အီရန်မှာ အရက်သောက်ခြင်းဖြင့် COVID-19 ရောဂါဗိုင်းရပ်စ် ကာကွယ်နိုင်ကြောင်း ကောလာဟလ အကြံပြုချက်အမှားကို ယုံကြည်ကြပြီး တရားမဝင် ချက်လုပ်ရောင်းချတဲ့ အရက်ပုန်းများ သောက်ကြရာမှ အဆိပ်သင့် သေဆုံးသူအရေအတွက် ၄၄ ဦးအထိ မြင့်တက်လာကြောင်း နိုင်ငံပိုင်သတင်းဌာန IRNA က ပြောပါတယ်။
(Photo: EPA-EFE)
ကူဇက်စတန် (Khuzestan) နဲ့ အယ်လ်ဘော့ဇ် (Alborz) ပြည်နယ်တွေမှာ အရက်ပုန်းသောက်ပြီး အဆိပ်သင့်မှုကြောင့် လူသေဆုံးမှုတွေ ဖြစ်ပွားခဲ့ကြောင်း တနင်္လာနေ့ (မတ်လ ၉ ရက်) မှာ အီရန်သတင်းဌာနတွေက ကနဦး ဖော်ပြခဲ့ကြပါတယ်။
"ကူဇက်စတန်ပြည်နယ် Ahwaz မြို့မှာ လူအချို့က အရက်သောက်ရင် ကိုရိုနာဗိုင်းရပ်စ် မကူးစက်အောင် ကာကွယ်နိုင်တယ်လို့ ကြားခဲ့ကြတယ်၊ ဒါနဲ့ပဲ သူတို့က ဗိုင်းရပ်စ်ကာကွယ်ရေးအတွက် အရက်သောက်ခဲ့ကြတယ်" လို့ Ahwaz University of Medical Sciences ရဲ့ ပြောခွင့်ရအမျိုးသား Ali Ehsanpour က တီဟီရန်မြို့အခြေစိုက် Mehr News Agency သတင်းဌာနကို ပြောပါတယ်။
(Photo: Reuters)
အရက်ပုန်းအဆိပ်သင့်ပြီး သေဆုံးမှုတွေအနက် အီရန်အနောက်တောင်ပိုင်း ကူဇက်စတန်ပြည်နယ်မှာ အများဆုံးဖြစ်ခဲ့ပြီး မတ်လ ၉ ရက်နေ့မှာ ၁၆ ဦးမှ မတ်လ ၁၀ ရက်နေ့မှာ ၃၆ ဦးသို့ မြင့်တက်လာခဲ့ကြောင်း IRNA က ပြောပါတယ်။ ကူဇက်စတန်မှာ အရက်ပုန်းသောက်ပြီး အဆိပ်သင့် သေဆုံးသူမှုဟာ COVID-19 ဗိုင်းရပ်စ်ကြောင့် သေဆုံးမှုထက် ပိုများနေခဲ့ကြောင်း AFP သတင်းဌာနက ဖော်ပြပါတယ်။
အရက်ပုန်းအဆိပ်သင့်မှုကြောင့် အီရန်မြောက်ပိုင်း အယ်လ်ဘော့ဇ်ပြည်နယ်မှာ နောက်ထပ် ခုနစ်ဦးနဲ့ အနောက်ပိုင်းရှိ ကာမန်ရှာဟ်ပြည်နယ်မှာလည်း တစ်ဦး သေဆုံးခဲ့ကြောင်း သိရပါတယ်။ အီရန်မှာ မွတ်စလင်မ်မဟုတ်ဘူ လူနည်းစုကလွဲပြီး လူတိုင်းကို အရက်သောက်ခွင့် တားမြစ်ပိတ်ပင်ထားပါတယ်။ သို့သော် တရားမဝင် အရက်ပုန်းသောက်ပြီး အဆိပ်သင့်သေဆုံးမှု ဖြစ်ရပ်တွေကို အီရန်မီဒီယာတွေက ပုံမှန်ဖော်ပြလေ့ရှိပါတယ်။
(Photo: Adel Hana)
အီရန်ဟာ တရုတ်ပြည်မကြီးပြီးလျှင် COVID-19 ရောဂါကူးစက်ဖြစ်ပွားမှုနဲ့ သေဆုံးမှုအများဆုံး နိုင်ငံများအနက် ပါဝင်နေပါတယ်။ မတ်လ ၁၀ ရက် ညပိုင်းအထိ တရားဝင် စာရင်းတွေအရ အီရန်မှာ ဗိုင်းရပ်စ်ကူးစက်ခံရသူ ၈,၀၄၂ ဦးနဲ့ သေဆုံးသူ ၂၉၁ ဦးအထိ မြင့်တက်လာပါတယ်။ အီရန်နိုင်ငံရဲ့ ပြည်နယ် ၃၁ ခုလုံးမှာ ဗိုင်းရပ်စ်ကူးစက်မှုများ စစ်ဆေးတွေ့ရှိထားတာလည်း ဖြစ်ပါတယ်။