အမေရိကန်သမ္မတဂျိုးဘိုင်ဒန်နဲ့ တရုတ်သမ္မတရှီကျင့်ဖျင်တို့ နိုဝင်ဘာ ၁၅ ရက်နေ့မှာ အွန်လိုင်းမှတစ်ဆင့် ထိပ်သီးဆွေးနွေးပွဲ ပြုလုပ်သွားမယ်လို့ အိမ်ဖြူတော်က ထုတ်ပြန်ပါတယ်။

(၂၀၁၄ ခုနှစ်က ဘေဂျင်းမြို့မှာ ဘိုင်ဒန်နှင့် ရှီကျင်ဖျင့် တွေ့ဆုံခဲ့စဥ်) (Photo: Reuters)

အမေရိကန်နဲ့ တရုတ်တို့ဟာ COVID-19 မူလဇစ်မြစ်ကနေ တရုတ်ရဲ့ နျူကလီးယားလက်နက်တိုက် တိုးချဲ့မှုအထိ ကိစ္စရပ်တွေအပေါ် အငြင်းပွားနေခဲ့ကြပါတယ်။ တရုတ်သမ္မတရှီကျင့်ဖျင်နဲ့ တိုက်ရိုက်ဆွေးနွေးခြင်းက နှစ်နိုင်ငံဆက်ဆံရေး ပဋိပက္ခဆီသို့ ဦးတည်နေခြင်းကို တားဆီးရန် အကောင်းဆုံးနည်းလမ်းဖြစ်ကြောင်း အမေရိကန်အစိုးရက ယုံကြည်ထားပါတယ်။

"ခေါင်းဆောင်နှစ်ဦးက ယှဥ်ပြိုင်မှုကို တာဝန်သိစွာ စီမံခန့်ခွဲရန် နည်းလမ်းတွေကို ဆွေးနွေးကြမှာပါ၊ ပြီးတော့ ကျွန်မတို့ရဲ့ အကျိုးစီးပွားတူညီတာတွေအပေါ် အတူတကွ လုပ်ဆောင်ကြဖို့လည်း ဆွေးနွေးသွားကြပါမယ်၊ သမ္မတဘိုင်ဒန်က အမေရိကန်ရည်ရွယ်ချက်တွေနဲ့ ဦးစားပေးမှုတွေကို ရှင်းရှင်းလင်းလင်း ပြောမှာဖြစ်ပြီး ကျွန်မတို့ရဲ့ စိုးရိမ်မှုတွေနဲ့ ပတ်သက်ပြီး ပွင့်ပွင့်လင်းလင်း ဆွေးနွေးသွားမှာပါ" လို့ အိမ်ဖြူတော် သတင်းထုတ်ပြန်ရေး အကြီးအကဲ Jen Psaki က ထုတ်ပြန်ချက်မှာ ပြောထားပါတယ်။

(၂၀၁၂ ခုနှစ်က အိမ်ဖြူတော်မှာ ဘိုင်ဒန်နှင့် ရှီကျင်ဖျင့် တွေ့ဆုံခဲ့စဥ်) (Photo: Getty Images)

တရုတ်နိုင်ငံခြားရေးဝန်ကြီးဌာနကလည်း ခေါင်းဆောင်တွေဟာ နှစ်နိုင်ငံဆက်ဆံရေးနဲ့ ဘုံအကျိုးစီးပွားတွေရဲ့ ကိစ္စရပ်တွေကို ထိပ်သီးဆွေးနွေးပွဲမှာ ဆွေးနွေးကြမယ်လို့ ယနေ့ (နိုဝင်ဘာ ၁၂ ရက်) ထုတ်ပြန်ခဲ့ပါတယ်။ တရုတ်သမ္မတရှီကျင့်ဖျင်က ၎င်းရဲ့နိုင်ငံမှာ လက်ခံကျင်းပသွားမယ့် ဆောင်းရာသီအိုလံပစ် အားကစားပြိုင်ပွဲသို့ အမေရိကန်သမ္မတဂျိုးဘိုင်ဒန် လာရောက်ရန် ဖိတ်ကြားသွားမယ်လို့ အစောပိုင်း သတင်းတွေမှာ ဖော်ပြထားပါတယ်။