အမေရိကန်နိုင်ငံ ကယ်လီဖိုးနီးယားပြည်နယ်မှာ စိုးရိမ်ပူပန်မှုအရ လေကြောင်းခရီးစဥ်များဖြင့် ရောက်ရှိလာခဲ့သူ ၈,၄၀၀ ကျော်ကို COVID-19 ရောဂါဗိုင်းရပ်စ်လက္ခဏာများအတွက် စောင့်ကြည့်နေကြောင်း ပြည်နယ်အုပ်ချုပ်ရေးမှူး Gavin Newsom က ဖေဖေါ်ဝါရီ ၂၇ ရက်နေ့မှာ ပြောပါတယ်။

(Photo: AP)

ကယ်လီဖိုးနီးယားမှာ ဗိုင်းရပ်စ်သံသယဖြင့် စောင့်ကြည့်မှုတွေ ဆောင်ရွက်နေပေမဲ့ စမ်းသပ်ကိရိယာများ လိုအပ်နေပြီး ပြည်ထောင်စုအစိုးရက အထောက်အပံ့ပေးထားတဲ့ စမ်းသပ်စစ်ဆေးမှု နည်းလမ်းများဖြင့် လုပ်ဆောင်နေတယ်လို့လည်း Gavin Newsom က ဆိုပါတယ်။ ကယ်လီဖိုးနီးယားမှာ စမ်းသပ်စစ်ဆေးကိရိယာ ၂၀၀ မျှသာရှိနေပြီး ကျန်းမာရေးစစ်ဆေးမှုတွေကို အမေရိကန်နိုင်ငံသားတွေကိုပါ တိုးချဲ့ပြုလုပ်ရန်အတွက် စီစဥ်နေပါတယ်။

လာမယ့်ရက်များအတွင်း အမေရိကန် Centers for Disease Control and Prevention (CDC) က စမ်းသပ်စစ်ဆေးမှု လုပ်ထုံးလုပ်နည်းတွေကို တိုးမြှင့်သွားမှာဖြစ်ပြီး စစ်ဆေးကိရိယာတွေလည်း ပိုမိုထောက်ပံ့ပေးသွားမယ်လို့ ကယ်လီဖိုးနီးယားပြည်နယ် အုပ်ချုပ်ရေးမှူးက ပြောပါတယ်။

(Photo: AFP)

ကယ်လီဖိုးနီးယားမှာ မည်သည့်နေရာမှ ကူးစက်ခဲ့ကြောင်း မသိရှိရတဲ့ COVID-19 ဗိုင်းရပ်စ်ကူးစက်ခံ အမျိုးသမီးတစ်ဦးကို ဗုဒ္ဓဟူးနေ့ (ဖေဖေါ်ဝါရီ ၂၆ ရက်) က တွေ့ရှိခဲ့ရာ အမေရိကန်လူထုကြားမှာ ဗိုင်းရပ်စ်ကူးစက်ပျံ့နှံ့တဲ့ ပထမဆုံးဖြစ်ရပ် ဖြစ်နိုင်ခြေရှိလာပါတယ်။

ကယ်လီဖိုးနီးယားမြောက်ပိုင်း ဆိုလာနိုကောင်တီမှာ နေထိုင်တဲ့ ဗိုင်းရပ်စ်ကူးစက်ခံ အမျိုသမီးလူနာဟာ သတ်မှတ်ချက်နဲ့ မကိုက်ညီတာကြောင့် အစောပိုင်းမှာ ၎င်းကို COVID-19 ဗိုင်းရပ်စ်စစ်ဆေးနိုင်ခဲ့ခြင်း မရှိဘူးလို့ဆိုပါတယ်။ ယနေ့ (ဖေဖေါ်ဝါရီ ၂၈ ရက်) မနက်ပိုင်းအထိ အမေရိကန်မှာ COVID-19 ဗိုင်းရပ်စ်ကူးစက်ခံရသူ ၆၀ ဦး စစ်ဆေးတွေ့ရှိထားပါတယ်။

(Photo: AFP)

ယနေ့ မနက်ပိုင်းအထိ ထုတ်ပြန်ထားတဲ့ စာရင်းတွေအရ ဗိုင်းရပ်စ်ကြောင့် တရုတ်ပြည်မကြီးမှာ ၂,၇၈၈ ဦး၊ အီရန်မှာ ၂၆ ဦး၊ အီတလီမှာ ၁၇ ဦး၊ တောင်ကိုရီးယားမှာ ၁၃ ဦး၊ Diamond Princess အပျော်စီးသင်္ဘောပေါ်နဲ့ ဂျပန်မှာ ၄ ဦးစီ၊ ဟောင်ကောင်နဲ့ ပြင်သစ်မှာ ၂ ဦးစီ၊ ထိုင်ဝမ်နဲ့ ဖိလစ်ပိုင်မှာ ၁ ဦးစီ သေဆုံးခဲ့ပြီး စုစုပေါင်း သေဆုံးသူအရေအတွက် ၂,၈၅၈ ဦးသို့ မြင့်တက်လာပါတယ်။

မည်သည့်နိုင်ငံမှ ဗိုင်းရပ်စ်ကနေ လွတ်လိမ့်မှာမဟုတ်ကြောင်းလည်း WHO အကြီးအကဲက သတိပေးခဲ့ပါတယ်

ဖေဖေါ်ဝါရီ ၂၈ ရက် မနက်အစောပိုင်းအထိ တရုတ်ပြည်မကြီးမှာ ၇၈,၈၂၄ ဦး အပါအဝင် ကမ္ဘာတစ်ဝှမ်း ဗိုင်းရပ်စ်ကူးစက်ခံရသူ ၈၃,၃၀၄ ဦးရှိလာပြီး ၃၆,၄၉၈ ဦး ပြန်လည်သက်သာသွားခဲ့ပါတယ်။ သီးခြားသတင်းတွေအရ COVID-19 ဗိုင်းရပ်စ်ကူးစက်ခံပြီး ဆေးကုသမှုကြောင့် သက်သာသွားသူတွေထံမှာ ဗိုင်းရပ်စ်ပြန်တွေ့ရတဲ့ ဖြစ်ရပ်တွေရှိခဲ့ကြောင်း သိရပါတယ်။

(Photo: AFP)

တောင်ကိုရီးယားမှာ ဗိုင်းရပ်စ်ကူးစက်ခံသူ အရေအတွက် နောက်ထပ် မြင့်တက်လာနိုင်ကြောင်း တာဝန်ရှိသူတွေက ပြောထားပါတယ်။ ဂျပန်နိုင်ငံမှာလည်း ဗိုင်းရပ်စ်ကူးစက်မှုကို ထိန်းချုပ်တားဆီရန် စာသင်ကျောင်းအားလုံးကို မတ်လ ၂ ရက်မှစပြီး ဧပြီလဆန်းအထိ ပိတ်ထားမှာဖြစ်ပါတယ်။

ဗိုင်းရပ်စ်ကူးစက်ပျံ့နှံ့မှု ကမ္ဘာအနှံ့ ဖြစ်ပွားတဲ့ pandemic အဆင့်ဖြစ်ရန် အလားအလာရှိကြောင်း WHO က ပြောပါတယ်

ထိုအတောအတွင်း ကမ္ဘာ့ကျန်းမာရေးအဖွဲ့အစည်း (World Health Organizaion - WHO) က COVID-1 ရောဂါဗိုင်းရပ်စ် ကူးစက်ပျံ့နှံ့မှုဟာ အဆုံးအဖြတ် အခိုက်အတန့်ကိုရောက်ရှိနေပြီး ကမ္ဘာအနှံ့ ကူးစက်ပျံ့နှံ့မှု pandemic အဆင့်ဖြစ်ရန် အလားအလာရှိကြောင်း ပြောပါတယ်။ မည်သည့်နိုင်ငံမှ ဗိုင်းရပ်စ်ကနေ လွတ်လိမ့်မှာမဟုတ်ကြောင်းလည်း WHO အကြီးအကဲ Tedros Adhanom Ghebreyesus က သတိပေးခဲ့ကြောင်း သိရပါတယ်။

COVID-19 ဗိုင်းရပ်စ်ကူးစက်ပျံ့နှံ့မှုကို ကမ္ဘာ့ကျန်းမာရေးအဖွဲ့အစည်း (World Health Organization - WHO) က ဇန်နဝါရီ ၃၀ ရက်နေ့မှာ သတ်မှတ်ကြေညာထားပါတယ်။ ဖေဖေါ်ဝါရီ ၂၄ ရက်မှာတော့ ဗိုင်းရပ်စ်ကူးစက်မှုဟာ ကမ္ဘာ့နေရာအနှံ့မှာ ဖြစ်ပွားလာနိုင်တဲ့ အလားအလာအတွက် ကြိုတင်ပြင်ဆင်ကြရန် WHO က သတိပေး ပြောကြားခဲ့ပါတယ်။

Source: AFP, Reuters