အသက် ၂၇နှစ်အရွယ် မြန်မာလုပ်သားတစ်ဦး တောင်ကိုရီးယားစက်ရုံဝင်းတစ်ခုမှာ ကြိုးဆွဲချသေဆုံးခဲ့တယ်လို့ ကိုရီးယားမှာရောက်ရှိနေတဲ့ မြန်မာလုပ်သားတွေဆီက သိရပါတယ်။
ဓါတ်ပုံ-MAHAR Korea Language
တောင်ကိုရီးယားနိုင်ငံ အန်ဆန်းမြို့၊ရှိဟွန်းရှိစက်မှုဇုန်မှာ အလုပ်လုပ်ကိုင်နေသူ မြန်မာနိုင်ငံသားတစ်ဦးက ဖေဖော်ဝါရီလ ၂၅ ရက်နေ့ ဒေသစံချိန် ၇ နာရီခန့်က အလုပ်လုပ်ကိုင်နေတဲ့ စက်ရုံဝန်းအတွင်းမှာ ကြိုးဆွဲချသေဆုံးခဲ့ပါတယ်။
“သတင်းမှန်ဖြစ်ပါတယ်။ အလုပ်ရှင်၊ မန်နေဂျာ၊ လုပ်ဖော်ကိုင်ဖက်တွေနဲ့ ပြသနာဖြစ်ပွားခဲ့ခြင်း မရှိဘူးလို့ သိရပါတယ်” လို့ ဆိုးလ်မြို့ရှိ မြန်မာသံရုံးမှ အလုပ်သမားသံအရာရှိက Duwun ရဲ့မေးမြန်းချက်ကို ပြန်လည်ဖြေကြားခဲ့ပါတယ်။
သေဆုံးသူဟာ E-9 ဗီဇာနဲ့ အလုပ်လုပ်ကိုင်နေတဲ့ ကိုစောအယ်စေဆိုသူဖြစ်ပြီး ၎င်းနဲ့ အတူအလုပ်လုပ်ကိုင်နေသူက သူ့ကို မတွေ့တာကြောင့် လိုက်လံရှာဖွေစဉ်မှာ စက်ရုံဝင်းအတွင်းရှိ ကွန်တိန်နာတစ်ခုအနီးမှ တန်းတစ်ခုကို အသုံးပြုပြီး ကြိုးဆွဲချသေဆုံးခဲ့တာ တွေ့ရခြင်းဖြစ်တယ်လို့ ကိုရီးယားရောက် မြန်မာအလုပ်သမားသတင်းတွေမှာ ဖော်ပြထားပါတယ်။
ကိုစောအယ်စေဟာ မြန်မာနိုင်ငံမှာ မိဘနဲ့ ချစ်သူအကြား အဆင်မပြေတာကြောင့် စိတ်ဆင်းရဲပြီး ကိုယ်တိုင် အဆုံးစီရင်ခြင်းဖြစ်တယ်လို့ ကိုရီးယားမှာအလုပ်လုပ်ကိုင်နေတဲ့ သေဆုံးသူရဲ့ သူငယ်ချင်းတွေက ပြောပါတယ်။