ပီအက်စ်ဂျီတိုက်စစ်မှူးမက်ဆီဟာ သူ့ရဲ့အချစ်ဆုံးသူငယ်ချင်း ဆွာရက်ဇ်ရဲ့ ဥရုဂွေးကို အပြန်လမ်းအတွက် သူ့ရဲ့ ပေါင် ၁၂ သန်းတန် ကိုယ်ပိုင်ဂျက်လေယာဉ်ကို ငှားရမ်းခဲ့တယ်လို့ သိရပါတယ်။ ဆွာရက်ဇ်ဟာ ငယ်ဘ၀ကလပ် နေစီယွန်နယ်ကို ပြန်လည်ပြောင်းရွှေ့ခဲ့တာဖြစ်ပြီး မိတ်ဆက်ပွဲလုပ်ဖို့အတွက် အပြန်ခရီးမှာ မက်ဆီရဲ့ လေယာဉ်နဲ့ ပြန်သွားခဲ့တာဖြစ်ပါတယ်။
ဆွာရက်ဇ်ရဲ့ နေစီယွန်နယ်အသင်းဆီ အပြန်လမ်းကိုတော့ ပရိသတ်အများအပြားက ကြိုဆိုခဲ့ကြပါတယ်။ သူငယ်ချင်းဖြစ်သူ အစစအရာရာအဆင်ပြေအောင် မက်ဆီက ကြီးကြီးမားမားကူညီပေးခဲ့တာဖြစ်ပြီး ဒီသတင်းက အားလုံးကိုအံ့အားသင့်စေခဲ့ပါတယ်။ သူတို့နှစ်ဦးဟာ ဘာစီလိုနာမှာ အသင်းဖော်တွေအဖြစ် နှစ်အတန်ကြာကစားခဲ့ကြပြီး အခင်မင်ဆုံး၊အချစ်ဆုံးသူငယ်ချင်းတွေဖြစ်ခဲ့တာပါ။
မက်ဆီက သီးသန့်လုပ်လေ့ရှိတဲ့ အခမ်းအနားတွေ၊ မွေးနေ့တွေမှာဆိုရင် ဘယ်သူမှမပါဝင်ခဲ့ရင်တောင် အမြဲတမ်းလိုလို ဆွာရက်ဇ်က ရှိနေခဲ့ပြီး သူတို့နှစ်ဦးကြားမှာ ကြီးမားတဲ့ သူငယ်ချင်းသံယောဇဉ်တွေရှိခဲ့ကြတာပါ။ ဇနီးသည်တွေပါလာခဲ့ရင်တောင်မှ သူတို့နှစ်ဦးက ကားခေါင်းခန်းမှာထိုင်ပြီး ဇနီးသည်တွေကို နောက်ပို့ထားတဲ့အထိ ခင်မင်သူတွေရယ်လို့လည်း ကျော်ကြားခဲ့ပါတယ်။
အခုလည်း မက်ဆီက သူ့ရဲ့လေယာဉ်ကို ငှားရမ်းခဲ့ကာ ဆွာရက်ဇ်ကို လိုက်ပို့စေခဲ့တာဖြစ်ပါတယ်။ အာဂျင်တီးနားနာမည်ကျော်ကစားသမားက ဆွာရက်ဇ်အတွက်လည်း ဆုမွန်ကောင်းတောင်းပေးမှုတွေကို ပြုလုပ်ခဲ့ပါသေးတယ်။ "ငါ မင်းကို ဘယ်လောက်ချစ်လဲ မင်းသိမှာပါ သူငယ်ချင်း၊ အခု ငါတို့ မင်းကြောင့် နေစီယွန်နယ်ကို Follow လုပ်လိုက်ပြီ၊ မင်းရဲ့ ပွဲတွေကို ငါတို့စောင့်ကြည့်နေမှာပါ၊ မင်းအကောင်းဆုံးဖြစ်ပါစေလို့လည်း ငါဆုတောင်းပေးပါတယ်" လို့ မက်ဆီက ပြောဆိုခဲ့ပါတယ်။
အသက် ၃၄ နှစ်အရွယ် ဥရုဂွေးတိုက်စစ်မှူးဆွာရက်ဇ်ဟာ အေဂျက်ဇ်၊ လီဗာပူးလ်၊ ဘာစီလိုနာနဲ့ အက်သလက်တီကိုမက်ဒရစ်တို့မှာ ကစားခဲ့ပြီး နာမည်ကျော်ကြားခဲ့သူဖြစ်ပါတယ်။ ဘာစီလိုနာမှာအအောင်မြင်ဆုံးအချိန်တွေကို ပိုင်ဆိုင်ခဲ့ပြီး မက်ဆီ၊ နေမာတို့နဲ့ တွဲဖက်ကာ MSN တိုက်စစ်အတွဲအဖက်ကို တည်ဆောက်နိုင်ခဲ့သူလည်းဖြစ်ပါတယ်။