ်လုပ်တဲ့ နိုင်ငံဖြစ်ပြီး ၂၀၂၂ ခုနှစ် ဒီဇင်ဘာလ နောက်ဆုံးထားပြီး COVID-19 ကာကွယ်ဆေး တစ်ဘီလီယံကို ပြည်ပတင်ပို့သွားမယ်လို့ ယခုနှစ်အစောပိုင်းမှာ ကတိပြုထားခဲ့ပါတယ်။

သို့သော် နိုင်ငံအတွင်း COVID-19 ကူးစက်မှုတွေ ဆိုးရွားမြင့်တက်လာခဲ့ပြီးနောက် မေလအတွင်း ကာကွယ်ဆေးများ ပြည်ပတင်ပို့မှုကို ဝန်ကြီးချုပ်မိုဒီ အစိုးရက ရပ်ဆိုင်းထားစေခဲ့ပါတယ်။ အိန္ဒိယမှာ ကူးစက်မှုနဲ့ သေဆုံးမှုနှုန်း တဖြည်းဖြည်း လျော့ကျလာခဲ့ပြီးနောက် အစိုးရက ယခုသီတင်းပတ်အတွင်း ကာကွယ်ဆေး ပြည်ပတင်ပို့မှု ရပ်ဆိုင်းထားခြင်းကို ပယ်ဖျက်လိုက်ပါတယ်။

(မွမ်ဘိုင်းမြို့မှ ကိုဗစ်စစ်ရန် တို့ဖတ်ယူသည့်နေရာတစ်ခု) (Photo: Reuters)

ပြီးခဲ့တဲ့ မတ်လနဲ့ မေလအတွင်း အိန္ဒိယမှာ COVID-19 ကူးစက်မှုနှုန်း တစ်ဟုန်ထိုး မြင့်တက်ခဲ့ရာ ကာကွယ်ဆေးပြတ်လပ်မှု ကြုံခဲ့ရပါတယ်။ ထိုကာလအတွင်း အိန္ဒိယမှာ COVID-19 ကူးစက်ခံရသူ သန်းပေါင်းများစွာရှိခဲ့ပြီး ၎င်းတို့အနက် ၂၅၀,၀၀၀ ထက်မနည်း သေဆုံးခဲ့ပါတယ်။

ယခုအခါ အိန္ဒိယအစိုးရက ကာကွယ်ဆေးထိုးရန် အကျုံးဝင်သူ သန်း ၈၄၀ ကို ကာကွယ်ဆေးထိုးပေးပြီး ဖြစ်ပါတယ်။ အရွယ်ရောက်ပြီး အိန္ဒိယလူဦးရေရဲ့ ထက်ဝက်နီးပါးဟာ အနည်းဆုံး ကာကွယ်ဆေး တစ်ကြိမ်ထိုးပြီးဖြစ်ကြောင်းနဲ့ ၁၆ ရာခိုင်နှုန်းက ဒုတိယအကြိမ် ကာကွယ်ဆေးထိုးပြီးဖြစ်ကြောင်း AFP သတင်းမှာ ဖော်ပြထားပါတယ်။


ဆက်စပ်အကြောင်းအရာများ

Share

က္က