နေထူးနိုင်ကတော့ မင်္ဂလာသက်တမ်း ၁၀ နှစ်ပြည့် အမှတ်တရအဖြစ် သရုပ်ဆောင်အသစ်တွေ မွေးထုတ်ပေးသွားမယ်လို့ ဆိုပါတယ်။ အိမ်ထောင်သက် ၁၀ နှစ်အတွင်း ကြိုးစားခဲ့ရတာတွေကိုလည်း ပြောပြခဲ့ပြန်ပါသေးတယ်။
ဒီဇင်ဘာလ (၁၇) ရက်နေ့ကတော့ သရုပ်ဆောင် နေထူးနိုင် နဲ့ သရုပ်ဆောင် မြသင်းချယ် တို့ရဲ့ မင်္ဂလာသက်တမ်း ၁၀ နှစ်ပြည့် နှစ်ပတ်လည်နေ့ဖြစ်ပါတယ်။ အမှတ်တရအနေနဲ့ နေထူးနိုင်က သရုပ်ဆောင်အသစ်တွေ မွေးထုတ်ပေးသွားမယ်လို့ ဆိုပါတယ်။
"ဒီနေ့ကျရောက်တဲ့(၁၀)နှစ်ပြည့် မင်္ဂလာနှစ်ပတ်လည်နေ့မှာအမှတ်တရအနေဖြင့်အနုပညာရှင်(၁၀)ယောက်ကိုမွေးထုတ်ပြီသင်တန်းကြေးလဲမယူဘာအကြောင်းနဲ့မှာငွေကြေးမပေးရပဲ၂၀၂၀နှစ်ထဲဗွီဒီယိုဇာတ်ကားများကိုရိုက်ကူးပေးသွားပါမည်(မကြာမီဘယ်လိုခေါ်ယူမလဲဆိုတာကြော်ငြာပေးသွားပါမည်)" ဆိုပြီးတော့ ဒီဇင်ဘာလ ၁၇ ရက်နေ့ မနက် ၈ နာရီကျော်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။
သူတို့ နှစ်ယောက်အတူ စတင်တည်ထောင်ခဲ့တဲ့ အိမ်ထောင်ရေးနဲ့ ပတ်သက်တဲ့ အမှတ်တရတွေကိုလည်း ပြောပြခဲ့ပြန်ပါသေးတယ်။ အဆင်မပြေမှုတွေကြားက တည်ဆောက်ခဲ့တဲ့ အိမ်ထောင်ရေးဖြစ်တယ်လို့လည်း အောက်တိုဘာလ ၆ ရက်နေ့က ပုသိမ်မြို့မှာ ကျင်းပခဲ့တဲ့ Aroma Fashion Show ပွဲကို တက်ရောက်ရင်း Duwun Media အင်တာဗျူးမှာ ဖြေဆိုခဲ့တာပါ။
‘’ အစ်ကို အိမ်ထောင်ကျတုန်းကတော့ အသက်က ၃၀ ရှိနေပြီလေ။ အဲဒီအချိန်မှာ Ro နေမယ့်အစား ဘဝကို တကယ်ရှေ့ဆက်လျှောက်ပြီးတော့ လက်တွဲရမှာရယ်၊ အသက်တွေက ကြီးသွားမယ်လေ။ အဓိက က တစ်ယောက်နဲ့ တစ်ယောက် ချစ်တယ်၊ နားလည်မယ် ဆိုရင် ဘဝတစ်ခုက တည်ဆောက်လို့ရပြီ။ ကျန်တာက ၂ ယောက်ပေါင်းပြီးတော့ အလုပ်လုပ်လို့ရမယ်၊ စီးပွားရှာလို့ရမယ်။ စီးပွားရေးအဆင်မပြေလို့ မယူရဘူးဆိုရင် အများကြီးပဲပေါ့နော်။ အစ်ကိုတို့ နှစ်ယောက်စပြီးတော့ အိမ်ထောင်ကျတုန်းကလည်း ပရိသတ်က လက်ခံတဲ့သူ မဟုတ်သေးဘူး။ အဲဒီအထဲကနေမှ ဒီလိုအခြေအနေတစ်ခုရောက်အောင် အစ်ကိုတို့ ကြိုးစားခဲ့ကြရတာ’’ လို့ သူကဆိုပါတယ်။
Photo: Nay Htoo Naing
နေထူးနိုင်နဲ့ မြသင်းချယ်တို့ဟာ အခုဆိုရင် ပျော်စရာကောင်းတဲ့ ကိုယ်ပိုင်မိသားစုဘဝလေးကို ပိုင်ဆိုင်နေကြပြီဖြစ်ပါတယ်။ သူတို့မှာတော့ သားလေး နှစ်ယောက်ရှိပါတယ်။ သားတွေအပေါ်ထားတဲ့ ဖခင်တစ်ယောက်ရဲ့ ဆန္ဒကိုလည်း နေထူးနိုင်က ဖွင့်ဟပြောပြခဲ့ပါတယ်။
‘’အစ်ကိုတို့ရဲ့ အောင်မြင်မှုကို အပျက်စီးလည်း မခံနိုင်ပါဘူး။ တန်ဖိုးထားပါတယ်။ အစ်ကိုတို့ သားလေးတွေရှိတယ်၊ သူတို့တွေအတွက် အစ်ကိုတို့ နှစ်ယောက်က စံပြတွေဖြစ်ရမယ်။ မိဘဆိုတာ သားသမီးတွေအတွက် စံပြတွေ ဖြစ်စေချင်တယ်။ ဘယ်လိုအကြောင်းကြောင့်နဲ့မှ သားသမီးတွေကို စိတ်ထိခိုက်စေမယ့် အလုပ်မျိုး အစ်ကိုတို့ မလုပ်ဘူး’’ လို့ ဆက်လက်ပြောပြခဲ့ပါတယ်။
နေထူးနိုင်နဲ့ မြသင်းခြယ်တို့ ဇနီးမောင်နှံ နှစ်ယောက်စလုံးကိုတော့ ဗီဒီယိုဇာတ်ကား အက်ရှင်ဇာတ်ကားတွေကနေတဆင့် ပရိသတ်တွေ စတင်သိရှိခဲ့တာပါ။ သူတို့ရဲ့ အနုပညာသက်တမ်းကလည်း ၁၀ စုနှစ်ကျော်ကို ကြာမြင့်နေပြီဖြစ်ပါတယ်။ ၂၀၀၉ ခုနှစ် ဒီဇင်ဘာလ ၁၇ ရက်နေ့မှာ ရွှေလက်တွဲခဲ့ကြတာဖြစ်ပါတယ်။ နေထူးနိုင်ကိုတော့ ပရိသတ်တွေက အက်ရှင်မင်းသားတစ်ယောက်အဖြစ် စတင်သိရှိလာခဲ့ကြတာပါ။ လက်ရှိမှာလည်း အက်ရှင်ဇာတ်ကားတွေ ရိုက်ကူးနေတာ တွေ့ရပါတယ်။ သူဟာ အနုပညာနဲ့ ပတ်သက်ပြီး ဇာတ်ကားတွေလည်း ရိုက်ကူးနေတာဖြစ်သလို မြန်မာနိုင်ငံရုပ်ရှင်အစည်းအရုံးရဲ့ ဗီဒီယို အဖွဲ့မှာလည်း အတွင်းရေးမှူးတစ်ယောက်အဖြစ် တာဝန်ယူဆောင်ရွက်နေတာဖြစ်ပါတယ်။