ကျော်ကျော်ပိုင်မှူး ကတော့ သူလိုချင်တဲ့ မိသားစုဘဝလေးကို ခံစားချက်အပြည့်နဲ့ပြောပြလာပါတယ်။ လက်ရှိ အချစ်ရေးမှာတော့ အခက်အခဲတွေများလေ ပိုနီးစပ်လေပါပဲတဲ့။

ကျော်ကျော်ပိုင်မှူးနဲ့ လိမ္မော်သီးတို့ရဲ့ အချစ်ရေးကတော့ ပရိသတ်တွေကို တရားဝင် ဖွင့်ပြောပြထား ပြီးသားဖြစ်ပါတယ်။ ကျော်ကျော်ပိုင်မှူးကတော့ လက်ရှိပိုင်ဆိုင်ထားတဲ့ အချစ်ရေးအပေါ် သူ့ရဲ့ ခံစားချက်တွေကို မီဒီယာ အင်တာဗျူးတွေကနေတဆင့် ပွင့်ပွင့်လင်းလင်းပြောပြလာပါတယ်။

“ ပိုင်ဆိုင်ချင်တဲ့ မိသားစုဘဝလေးကတော့ အေးအေးချမ်းချမ်းလေးနဲ့ မပူမပင် နေချင်တယ်။ ကိုယ်တွေဘက်ကတော့ ကြိုးစားရဦးမှာပေါ့။ သီချင်းဆိုတဲ့ အပိုင်းတွေမှာလည်း တစ်ယောက်နဲ့တစ်ယောက် တိုင်တိုင်ပင်ပင် ဖေးဖေးမမနဲ့ပေါ့။ တခြားအကြောင်းအရာကိစ္စတွေဆိုရင်လည်း ငါကတော့ ဘယ်လိုဖြစ်ချင်တယ်၊ သူ့ကိုလည်း အကြံဉာဏ်တောင်းတယ် ဘယ်လိုဖြစ်သင့်လဲ။ သူကလည်း ကိုယ့်ကို အကြံဉာဏ်တောင်းတဲ့အခါမှာ ကိုယ်တတ်နိုင်သလောက် အကြံဉာဏ်လေးပေးဖြစ်တယ်” လို့ ဆိုပါတယ်။

အဆိုတော် လိမ္မောသီးကတော့ သူမနဲ့ ကျော်ကျော်ပိုင်မှူးတို့ရဲ့ အချစ်ရေးမှာ မိခင်ဖြစ်သူက သဘောမတူဘူးလို့လည်း မီဒီယာ အင်တာဗျူးတွေမှာ ဖြေဆိုခဲ့ပါတယ်။ ဒါကိုတော့ ကျော်ကျော်ပိုင်မှူးကိုယ်တိုင်ကလည်း နားလည်ပေးတယ်လို့ ဒီဇင်ဘာလ ၁၂ ရက်နေ့က လိမ္မော်သီးရဲ့ “အသက်ရှင်မယ့်သူ” တေးစီးရီးမိတ်ဆက်ပွဲကို တက်ရောက်ရင်း ဖြေဆိုခဲ့တာပါ။

“ ကျွန်တော်တို့ကြားမှာ အတိုက်အခိုက်တွေများလေ ပိုနီးစပ်လေပါပဲ။ အဓိက ကတော့ နားလည်မှုပါ။ကျွန်တော် ခံယူထားတဲ့ Relationship က တစ်ယောက်နဲ့တစ်ယောက် သစ္စာရှိရမယ်။ တစ်ယောက်နဲ့တစ်ယောက် ချစ်ခြင်းမေတ္တာအပြည့်ရှိရမယ်။ Respect ရှိရမယ်။ ဒီလိုတွေရှိနေရင် ဘယ်လို Relationship မဆို ခိုင်မြဲမယ်လို့ ယုံကြည်တယ်။ သမီးရည်းစားမှ မဟုတ်ဘူး အိမ်ထောင်ရေးမှာလည်း ဒီလိုလေးတွေရှိမယ်ဆိုရင် ခိုင်မြဲမယ်လို့ထင်တယ်” လို့ ဆက်လက်ပြောပြခဲ့ပါတယ်။

Photo: Kyaw Kyaw Paing hmu

ကျော်ကျော်ပိုင်မှူးကိုတော့ သရုပ်ဆောင်တစ်ယောက်အဖြစ် ပရိသတ်တွေ စတင်သိရှိခဲ့တာဖြစ်ပါတယ်။ သူ့ရဲ့ အနုပညာသက်တမ်းကလည်း ၁၀စုနှစ်ကာလကျော်ရှိပါပြီ။ သူဟာ ဂီတကို ဝါသနာပါသူဖြစ်တာကြောင့် ဖျော်ဖြေရေးတွေမှာလည်း သီချင်းတွေ သီဆိုနေတာ တွေ့ရပါတယ်။ ကျော်ကျော်ပိုင်မှူးဟာ ကိုယ်ပိုင်စီးပွားရေးကိုလည်း ဦးဆောင်နေသူ တစ်ယောက်ဖြစ်ပါတယ်။